Covid-toetse laat dit klap by Tokio-Spele

Sportlui wat aan die 2021 Olimpiese Spele in Tokio wil deelneem, sal bewys van ’n negatiewe toetsuitslag vir Covid-19, wat minder as 72 uur voor hul aankoms in Japan verkry is, moet lewer en sal dan ook “elke vier tot vyf dae” getoets word.
So lui ’n verslag wat die Tokio-reëlingskomitee dié week gepubliseer het.
Soos sake nou lyk, moet besoekers aan Japan met hul aankoms eers 14 dae in kwarantyn deurbring, maar atlete, afrigters, beamptes en ander belanghebbendes sal van hierdie vereiste vrygestel word.
Meer as 15 000 atlete word in Tokio verwag vir die skouspel wat op 23 Julie sal begin. Die meerderheid van hulle sal in die Speledorp tuisgaan.
’n Spesiale Covid-19-toetssentrum sal in die Speledorp opgerig word vir die derduisende toetse wat vir die duur van die Spele gedoen sal word.
In die verslag sê die reëlingskomitee ook dat atlete ná die Spele so gou as moontlik moet terugkeer huis toe.
In die stadium gaan ’n groot aantal oorsese besoekers toegelaat word om die Olimpiese Spele by te woon, maar ’n finale besluit oor die getalle sal eers in die Noordelike Halfrond se lente geneem word.
– Reuters, Netwerk24

FOTO
Só lyk ’n deel van die Olimpiese Speledorp, waar atlete volgende jaar in Tokio sal tuisgaan. ’n Covid-19-toetssentrum sal ook in dié dorp opgerig word. Foto Getty Images