Covid: Geen blitstoetse vir nou

Henriette Lamprecht - Namibië gebruik tans geen blitstoetse vir Covid-19 nie. Volgens die minister van gesondheid en maatskaplike dienste, dr. Kalumbi Shangula, sal die toekomstige gebruik van sulke toetse in die land afhang van die “ontwikkeling op die Covid-19-barometer”. Tans word polimerase kettingreaksie-, of PCR-toetse, vir Covid-19 gebruik.Shangula het vroeër gesê die land ondersoek tans die gebruik van blitstoetse om die bron van infeksie te identifiseer, die vinnige opsporing van kontakte te verseker en ook om positiewe gevalle te isoleer. Volgens die Wêreldgesondheidsorganisasie (WHO) se direkteur vir Afrika, dr. Matshidiso Moeti, kan die wydverspreide gebruik van hoëgehalte blitstoetse die vasteland se reaksie op Covid-19 dramaties verander. Moeti sê die nuwe, antigeengebaseerde vinnige diagnostiese toetse sal help om in die groot toetsbehoeftes in Afrika te voorsien. “Die meeste Afrikalande fokus op die toetsing van reisigers, pasiënte of kontakte. Ons beraam dat ’n beduidende aantal gevalle gemis word. Met blitstoetse kan owerhede ’n treë voor Covid-19 bly deur die soektog van gevalle in uitdagende omgewings soos oorbevolkte stedelike woonbuurte en gemeenskappe in afgeleë gebiede te verhoog,” het Moeti gesê. Die uitrol van die nuwe toetse wat deur die WHO goedgekeur is, sal volgens die organisasie die vasteland se toetskapasiteit beduidend verhoog. Baie Afrikalande het gesukkel om beduidende getalle te toets om die pandemie te beheer, met slegs 12 in die streek (Namibië ingesluit) wat die sleuteldrempel van tien toetse per 10 000 mense per week die afgelope maand bereik het. Baie van die Afrikalande het ook tekort geskiet vergeleke met ander lande van soortgelyke grootte in ander wêrelddele. Die WHO sonder onder meer vir Senegal uit wat sy toetskapasiteit beduidend verhoog het, maar steeds 14 keer minder as Nederland toets. Ook toets Nigerië elf keer minder as Brasilië. Die meeste lande in die WHO-streek gebruik PCR-toetse wat laboratoriums, reagente en kundiges vereis en gevolglik die toetsing vir Covid-19 grootliks tot groot stede beperk.Volgens die WHO kan mense van 48 uur tot meer as tien dae vir hul uitslae wag. Die nuwe blitstoetse is maklik om te gebruik, goedkoper as PCR-toetse en verskaf uitslae binne net 15 tot 30 minute, wat lande in staat stel om toetsing te desentraliseer. Vinnige antigeentoetse is volgens die organisasie ’n byvoeging tot PCR-toetse en nie ’n vervanging daarvan nie. Volgens die WHO is dit meer as 80% akkuraat en meer betroubaar in pasiënte met simptome, ’n hoë virale lading of wat baie van die virus in hul boonste lugweë het. Tans is die twee toetse wat deur die WHO vir noodgebruik goedgekeur is, die “standaard Q Covid-19 antigeentoets deur SD Biosensor Inc” en die “Panbio Covid-19 antigeen vinnige toetstoestel” vervaardig deur Abbott.Bogenoemde toets vir proteïene wat deur die SARS-CoV-2-virus vervaardig word en wat Covid-19 veroorsaak.Liggaamsvloeistowwe word van ’n nasale depper geneem en met vloeistof op ’n papierstrokie aangewend waar ’n kleurstof die uitslag gee. Die WHO beveel aan dat vinnige antigeentoetse in vier scenario’s gebruik behoort te word. Dit sluit in vermoedelike uitbrekings waar daar geen toegang tot PCR-toetsing is nie, ingesluit afgeleë gebiede wat moeilik bereikbaar is; om die omvang van ’n uitbreking na te spoor waar minstens een geval deur middel van ’n PCR-toets opgespoor is en ingesluit in gebiede met noue kontak soos tronke; onder hoërisikogroepe soos gesondheidswerkers en laastens in gebiede met wydverspreide gemeenskapsoordrag. Wêreldwyd word 120 miljoen van die spoedtoetse aan 20 lae- en middelinkomstelande in Afrika beskikbaar gestel. Die WHO ondersteun ook lande om die toetse aan te koop deur die verskaffingsportaal deur die Verenigde Nasies (UN) opgestel is. – henriette@republikein.com.na

Covid: Geen blitstoetse vir nou

Kommentaar

Republikein 2026-06-11

Meld asseblief aan om kommentaar te lewer

Covid: Geen blitstoetse vir nou

Kommentaar

Republikein 2026-06-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.