Covid: Families wag by 'hek van pyn'

Henriette Lamprecht – Familie en vriende van pasiënte wat in die Covid-19-saal in die Katutura-hospitaal behandel word, moet noodgedwonge daagliks tussen 15:00 en 16:00 by die hospitaal se “hek van pyn” gaan wag te hoor hoe dit met hul geliefdes gaan. Familie kry ook net dan die geleentheid om 'n pakkie vir die pasiënt af te lewer. 'n Handgeskrewe nota met die tyd en 'n telefoonnommer vir navraag, lê volgens een familielid op die grond by die hek.'n Plasing op sosiale media deur Jessica le Roux, wie se 89-jarige ouma in die saal lê, het wyd reaksie uitgelok. Volgens Le Roux het haar ouma Covid-19 in die hospitaal opgedoen. Nadat dinge aanvanklik beter gegaan het, het Le Roux tydens gister se besoek om navraag te doen, gesê dit was “weer totale chaos. Geen sosiale afstand, geen sekuriteit, geen plakkate of niks of niemand wat sê mense moet in 'n ry staan nie. Mense is onbeskof en onbehulpsaam. Sou enige persoon oor 'n rooi lyn tree wat by die hek is, is die boete glo N$2 000.”Le Roux moes 'n vorige keer saam met ander 'n uur wag voordat 'n personeellid uitgekom het. Dié persoon het net die hek kom sluit, terwyl die telefoonnommer vir navrae heeltyd beset bly. “My ouma is 89 jaar oud. Dit gaan oor die frustrasie oor jou mens wat haar lewe lank versorg is. Jy bly wonder 'kyk hulle na haar?'”Jessica vertel in die tyd wat hulle gewag het by die hek – wat hul familie die “hek van pyn” gedoop het – het 'n vrou gehoor haar ma is oorlede nadat sy agt dae niks van haar gehoor het nie. “Dit gaan oor kommunikasie en sorg. Ons wil weet daar is iemand wat ons mense versorg. Ons het begrip personeel is gestres en dit moet verskriklik wees om iemand te sien sterf. Maar ons as familie leef met daardie vrees en angs en wag vir daardie oproep wat sê jou mens het gesterf.”Volgens Jessica is haar ouma se toestand tans kritiek maar stabiel. 'n Maatskaplike werker, me. Annalies Dunn, is intussen na hulle verwys, wat volgens haar “'n groot verskil maak en haar deel doen”. 'n Senior bestuurder, mnr. Joshua Ihuhwe, was ook baie behulpsaam. Ná hul ingryping het die kommunikasie by die hek verbeter en is elke persoon wat buite gewag het, van hul geliefde se toestand verwittig. “Dit het emosioneel só baie gehelp.”Nog 'n familielid het uit Walvisbaai laat weet sy het Vrydag laas van haar suster gehoor wat in die eenheid behandel is en aan 'n ventilator gekoppel was. Laat gistermiddag het die dokter laat weet haar suster is oorlede.Haar suster het in SMS-boodskappe laat weet daar is “nie seep en water of toiletpapier nie.” Volgens die boodskappe kan sy ook nie self toilet toe gaan nie, want jy is aan die bed ge-'strap'. Verswakte pasiënte word glo nie gehelp om te eet nie; “hulle sit net die kos neer en met huistoetyd 'collect' hulle weer.” Sy het ook in haar boodskappe aan haar suster gesê 'n suurstofmasker is op haar gesig gesit terwyl die personeel nie agtergekom het al die suurstof was afgesny nie. 'n Dokter het aan personeel gesê om dieselfde masker te gebruik waarmee sy ingekom het en aan haar gesê “haal so hard moontlik asem”.“Die dokter gooi sy arms in die lug en sê dis die heel eerste keer wat 'n Covid-geval dit oorleef.”In reaksie op Jessica se Facebook-plasing het een persoon laat weet iemand wat saam met sy pa in die eenheid gelê het, is dood, maar die liggaam is nie verwyder nie. Uit Keetmanshoop het 'n vrou laat weet haar tannie wat op die dorp behandel is, moes elke keer “huis toe SMS en sê sy het suurstof of water nodig”.“Haar man was die nag wat sy die lewe gelaat het daar om te sê sy vrou benodig suurstof. Die vrou voor het nie eens gaan kyk nie en net gesê dit sal reggemaak word.”In nog 'n boodskap skryf 'n vrou wie se ma aan Covid-19 oorlede is, “jy word nie toegelaat om jou geliefdes te sien nie. Jy het geen idee hoe hulle voel of behandel word nie. Hulle word gelos om dood te gaan. Ek f***** haat daardie hospitaal en elke verpleegster en dokter daar.”Ander skryf oor die feit dat 'n geliefde in twee weke nooit gebad is nie; haar masker was nie reg opgesit nie en daar was ook nie 'n klokkie vir hulp nie. En dit is net waarvan ons weet.”“Ons tannie het gesterf en dis nou al byna twee weke en ons wag steeds vir haar besittings. As die behandeling buite so sleg is, hoe sleg is dit daar binne?” wil nog iemand weet. Die minister van gesondheid en maatskaplike dienste, dr. Kalumbi Shangula, het by navraag gesê die eenheid het 67 pasiënte met vyf dokters wat na hulle omsien, drie gedurende die dag en twee gedurende die nag. Hy het verdere navrae na dr. Nelago Amagulu, mediese superintendent, verwys wat teen druktyd nie op vrae gereageer het nie. – henriette@republikein.com.naFOTO’s verskaf

Covid: Families wag by 'hek van pyn'

Kommentaar

Republikein 2026-02-03

Meld asseblief aan om kommentaar te lewer

Covid: Families wag by 'hek van pyn'

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.