Covid-19 verskeur Rehoboth-gesin

Denver Kisting – “Is ék volgende? Wat sal van my kinders word? Wat sal van my suster se kinders word?”Dit was Sondagoggend die vrae wat ’n 42-jarige vrou van Rehoboth haarself afgevra het toe sy hoor ook sy het positief vir Covid-19 getoets.Haar ma (68) is daardie oggend dood – twee dae nadat hulle haar 43-jarige suster, wat ook weens die virus dood is, begrawe het.In ’n aangrypende telefoniese onderhoud vanuit haar oorlede ma se woonstel, waar sy tans in isolasie is, het sy vertel haar ma is op Maandag 17 Augustus in die hospitaal op die dorp opgeneem met vog op haar longe.Volgens dié ma van twee het haar ma onderliggende hart- en longprobleme gehad.Verlede Woensdag – ’n dag nadat haar suster dood is – het hulle die nuus ontvang haar ma én die suster het positief vir die virus getoets.Sy sê haar suster, wat sover bekend geen onderliggende siektes gehad het nie, is ná haar dood vir Covid-19 getoets.Haar suster is die aand voor haar dood in dieselfde hospitaal opgeneem nadat sy aanvanklik by die ongevalleafdeling met ’n pyn in die bors aangemeld het. Die vrou sê sy het omstreeks 09:00 die dag van haar dood met haar suster oor die telefoon gepraat. “Sy het gesê sy het suurstof gekry, maar dat sy baie goed geslaap het.”Volgens haar het hulle drie ure later die oproep gekry dat haar suster oorlede is.Haar ma se toestand het begin agteruitgaan kort nadat hulle uitgevind het ook sy is positief.Die vrou sê sy besef haar ma het onderliggende kwale gehad en was uiteraard weerloos. Haar suster se skielike dood is egter ’n bitter pil om te sluk. “My ma se dood kan ek aanvaar en verwerk.”Sy sê mense moet besef Covid-19 is ’n werklikheid. Om iemand onder dié omstandighede aan die dood af te staan, is baie moeilik, sê sy. “Ek wens dit niemand toe nie. Dit het ons getref sonder dat ons daarvoor gevra het.”Die nuus dat ook sy die virus onder lede het, het haar aanvanklik baie swaar getref. Gisteroggend het sy egter besef sy moet dit met alles in haar beveg. “Ek weet nie of ’n mens iewers oor dit kom nie. Wat ek wel vir jou kan sê, is gister (Sondag) het ek ook gedink ek gaan sterf, want dit was alles té veel vir my. Maar vandag is alles orraait. “Ek het vir die kinders gesê: ‘Ons sal nog rou, maar vir nou moet ons net kophou. Ons konsentreer nou om gesond te bly.’”Sy het sedertdien ingetrek in die woonstel op haar gesin se erf, waarin haar ma gewoon het.Haar man het negatief getoets, maar haar oorlede suster se man het óók die virus onder lede.Haar twee kinders en die drie van haar suster is ook intussen getoets en hulle wag nog op die uitslae.Wat verder tot hul hartseer bydra, sê sy, is dat die familie nie mekaar tans kan ondersteun nie. “My suster se man en hul kinders is alleen by hul huis en ons is alleen hier.”Volgens haar het maatskaplike werkers van die dorp Vrydag hul bes gedoen om vir die oorlede suster ’n waardige begrafnis te gee.Wat baie ontstellend is, is hoe die wetstoepassers die begrafnis hanteer het, sê sy.Volgens haar daag die polisie met loeiende sirenes by die begraafplaas op om te verseker die perk op openbare saamtrekke kragtes die noodtoestandregulasies word nie oorskry nie. “Dit is baie onpersoonlik en seer. Dit is belaglik hoe die polisie aangaan; hulle maak asof dit ’n misdaadtoneel is. Hulle jaag; maak geraas; jaag mense weg. Dis baie onpersoonlik en seer.” - denver@republikein.com.naFOTODie pyn van ’n Hardap-familie ken geen einde nie nadat twee lede binne dae weens die siekte dood is. Foto verskaf

Covid-19 verskeur Rehoboth-gesin

Kommentaar

Republikein 2025-12-16

Meld asseblief aan om kommentaar te lewer

Covid-19 verskeur Rehoboth-gesin

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.