Covid-19 looi huishoudings

Denver Kisting – ’n Reusemeerderheid Namibiërs wat aan ’n onlangse studie deelgeneem het – nagenoeg 73% – sukkel om sedert die grendeltydperk hul finansiële verpligtinge na te kom.Boonop het bykans 40% van diegene wat aan die studie deelgeneem het, gesê hulle verwag om binnekort te begin sukkel om kos te koop.’n Totaal van 6% van respondente het aangedui dit sal eersdaags vir hulle onmoontlik wees om kos te koop.Diegene wat aan die begin van die pandemie spaargeld gehad het, het óf reeds daarvan gebruik óf dit reeds uitgeput.Die Covid-19-pandemie het huishoudings op “veelvoudige maniere” gekarnuffel, het die studie bevind.Luidens navorsing wat mnr. Christie Keulder en me. Lizl Stoman van Survey Warehouse namens die Namibiese Werkgewersvereniging (NEF) behartig het, het die pandemie “’n beduidende impak op Namibiese huishoudings gehad”.Volgens van die bevindinge is talle huishoudings se inkomste geraak – enersyds omdat broodwinners hul werke kwyt is en andersyds omdat ander – nagenoeg 36% – se werkure versnipper is.Trouens, waarsku die navorsers, talle huishoudings loop die risiko om binnekort sonder hulpbronne te wees wat hulle sal noop om by diegene na aan hulle aan te klop vir ’n skenking of ’n lening. “Daar is bewyse dat huishoudelike inkomste uit betalings afneem, en dit sal aanhou om af te neem soos huishoudings sukkel om hul normale vlakke van inkomste te behou.”Een van die gevolge van die druk op huishoudings en die gepaardgaande onsekerheid oor die toekoms, volgens die studie, is dat huishoudings hul koopgedrag gewysig het om aan te pas by die verandering in hul inkomste. Huishoudings doen nie net minder inkopies nie, maar koop ook minder kruideniersware wanneer hulle wel winkel toe gaan, lui die studie. “Dit kan erger word in die volgende paar maande soos voedselonsekerheid na verwagting sal toeneem met die aanvang van die plantseisoen in November in landelike gebiede.”Daarnaas sal kospryse na verwagting toeneem weens die ontwrigting in die lewering van goedere wat deur Covid-19 teweeggebring is.Vir baie huishoudings sal dié verhoogde kospryse saamval met hul al hoe minder wordende inkomste, dui die studie aan.Volgens die navorsers verhoog dié faktore die toenemende sielkundige druk waaronder lede van huishoudings gebuk gaan.Die studie is onder die titel “‘We eat fire’ Covid-19 and Namibian Households” uitgegee. - denver@republikein.com.na

Covid-19 looi huishoudings

Kommentaar

Republikein 2025-12-17

Meld asseblief aan om kommentaar te lewer

Covid-19 looi huishoudings

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.