'Covid-19 is in Namibië'

‘Covid-19 is hier’Spaanse egpaar in isolasieGeen planne is nog plek om Namibië se grense te sluit of byeenkomste af te stel nie. Henriette Lamprecht - Die minister van gesondheid en maatskaplike dienste (MoHSS) dr. Kalumbi Shangula het 2 gevalle van Covid-19 in Namibië bevestig. Die bevestigde gevalle is ‘n Spaanse man en vrou in hul dertigs wat Woensdag vanaf Madrid via Doha met Qatar Airways Namibië via die Internasionale Lughawe Hosea Kutako buite Windhoek binnegekom het. Die uitslae van hul toetse vir Covid-19 is gisteraand 21:00 ontvang en die egpaar is tans in isolasie by ‘n private gastehuis in die hoofstad.Volgens Shangula is die twee toeriste soos alle ander passasiers by die lughawe vir veral hoë koors geskandeer en moes hulle ook verpligte vorms oor hul reisplanne invul. Hy sê die egpaar het op die lughawe geen tekens van die siekte getoon en wat koors insluit nie en het ook nie met lughawepersoneel gedeel dat hulle enigsins slegs voel nie.Een van die paartjie het egter dieselfde dag ‘n hoes ontwikkel en het besluit om ‘n private dokter te besoek. Weens hul reisgeskiedenis en land van oorsprong het die dokter besluit om die persoon vir Covid 19 te laat toets. Die toets is na ‘n private laboratorium in die hoofstad gestuur wat dit op sy beurt na die laboratorium van die Nasionale Instituut vir Aanmeldbare Siektes (NICD) in Suid-Afrika vir ontleding gestuur het. Volgens Shangula is die twee Spanjaarde onmiddellik onder kwarantyn geplaas en word alle persone met wie die egpaar in kontak was, nagespoor. Die bevestiging van twee gevalle in Namibië vereis “buitengewone optrede” het die minister gesê en beklemtoon die regering gaan bykomende maatreëls instel om die voorkoms van Covid-19 in die land te beperk en hok te slaan. Hy wou nie sê waar die egpaar hulle tans bevind nie, behalwe om te sê hulle word geïsoleer. Volgens Shangula word hul privaatheid beskerm en word hulle nie in ‘n hospitaal behandel nie. Shangula wou hom ook nie uitlaat oor of die regering enige verbod op buitelandse reisigers se binnekoms gaan plaas of byeenkomste eers gaan aflas nie.“Ons oorweeg sekere maatreëls, maar sal dit eers finaliseer en aankondig as ons die impak en die implikasies daarvan oorweeg het,” het hy gesê.Oor ‘n vraag waarom die virus nie reeds by die lughawe opgetel is nie, het Shangula gesê die egpaar het toe geen tekens of simptome van Covid-19 getoon nie. Hy het beklemtoon die inkubasietydperk vir die virus is twee tot 14 dae.“Enige persoon kan in hierdie tydperk die land binnekom en eers later tekens van die siekte toon.”Hy het beklemtoon die naspoor van alle persone waarmee die egpaar in kontak was, het onmiddellik begin toe hulle positief vir die siekte getoets het en dit gaan voort totdat almal opgespoor is.Shangula wou hom nie uitlaat oor die moontlike kansellering van feesvieringe tydens onafhankliksdag volgende Saterdag nie. “Ons is nog nie op daardie stadium dat ons dit gaan afstel nie, vir nou gaan die feesvieringe voort.”Hy het beklemtoon die siekte word versprei deur besmette druppels wat op oppervlaktes beland, daarom die pleidooi vir voortdurende en voortgesette handewas. Ook het hy ontken dat Covid-19 nie “net wit mense” teiken en beklemtoon dit sien geen “kleur, status of ras” nie. Shangula het weereens ‘n beroep op die publiek gedoen om nie onnodige paniek deur vals inligting te saai nie.“Dit is nou belangriker as ooit om goeie higiëne toe te pas. Was jou hande vir ten minste 30 sekondes as jy in aanranking met enige persoon of buite was. Sorg dat daar ten minste ‘n meter tussen jou en die volgende persoon is.”Die ministerie se uitvoerende direkteur mnr. Ben Nangombe het ook alle gerugte ontken dat die ministerie en ook die regering inligting van die publiek oor Covid-19 weerhou.“Ons steek absoluut niks weg nie. Dis in niemand se belang om dit te doen nie. Hou op om vals inligting te versprei. As dit nie van die ministerie kom en hier bevestig is nie, is dit nie waar nie. Alles wat bevestig is, sal gedeel word,” het Nangombe gesê. – henriette@republikein.com.na

'Covid-19 is in Namibië'

Kommentaar

Republikein 2025-05-15

Meld asseblief aan om kommentaar te lewer

'Covid-19 is in Namibië'

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie