COP26: 'Dis 1 minuut voor middernag'

Ronelle Rademeyer – “Die tyd om iets aan klimaatsverandering te doen, is byna verstreke. Dit is een minuut voor middernag en ons moet nóú optree. As ons nie vandag iets doen nie, sal dit vir ons kinders môre te laat wees om dit te doen.”Só het die Britse premier, Boris Johnson, tydens die opening van die 26ste konferensie (COP26) van die Verenigde Nasies se Raamwerkkonvensie oor Klimaatsverandering (UNGCCC) gister in Glasgow, Skotland, gesê.Die sowat 130 staats- en regeringshoofde kry tot vandag geleentheid om tydens die hoëvlakdeel van COP26 hul nasionale verklarings oor die Kyoto-protokol en Parys-ooreenkoms te lewer.Johnson het 'n beroep op leiers gedoen om die uitdagings te aanvaar om die kwessies oor “steenkool, motors, geld en bome” – sy kenmerkende snelskrif vir die vier prioriteitsareas vir COP26 – te takel.Dit behels die uitfasering van steenkool, die versnelling van die oorgang na elektriese voertuie en die beëindiging van ontbossing, sowel as om klimaatsfinansiering te ontsluit om ontwikkelende lande aan die voorpunt van die klimaatstryd te help.Johnson het aangekondig dat die Verenigde Koninkryk (VK) 'n verdere £1 miljard (N$20,6 miljard) vir klimaatsfinansiering oor die volgende vyf jaar bewillig, wat beteken die VK sal teen 2025 as “wêreldleier” £12,6 miljard (N$260 miljard) vir dié doel gee. Dit is onderhewig daaraan dat die Britse ekonomie groei soos wat voorspel word.Terwyl die staats- en regeringshoofde die breë trekke van die klimaatsplan sal uitstippel, sal regeringsamptenare ná vandag die deurslaggewende fyner besonderhede daarvan uitwerk.“Dit is hoe te werk gegaan is om van die geskiedkundige 2015 Parys-klimaatsooreenkoms 'n sukses te maak,” het die voormalige VN-klimaatsekretaris, Christiana Figueres, aan The Associated Press (AP) gesê.“In Parys is die twee kenmerkende doelwitte, naamlik om verwarming te beperk tot 1,5 grade Celsius en teen 2050 netto koolstofvrystellings van nul te bewerkstellig, geskep deur dié leiers-eerste proses,” het Figueres gesê. Tydens die onsuksesvolle 2009 Kopenhagen-vergadering het die leiers eers aan die einde van die beraad aan die beurt gekom.Onlangse navorsing toon dat selfs al verwarm die aarde met 1,5 °C, die planeet steeds uiterste weer sal ervaar wat menslike lyding sal meebring. Die aarde is tans op koers om tussen 2,2 °C en 2,7 °C warmer te word.Daarom heers groot kommer oor die Chinese president, Xi Jinping, se afwesigheid by COP26. China is die land met die hoogste koolstofvrystellings. Die Russiese president, Wladimir Poetin, is ook nie in Glasgow nie.Verder het die Turkse president, Recep Tayyip Erdogan, ook op die nipper besluit om nie na Glasgow te reis nie, sonder om 'n rede vir die verandering van planne te verskaf.Namibië se pres. Hage Geingob kry vanoggend 'n beurt om Namibië se klimaatsvoorneme voor te hou.Bronne: Nampa/AP, SkyNews– ronelle@republikein.com.naFOTOWetenskaplikes waarsku veldbrande sal toeneem namate die aarde warmer word. Dié foto is buite Grootfontein geneem waar veldbrande onlangs verwoesting gesaai het. Foto Tanja Bause

COP26: 'Dis 1 minuut voor middernag'

Kommentaar

Republikein 2026-05-05

Meld asseblief aan om kommentaar te lewer

COP26: 'Dis 1 minuut voor middernag'

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.