Conradie: Kruisverhoor duur voort

Augetto Graig - Die strafsaak teen die bekende Windhoekse prokureur mnr. Dirk Conradie en sy medebeskuldigde, me. Sara Damases, gaan vandag in hof G van die hoërhof in Windhoek voort. Gister is die dag deur adv. Vas Soni se kruisverhoor van die getuie mnr. Mark Bongers in beslag geneem.Soni verteenwoordig Conradie.Bongers se kruisverhoor het plaasgevind ná die staatsaanklaer, adv. Ed Marondedze, vir Bongers gevra het of Conradie hom en sy vennoot en eggenoot, me. Kim Field, gevra het om van Damases ’n vennoot in hul advertensiemaatskappy DV8 Saatchi en Saatchi te maak.Dít sou na bewering in ruil vir MTC se yslike advertensiekontrak wees, wat destyds meer as N$60 miljoen werd was. Bongers is ook gevra hoe Conradie, wat destyds MTC se raadsvoorsitter was, sou verseker DV8 kry die kontrak. Bongers het gesê Conradie het by ’n vergadering op 22 Junie 2012 verduidelik hoe hy as sleutelbesluitnemer die stemproses sou swaai. Conradie, Damases en Field was glo by dié vergadering teenwoordig.Bongers het die vergadering op band opgeneem en later aan die Teenkorrupsiekommissie (ACC) oorhandig. Marondedze wou ook vasstel hoe kopieë van die opname gemaak is - eers is dit na Bongers se skootrekenaar oorgekopieer, toe na kompakskywe by die ACC-kantoor en toe deur middel van ’n geheuestokkie na ’n transkribeerder om op skrif te stel. Regter Thomas Masuku het Marondedze se vrae kortgeknip oor verskeie transkripsies wat tans van die opname bestaan. Masuku het na die amptelike transkripsie verwys wat die staat reeds Maandag voorgelê het en deur die hof aanvaar is. Om aandag te skenk aan ander weergawes van die transkripsie sou verwarrend wees en die saak verswak, het die regter gesê. Die opname is ook vroeër hardop in die hof gespeel.Soni se ondervraging van Bongers het daartoe gelei dat hy vorige getuienis omgekeer het en ander getuienis bygevoeg het. Dit blyk uit sy getuienis die vergadering was nie so geheim dat Bongers en Field nie vooraf hul mede- DV8-bestuurder, me. Adelie Mudge, daarvan ingelig het nie. Mudge was ook betrokke by die besluit om regsadvies in te win, het Bongers erken. Soni het ook teenstrydighede in mnr. Nelius Becker, ACC-ondersoeker, en die prokureur mnr. Raymond Heathcote, by wie Bongers en Field regsadvies ontvang het, se verklarings uitgewys. Kommunikasie via e-pos met MTC se bestuur is eers deur Bongers ontken en later aanvaar. “Jou getuienis is vol frases soos ‘as jy so sê’, ‘ek skat so’ ensovoorts,” het Soni aan Bongers gestel. “Ek vra die vrae. Jy is hier om daai vrae as getuie te antwoord,” het Soni gesê. Die saak is kort daarna tot vanoggend uitgestel.

Conradie: Kruisverhoor duur voort

Kommentaar

Republikein 2025-12-16

Meld asseblief aan om kommentaar te lewer

Conradie: Kruisverhoor duur voort

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.