Coke stel belang in dagga-drankie

Die wêreld se grootste koeldrankmaatskappy kan dalk die mark vir daggadrankies betree.Die Coca-Cola maatskappy sê hy hou die ontluikende daggabedryf dop en stel belang in cannabidiol (CBD), die bestanddeel van dagga wat nie die brein bedwelm nie.Hy kyk na dié bestanddeel se gebruik in gesondheidsdrankies te midde van ’n dalende vraag na gaskoeldrank.Coke hou samesprekings met Aurora Cannabis, die Kanadese dagga-produsent, om die nuwerwetse drankies te ontwikkel.“Ons hou die groei van nieaktiewe cannabidiol as ’n bestanddeel van die welstandmark dop en sien vinnige ontwikkeling,” sê Kent Landers, ’n woordvoerder vir Coke.Hy het egter bygevoeg dat geen besluite nog geneem is nie en wou nie kommentaar oor ’n moontlike ooreenkoms met Aurora lewer nie.Koeldrankvervaardigers probeer nou om dagga as ’n nuwerwetse bestanddeel van sekere drankies te vestig as ’n teenvoeter vir die stadige verkope van hul tradisionele handelsname.Die vervaardiger van die Corona-handelsmerk, die biermaatskappy Constellation Brands, het onlangs bekend gemaak dat hy sy belang in Canopy Growth, ’n Kanadese daggavervaardiger, met $3,8 miljard verhoog.Molson Coors Brewing begin weer ’n gesamentlike onderneming met Quebec se Hydropothecary Corporation om drankies met daggabestanddele in Kanada te ontwikkel.Diageo PLC, vervaardiger van Guinness-bier, voer samesprekinge met minstens drie Kanadese daggaprodusente oor ’n moontlike transaksie.Heineken NV se Lagunitas-boetiekbier het ’n nuwe handelsmerk van niealkoholiese bier bekend gestel wat met THC, dagga se aktiewe bestanddeel, verryk word.Coke se moontlike toetrede tot die mark vir daggaprodukte wat nie ’n aktiewe sielkundige werking het nie, is deel van ’n wyer diversifikasie. Die maatskappy het onlangs aangekondig dat hy die Costa-koffiewinkelgroep vir $5,1 miljard gekoop het en het onlangs ook na ander produkte soos sap, tee en water uitgebrei. Die maatskappy is tradisioneel bekend om sy gaskoeldranke soos Coca-Cola, Sprite en Tab.Gesondheidsdrankies waarby CBD gevoeg word, maak daarop aanspraak dat hy inflammasie, pyn en krampe verlig.Hoewel dagga steeds op nasionale vlak in die VSA onwettig is, is daar al hoe meer aanvaarding vir die gebruik van CBD om siektetoestande soos chroniese pyn te behandel.In Kanada sal dagga van 17 Oktober vanjaar gewettig word. – Bloomberg/Netwerk24

Coke stel belang in dagga-drankie

Kommentaar

Republikein 2026-05-05

Meld asseblief aan om kommentaar te lewer

Coke stel belang in dagga-drankie

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.