Coe sê atlete het reg om by Spele te betoog

Sebastian Coe, president van Wêreldatletiek, glo atlete moet die reg gegun word om gebare van politieke protes by die Olimpiese Spele te maak.
Dié mening is teenstrydig met die Internasionale Olimpiese Komitee (IOK) se beleid.
Coe het die uitlating gemaak gedurende ’n toer van die nuwe National-stadion in Tokio wat die Spele volgende jaar aanbied.
Die oplewing van die Black Lives Matter-beweging het gelei tot ’n beroep om reël 50 van die Olimpiese Manifes te hersien, wat enige vorm van politieke protes by die Spele verban.
“Ek het dit voorheen duidelik gestel; as ’n atleet op die podium wil kniel, ondersteun ek dit,” sê Coe.
“Atlete maak deel uit van die wêreld en hulle wil die wêreld waarin hulle leef uitbeeld. Dit is vir my heeltemal aanvaarbaar.”
Die IOK het vroeër vanjaar gesê hy bespreek die kwessie met atlete.
Donderdag was die eerste keer wat Coe die stadion besoek het sedert dit in Desember voltooi is.
Die IOK en die Japanse regering het in Maart besluit om die Spele weens die Covid-19-pandemie tot volgende jaar uit te stel.
– Reuters


FOTO
Sebastian Coe vandag by Tokio se National-stadion. Foto Getty Images