Cliven vorder verste in MLR-seisoen

Andrew Poolman – Namibië se vyf gekontrakteerde spelers verbonde aan verskillende spanne in die VSA se Major League Rugby (MLR) kon nie tot komende naweek se eindstryd deurdring nie.Die naaste hieraan was Cliven Loubser, die enigste wat afgelope Sondag in die halfeindronde betrokke was, waar sy Utah Warriors naelskraap met 17-13 (rustyd 7-3) in die tuisstadion van die Los Angeles Giltinis uitgeskakel is.Dié wedstryd was die finaal van die MLR se westelike konferensie – 'n verdeling wat op grond van die VSA se uitgestrektheid en verskillende tydsones gedoen word.Soos elke ander groot professionele liga het elke beroepsklub die beste moontlike talent vanoor die wêreld versamel. Hierdie internasionale vernuf en ondervinding verseker dat elke kragmeting uiters kompeterend is en toeskouers het die wedstryde ook ywerig ondersteun.Die LA Giltinis, met sterre soos die voormalige Wallabies Adam Ashley-Cooper en Matt Giteau en die Kanadese vleuel DTH van der Merwe in sy geledere, sal komende Sondag die tuisvoordeel hê vir die MLR-eindstryd teen Rugby Atlanta (wenners van die oostelike konferensie, ná laas naweek se sege met 10-9 teen Rugby United New York).Loubser, die Namibiese toetslosskakel, het die semifinaal op die reserwebank begin en is vir die laaste 35 minute opgestuur. Hy is hierdie seisoen dikwels as heelagter ingespan, omdat die Warriors ook oor Duitsland se nasionale losskakel Hagen Schulte as sy voorkeur-stelskopper beskik.Volgens die statistiekblad Itsrugby het die 24-jarige Namibiër 503 minute in agt wedstryde gespeel (vyf in beginspan). Sy puntebydrae van 14 het twee drieë ingesluit.In die middelste gedeelte van die seisoen het Loubser egter bykans twee maande met 'n besering op die kantlyn deurgebring.• Die skrumskakel Damian Stevens se span, die New Orleans Gold, het in die oostelike konferensie sterk geëindig (derde) met tien oorwinnings en een gelykopuitslag.In hul laaste groepwedstryd het NOLA Gold, soos hulle ook bekend staan, 'n swaarverdiende oorwinning met 35-32 as besoekende span teen Rugby United New York behaal. Die New Yorkers het vooraf egter net 'n enkele ligapunt nodig gehad om hul tweede posisie en plek in die semifinaal veilig te maak.Volgens Itsrugby het Stevens in die afgelope seisoen 629 minute vir NOLA Gold gespeel en was in elk van hul 16 ligawedstryde betrokke (vyf in beginspan). Hy het 32 punte aangeteken, wat uit een drie, vyf strafdoele en ses doelskoppe bestaan.• Dit is reeds bekend dat die Namibiese flank Wian Conradie se hardwerkende vertonings vir die New Engeland Free Jacks intussen sodanig raakgesien is dat hy 'n kontrak beklink het om by die Engelse premierligaspan Gloucester aan te sluit.Volgens Itsrugby het Conradie verreweg meer speeltyd as enige van sy Namibiese landgenote gekry – 1 131 minute in 15 wedstryde, waarvan 14 in die opdrafspan was. Conradie het die seisoen met vier drieë afgesluit, hoewel veral sy algemene inklimspel op aanval en verdediging 'n groot bydrae gelewer het tot die span wat vierde in die oostelike konferensie met 48 punte (ná Atlanta met 57, New York met 53 en NOLA Gold met 51) klaargemaak het.WESTELIKE KONFERENSIEAdriaan Booysen se Houston SaberCats het gesukkel en het 14 wedstryde verloor en die minste wedstryde van enige MLR-span gewen (twee). Hulle was laaste van die ses spanne in die westelike konferensie.Booysen was in elkeen van die 16 wedstryde betrokke (agt in die beginspan) en het 797 minute opgestapel, volgens Itsrugby. Die stewig geboude agtsteman het drie drieë gedruk.• Die haker Obert Nortje het relatief min speelkans by die Seattle Seawolves gekry – ses wedstryde, waarvan vyf van die bank af, vir 'n totaal van 142 minute.Die Seawolves, afgerig deur die voormalige Namibiese Wêreldbeker-kaptein en stut Kees Lensing, kon nie hul suksesse van 2018 en 2019 herhaal, toe hulle die nasionale kampioenklub was nie. Die afgelope seisoen kon hulle maar net vyfde in hul konferensie klaarmaak, met vier gewen en 14 verloor.Nortje en Booysen was die enigste van die vyftal wat in Juniemaand die Namibiese toer na Ivoorkus meegemaak het. Die nasionale span het ondanks 'n blouoog op die eerste wedstryddag teen die gasheerspan reggeruk en vir Madagaskar geklop. Dié uitslag het verseker dat Namibië volgende jaar sy plek sal inneem in Rugby Afrika se Top Agt-toernooi waar die vasteland se verteenwoordiger by die 2023 Wêreldbeker in Frankryk bepaal sal word.– andrew@republikein.com.naFOTO’sAdriaan Booysen was in sy tweede seisoen by die Houston SaberCats ’n staatmaker. Foto FacebookDie plakkaatfoto waarmee die Utah Warriors hul verkryging van losskakel Cliven Loubser aangekondig het.Skrumskakel Damian Stevens het hom ingeburger by die New Orleans Gold en elke wedstryd gespeel.Sommige ondersteuners van die Seattle Seawolves het op sosiale media gesê hulle sou graag meer speeltyd van die woelige Namibiese haker Obert Nortje wou sien.Kees Lensing, stut vir die Blou Bulle en twee Namibiese Wêreldbekerspanne, is sedert 2019 die afrigter van die Seattle Seawolves. Foto TwitterWian Conradie was ’n dryfveer vir die New England Free Jack. Foto Getty Images

Cliven vorder verste in MLR-seisoen

Kommentaar

Republikein 2025-12-16

Meld asseblief aan om kommentaar te lewer

Cliven vorder verste in MLR-seisoen

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.