China, VSA glo gereed om groen lig vir biertroue te gee
Hanlie Stadler
China en die VSA staan glo op die punt om Anheuser-Busch InBev (AB InBev) se verkryging van SABMiller goed te keur.
Dit beteken dat die enorme transaksie, wat nagenoeg US$107 miljard werd is en die einde van SABMiller as maatskappy sal beteken, moontlik teen einde Junie in drie deurslaggewende markte – ook Suid-Afrika – die groen lig sal hê. Dit is reeds in die Europese Unie en ’n dosyn ander lande soos Namibië goedgekeur.
AB InBev staan ook op die punt om goedkeuring te kry van Suid-Afrika se Mededingingstribunaal, wat van 22 tot 24 Junie sittings hou om oor die Mededingingskommissie se aanbevelings te beslis.
Die kommissie se streng voorwaardes – onder meer dat geen Suid-Afrikaanse SABMiller-werknemers weens die samesmelting hul werk mag verloor nie en dat ’n fonds van R1 miljard vir die ontwikkeling van boere en ander plaaslike verskaffers opgestel moet word – is dié wat AB InBev reeds met die regering beding het.
Vakbonde gaan na verwagting die verkryging teenstaan.
China se mededingingsowerhede is meer geneë om die transaksie goed te keur nadat AB InBev reeds vroeër ’n transaksie beklink het om van Snow-bier ontslae te raak.
SABMiller se 49%-belang in dié bier – die een waarvan die meeste ter wêreld verkoop word – is reeds maande gelede aan die ander vennoot, die staatsbeheerde China Resources Beer, belowe.
Soos met al die biere wat uit SABMiller se krat spat, is die verkoop van Snow op voorwaarde dat AB InBev wel vir SABMiller insluk.
Bloomberg berig goedkeuring in China word voor die einde van Junie verwag.
Benewens die voorwaarde dat Snow verkoop word, word geen ander moeilike voorwaarde uit China verwag nie. Chinese brouerye het aan die ministerie van handel gesê hulle reken nie dat dit ’n groot impak op die plaaslike bierbedryf sal hê nie.
In die VSA moet die departement van justisie die besluit neem, wat ook teen einde Junie verwag word.
SABMiller se 51%-belang in MillerCoors is reeds belowe aan sy vennoot, Molson Coors, om owerhede te paai. Verdere voorwaardes oor die verspreiding van bier gaan na verwagting gestel word.
Die AB InBev-verkryging van SABMiller kan dus moontlik wel in die derde kwartaal deurgevoer word, soos aanvanklik voorsien is, of minstens voor die einde van die jaar. - Netwerk24/Bloomberg
China en die VSA staan glo op die punt om Anheuser-Busch InBev (AB InBev) se verkryging van SABMiller goed te keur.
Dit beteken dat die enorme transaksie, wat nagenoeg US$107 miljard werd is en die einde van SABMiller as maatskappy sal beteken, moontlik teen einde Junie in drie deurslaggewende markte – ook Suid-Afrika – die groen lig sal hê. Dit is reeds in die Europese Unie en ’n dosyn ander lande soos Namibië goedgekeur.
AB InBev staan ook op die punt om goedkeuring te kry van Suid-Afrika se Mededingingstribunaal, wat van 22 tot 24 Junie sittings hou om oor die Mededingingskommissie se aanbevelings te beslis.
Die kommissie se streng voorwaardes – onder meer dat geen Suid-Afrikaanse SABMiller-werknemers weens die samesmelting hul werk mag verloor nie en dat ’n fonds van R1 miljard vir die ontwikkeling van boere en ander plaaslike verskaffers opgestel moet word – is dié wat AB InBev reeds met die regering beding het.
Vakbonde gaan na verwagting die verkryging teenstaan.
China se mededingingsowerhede is meer geneë om die transaksie goed te keur nadat AB InBev reeds vroeër ’n transaksie beklink het om van Snow-bier ontslae te raak.
SABMiller se 49%-belang in dié bier – die een waarvan die meeste ter wêreld verkoop word – is reeds maande gelede aan die ander vennoot, die staatsbeheerde China Resources Beer, belowe.
Soos met al die biere wat uit SABMiller se krat spat, is die verkoop van Snow op voorwaarde dat AB InBev wel vir SABMiller insluk.
Bloomberg berig goedkeuring in China word voor die einde van Junie verwag.
Benewens die voorwaarde dat Snow verkoop word, word geen ander moeilike voorwaarde uit China verwag nie. Chinese brouerye het aan die ministerie van handel gesê hulle reken nie dat dit ’n groot impak op die plaaslike bierbedryf sal hê nie.
In die VSA moet die departement van justisie die besluit neem, wat ook teen einde Junie verwag word.
SABMiller se 51%-belang in MillerCoors is reeds belowe aan sy vennoot, Molson Coors, om owerhede te paai. Verdere voorwaardes oor die verspreiding van bier gaan na verwagting gestel word.
Die AB InBev-verkryging van SABMiller kan dus moontlik wel in die derde kwartaal deurgevoer word, soos aanvanklik voorsien is, of minstens voor die einde van die jaar. - Netwerk24/Bloomberg
Kommentaar
Republikein
Geen kommentaar is op hierdie artikel gelaat nie