China se Rooikruis skenk geld vir droogtehulp

Catherine Sasman - Die Chinese ambassadeur in Namibië, mnr. Zhang Yiming, het gister bekend gemaak dat die Rooikruisvereniging in China US$150 000 in kontant aan Namibië gaan gee om vir humanitêre noodleniging tydens die droogte te gebruik.

Hy sê die geld sal so spoedig as moontlik aan die kantoor van die eerste minister betaal word.

“Ons bepaal nog die droogtesituasie regdeur die land. China oorweeg verdere bystand, moontlik voedselhulp, sodra die opname voltooi is,” het hy gesê.

Yiming het ook gesê oudpres. Sam Nujoma het die Chinese regering versoek om die planne vir ‘n ontsoutingsaanleg te bespoedig om die droogtenood te help verlig.

Volgens hom het Chinese finansiële instellings soos die China-Afrika-ontwikkelingsfonds (CADF) deur die ministerie van landbou, water en bosbou hulp aangebied om die regering in die nabye toekoms met die oprigting van nuwe ontsoutingsaanlegte te help.