Caprivi-vrygespreekte hoor uitspraak

Jacqueline Louw - Waarnemende regter Philanda Christiaan het Vrydag agter geslote deure in die Windhoek-hoërhof uitspraak gegee in die saak waarin mnr. Rosco Matengu Makapa, 'n vrygespreekte in die Caprivi-hoogverraadverhoor, miljoene van die staat eis vir skadevergoeding vir sy aanhouding van meer as 13 jaar.Makapa het die minister van veiligheid en sekuriteit, die aanklaer-generaal en die regering vir N$30,4 miljoen gedagvaar vir die tydperk wat hy in die tronk deurgebring het voordat hy in Februarie 2013 onskuldig bevind is in die hoogverraadverhoor. Christiaan het Makapa se eis teen die minister van veiligheid en sekuriteit vir kwaadwillige vervolging sowel as sy eis teen die aanklaer-generaal vir die instelling van strafregtelike verrigtinge teen hom van die hand gewys. Sy alternatiewe eis vir die kwaadwillige voortsetting van sy vervolging sonder redelike en waarskynlike gronde is wel gehandhaaf. Die regter het beslis dat die koste van die aansoek deur die aanklaer-generaal en die regering betaal moet word.Die eiser, 'n voormalige onderwyser, is op 29 Augustus 1999 in hegtenis geneem en aangehou op klagte van hoogverraad, rebellie en moord vir sy beweerde aandeel in die aanval deur die Caprivi Bevrydingsmag in Katima Mulilo in die voormalige Caprivistreek met die doel om dié streek van Namibië af te stig. Ná 'n ongewone lang verhoor is hy op 11 Februarie 2013 vrygelaat toe regter Elton Hoff bevind het “daar is tans geen getuienis wat die beskuldigde impliseer in die pleeg van enige oortreding nie”.Regter Christiaan het in haar uitspraak gesê: “Hierdie saak het nuwe en komplekse kwessies opgelewer, waarvan sommige nog nooit deur ons howe beslis is nie.” Een van hierdie kwessies is of die voortsetting van vervolging wanneer daar nie meer redelike en waarskynlike gronde daarvoor is nie, op kwaadwillige vervolging neerkom.Makapa beweer dat sy voortgesette vervolging ná 9 September 2008, toe al die getuies reeds hul getuienis gelewer het wat hom moontlik kon impliseer, onregmatig en kwaadwillig was.Die aanklaer-generaal se saak was dat sy nie Makapa se vervolging kon beëindig of die staat se saak teen hom in daardie stadium kon sluit nie omdat sy nie geweet het of al die getuienis wat hom kon impliseer, reeds gelewer was nie. Daar is namens die aanklaer-generaal betoog dat hul werknemers nie gedurende die hoogverraadverhoor die getuienis deurlopend kon beoordeel nie, omdat dit menslik onmoontlik was, gesien die groot getal getuies en beskuldigdes wat getuig het.Die regter het tot die gevolgtrekking gekom dat die “eiser 'n handhaafbare saak vir skadevergoeding uitgemaak het ten opsigte van die onwettige voortsetting van die strafregtelike verrigtinge teen hom”.Die saak sal op 28 Mei agter geslote deur aangehoor word vir reëlings vir die voortsetting van die saak ten opsigte van die omvang van die skadevergoedingseis.Makapa is deur senior advokaat Andrew Corbett verteenwoordig terwyl senior advokaat Ishmael Semenya en mnr. Nixon Marcus namens die verweerders opgetree het.

Caprivi-vrygespreekte hoor uitspraak

Kommentaar

Republikein 2025-06-18

Meld asseblief aan om kommentaar te lewer

Caprivi-vrygespreekte hoor uitspraak

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie