Capricorn steel kollig op plaaslike indeks

Jo-Maré Duddy - Benewens dat Capricorn Investment Group verlede week die grootste nuusmaker op die Namibiese aandelebeurs (NSX) was, het dit ook vir die grootste verhandeling op die plaaslike indeks gesorg.Meer as N$65,09 miljoen se Capricorn-aandele is verlede Maandag teen N$17,57 stuk van die hand gesit – 1c stuk laer as dié groep se sluitingsprys die vorige Vrydag, 17 Maart. In totaal het Capricorn verlede week sowat N$66,45 miljoen se verhandeling aangeteken, bykans 98% van die plaaslike indeks se totale weekverhandeling van meer as N$67,9 miljoen. Capricorn het Vrydag op N$17,56 per aandeel geëindig, 2c stuk of 0,1% laer as die vorige week.Capricorn het Vrydag aangekondig dat die regering se pensioenfonds (GIPF) van voorneme is om 25% van sy gewone uitgereikte aandele te bekom. Dié transaksie, wat nog deur die betrokke regulatoriese owerhede goedgekeur moet word, is meer as N$2 miljard werd.Intussen het PSG Namibia in sy volledige ontleding van Capricorn se halfjaarresultate tot einde Desember 2016 sy aanbeveling vir dié groep se aandele onveranderd op “koop” gelaat. PSG het egter sy teikenprys vir Capricorn vir die volgende 12 maande van N$20,78 per aandeel tot N$20,49 stuk verlaag.PSG meen Capricorn se groeisyfers in sy jongste halfjaar voldoen nie aan beleggersverwagtinge nie, selfs al word dit aan die verlangsaming van die Namibiese ekonomie gemeet. Die groep se sterk balansstaat met sy lae wanpresterende lenings (NPL's) en meer as voldoende kapitaal is egter gerusstellend, sê dié ontleders.NamBrew, FNB, BidvestDie enigste ander maatskappye op die plaaslike indeks wat verlede week sake gedoen het, was Namibia Breweries Ltd, Bidvest Namibia Ltd en FNB Namibia Holdings. Bykans N$1,15 miljoen NamBrew-aandele het van hande verwissel. Die groep het Vrydag op N$33,60 per aandeel gesluit, dieselfde as die vorige week.Namibia Equity Brokers (NEB) het gister in sy ontleding van NamBrew se jongste halfjaarresultate tot einde Desember sy aanbeveling vir dié groep op “hou” gelaat. NEB se teikenprys vir NamBrew se 2017-boekjaar is N$29,40 per aandeel.Altesaam N$355 411 Bidvest-aandele is verlede week verhandel. Bidvest se sluitingsprys vir verlede week was N$7,79 per aandeel, dieselfde as die vorige week.NEB het verlede week sy ontleding van Bidvest se halfjaarvertoning tot einde Desember 2016 vrygestel. Dié resultate, deurspek van rooi syfers, het NEB op dié titel van sy ontleding laat besluit: “Blood on the floor”.NEB het sy aanbeveling vir Bidvest-aandele van “hou” tot “verkoop” verlaag. Dié ontleders se teikenprys vir Bidvest se 2017-boekjaar is N$10,31 per aandeel. NEB wys egter daarop dat dié teikenprys vroeër bepaal is toe hy nog 'n “positiewe vooruitsig” vir Bidvest gehad het.FNB Namibia het Vrydag gesê regulatoriese owerhede het die transaksie goedgekeur ingevolge waarvan dié groep 100% van EBank en Pointbreak bekom. Dié transaksie word Vrydag van krag.Altesaam N$12 787 FNB-aandele is verlede week verhandel. Dié groep het Vrydag op N$47,36 per aandeel gesluit, dieselfde as die vorige week.

Capricorn steel kollig op plaaslike indeks

Kommentaar

Republikein 2025-08-04

Meld asseblief aan om kommentaar te lewer

Capricorn steel kollig op plaaslike indeks

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie