Canjulo toon opwaartse kurwe

Tielman van Lill – Die 15-jarige José Canjulo van Namibië het verlede naweek in Pretoria op uitnodiging van Northern Tigers-swemklub (NTS) by die Hillcrest-swembad aan hul Prestige-langbadgala deelgeneem.Hy oefen en studeer tans in Suid-Afrika aan die TuksSport Hoërskool onder die wakende oog van Rocco Meiring, sy afrigter, om sy swem te verbeter. Sy vertonings met twee Namibiese rekords in die 15 tot 16 jaar ouderdomsgroep is beslis merkwaardig. Hy het die 50 borsslag in 30.14 sekondes en 50 rugslag in 27.16 s gewen – wat beide nou ook as byeenkomsrekords staan. Dit was aansienlik vinniger as die vorige beste tye van 30.62 (2018, Jacque Malan) en 28.75 (2018, Ethan Spieker).Canjulo het aan Republikein gesê: “Ek was beslis onkant gevang deur my tye in die 50 borsslag en rugslag. Ek het dit nie verwag nie. Ek wou maar net pret met die gala gehad het en ondervinding opgedoen het.“Ons is tans besig met ’n strawwe oefenprogram, dus is my lyf bietjie moeg en nie in topkondisie vir ’n kompetisie nie. Ek is bly oor die twee rekords, maar daar lê ’n lang pad en nog baie verbetering vir my voor.”Canjulo sê sy korttermyndoelwit is om ’n junior wêreldrekord te behaal. As senior wil hy aan die wêreldkampioenskap deelneem en dalk ’n rekord of twee laat spat. By die Olimpiese Spele droom hy van ’n podiumposisie. Sy ander uitslae:200 individuele wisselslag: tweede in 2:16.41. 50 vlinderslag: derde in 26.57. 100 vlinderslag: derde in 59.86. In goeie hande: Rocco Meiring is die afrigter van Tatjana Schoenmaker, die Suid-Afrikaanse 2020 Olimpiese 200 m-borsslagkampioen. Sy is die Olimpiese én wêreldrekordhouer in dié item met 2 minute 18.95 sekondes. Schoenmaker het ook silwer in Tokio in die 100 borsslag opgeraap.Canjulo se volgende kompetisie is van 16 tot 21 Desember by die NTS-kampioenskap by dieselfde venue.

Canjulo toon opwaartse kurwe

Kommentaar

Republikein 2025-05-23

Meld asseblief aan om kommentaar te lewer

Canjulo toon opwaartse kurwe

Kommentaar

Republikein 2025-05-23

Meld asseblief aan om kommentaar te lewer

MELD AAN

Advertensie