Cameron is uit, May is in
Politici is taamlik onkant betrap deur die skielike onttrekking van Andrea Leadsom as kandidaat vir die leierskap van die Konserwatiewe Party in Brittanje.
Haar enigste teenstander, Theresa May, was skielik die enigste kandidaat vir Cameron se pos en hy is by ’n lugskou weggeroep om die situasie te hanteer.
Die uiteinde was dat Cameron gister sy swanesang as premier in die Britse Laerhuis gesing het en toe sy bedanking by die paleis ingedien het. Ná die Brexit-referendum was die plan dat hy in Oktober sou uittree.
Maandag is May (59) as leier van die Konserwatiewe Partye aangewys en vandag word sy premier.
As Leadsom nie onttrek het nie, kon die opvolgerkwessie tot September gesloer het wanneer die Konserwatiewes tussen haar en May sou moes gekies het.
In die onseker tyd nadat Brittanje ’n paar weke gelede gestem het om die Europese Unie (EU) te verlaat, is stabiliteit en sekerheid bitter nodig.
Omdraai is ook nie ’n opsie nie. Brexit beteken Brexit, sê May.
“Die land het gestem om die Europese Unie te verlaat en as eerste minister sal ek seker maak dat ons die Europese Unie verlaat,” het sy gister gesê.
“En ons gaan ’n sukses daarvan maak.”
Daar sal geen poging aangewend word om in die EU te bly nie of om deur die agterdeur weer by die EU aan te sluit nie. ’n Tweede referendum is ook buite die kwessie.
Brittanje moet nou vir hom ’n nuwe bedeling in die wêreld beding en sy belange beskerm terwyl hy die naelstring met die EU knip.
Britte gaan groter beheer oor hul lewe kry, sê May, en die land moet ’n beter plek vir almal word, nie net die bevoordeelde handvol nie.
May word gereken as ’n ystervrou, maar nie van die Maggie Thatcher-skool nie.
Byna tweederdes van die Tories het haar kandidatuur gesteun, al het sy geweier om die draadsitters met ’n werkaanbod oor te haal.
Daar word gesê moraliteit lei haar eerder as ideologie en ook dat sy onbehoorlike, slordige en selfsugtige optrede in die staatsdiens en ongeregtigheid met haar hele wese verafsku.
’n “Bloody difficult woman”, sê die Tory Ken Clarke.
Leadsom, aan die ander kant, was nie daarteen opgewasse nie toe joernaliste en kollegas haar uitgetrap het omdat sy gesê het moederskap gee haar ’n voorsprong op die kinderlose May. Sy erken sy was in trane omdat soveel van haar kollegas gesê het sy is onsensitief en duidelik onervare.
In haar uittredetoespraak het sy gesê sy doen dit in die belang van die land, want sakelui het sekerheid nodig ná die Brexit-referendum.
’n Groep hekelaars het geskreeu: “Nog ’n Brexiteer verlaat die misdaadtoneel!”
Die druk het Maandag al begin opbou dat May ’n vroeë verkiesing uitroep, maar sy het haar party belowe sy sal nie so iets doen nie. - Netwerk24/The Guardian/Sky News/BBC.com
Haar enigste teenstander, Theresa May, was skielik die enigste kandidaat vir Cameron se pos en hy is by ’n lugskou weggeroep om die situasie te hanteer.
Die uiteinde was dat Cameron gister sy swanesang as premier in die Britse Laerhuis gesing het en toe sy bedanking by die paleis ingedien het. Ná die Brexit-referendum was die plan dat hy in Oktober sou uittree.
Maandag is May (59) as leier van die Konserwatiewe Partye aangewys en vandag word sy premier.
As Leadsom nie onttrek het nie, kon die opvolgerkwessie tot September gesloer het wanneer die Konserwatiewes tussen haar en May sou moes gekies het.
In die onseker tyd nadat Brittanje ’n paar weke gelede gestem het om die Europese Unie (EU) te verlaat, is stabiliteit en sekerheid bitter nodig.
Omdraai is ook nie ’n opsie nie. Brexit beteken Brexit, sê May.
“Die land het gestem om die Europese Unie te verlaat en as eerste minister sal ek seker maak dat ons die Europese Unie verlaat,” het sy gister gesê.
“En ons gaan ’n sukses daarvan maak.”
Daar sal geen poging aangewend word om in die EU te bly nie of om deur die agterdeur weer by die EU aan te sluit nie. ’n Tweede referendum is ook buite die kwessie.
Brittanje moet nou vir hom ’n nuwe bedeling in die wêreld beding en sy belange beskerm terwyl hy die naelstring met die EU knip.
Britte gaan groter beheer oor hul lewe kry, sê May, en die land moet ’n beter plek vir almal word, nie net die bevoordeelde handvol nie.
May word gereken as ’n ystervrou, maar nie van die Maggie Thatcher-skool nie.
Byna tweederdes van die Tories het haar kandidatuur gesteun, al het sy geweier om die draadsitters met ’n werkaanbod oor te haal.
Daar word gesê moraliteit lei haar eerder as ideologie en ook dat sy onbehoorlike, slordige en selfsugtige optrede in die staatsdiens en ongeregtigheid met haar hele wese verafsku.
’n “Bloody difficult woman”, sê die Tory Ken Clarke.
Leadsom, aan die ander kant, was nie daarteen opgewasse nie toe joernaliste en kollegas haar uitgetrap het omdat sy gesê het moederskap gee haar ’n voorsprong op die kinderlose May. Sy erken sy was in trane omdat soveel van haar kollegas gesê het sy is onsensitief en duidelik onervare.
In haar uittredetoespraak het sy gesê sy doen dit in die belang van die land, want sakelui het sekerheid nodig ná die Brexit-referendum.
’n Groep hekelaars het geskreeu: “Nog ’n Brexiteer verlaat die misdaadtoneel!”
Die druk het Maandag al begin opbou dat May ’n vroeë verkiesing uitroep, maar sy het haar party belowe sy sal nie so iets doen nie. - Netwerk24/The Guardian/Sky News/BBC.com
Kommentaar
Republikein
Geen kommentaar is op hierdie artikel gelaat nie