Cabous en Diana gaan speel Doer Onder

Cabous Olivier en Diana Viljoen vertrek vandeesweek na Adelaide in Australië om Namibië by die Kampioen van Kampioene Wêreldenkelspeltoernooi te verteenwoordig.Die duo begin reis Donderdag om aan dié jaarlikse kompetisie deel te neem wat vanjaar in die suide van Australië aangebied word. Die wêreldkampioenskap was ook in 2013 by die Adelaide-rolbalklub gehou en vanjaar se makietie vanaf 28 Oktober tot 3 November sal die grootste sedert 2013 wees.Die kompetisie vir mans en vroue sal op 'n rondomtaliegrondslag gespeel word waar die spelers in twee groepe verdeel is. Die wenner van elke groep sal na die semifinaal vorder. Die tweede en derde posisies van elke groep sal lootjies trek om te bepaal wie mekaar vir die laaste twee plekke in semifinaal gaan pak.Die gewone enkelspelreëls waar die speler wen wat eerste 21 punte behaal het, sal nie gebruik word nie. Elke wedstryd sal met twee stelle van nege ente gespeel word. Indien beide deelnemers 'n stel inpalm, sal hulle 'n valbylpot met drie ente speel. Die speler wat die meeste skote in die valbylpot behaal, is die wenner.Vanjaar neem 26 lande in die mansafdeling deel, wat 13 per groep is. Dus sal Olivier 12 wedstryde in vyf dae speel. By die vroue stuur 21 lande hul beste individu in die enkelspel. Viljoen, wat in die groep met elf lande geplaas is, sal tien wedstryde in dieselfde tydperk moet kafdraf.Olivier, die Walvisbaaier van die Namibpark-rolbalklub, het sy land reeds twee jaar gelede vir die eerste keer by dieselfde kampioenskap in Nieu-Suid-Wallis, Australië, verteenwoordig. Olivier wat toe nog 'n relatief onervare skoolseun was, eindig toe sewende in sy groep by die St. John's Park-rolbalklub, wat inderdaad 'n puik prestasie is.Olivier voel egter meer gereed vir die aksie in die land Doer Onder.“Twee jaar gelede het ek nie verwag om enigsins te presteer nie, maar nou is dit 'n heel ander storie. Ek is reg vir die kampioenskap en mik beslis om die wêreldgoud op te raap.“Ek gaan om die spel te geniet en goeie rolbal te speel. My strewe is om elke eerste stel in te palm en die druk vroeg en vierkantig op my teenstander te plaas,” het hy vertel.Viljoen, wat vir die Rössmund-klub buite Swakopmund speel, het reeds vyf kere vir dié elite geleentheid gekwalifiseer. Weens die tekort aan geld kon sy egter net in 2010 op die Norfolk-eiland kompeteer.Viljoen is vanjaar bevoorreg om me. Bianca Lewis, haar suster, as bestuurder saam te neem. Viljoen sê met haar suster byderhand om na ander belange om te sien, kan sy op haar spel konsentreer.“Dit is die beste besluit ooit. Op dié manier kry ek morele ondersteuning van haar kant én sy kan na die reëlings omsien terwyl ek my bes op die baan lewer. “Ek het nie 'n definitiewe wedstrydplan nie. Ek sal elke stel op meriete beoordeel en daarvolgens planne beraam om die valbylpotte vry te spring.“Die mans en vroue wat in Australië gaan meeding, is hul onderskeie lande se enkelspelkampioene. Dus sal die kompetisie baie straf wees,” het sy verduidelik.'n Kinkel teen die Namibiërs is die tipe bal wat in Australië gebruik word. Die bane daar is geweldig vinnig en spelers moet 'n smaller weergawe gebruik en moet ook eers die nuwe tegniek bemeester.Viljoen sê sy word nie weer geflous nie en het reeds haar nuwe stel balle aangekoop wat in Australië vir haar wag.“Ek is voorbereid, want ek het die afgelope paar jaar as speler baie gegroei en is geestelik reg vir die kampioenskap,” het sy afgesluit.Mnr. Ewald Vermeulen, president van die Namibië Rolbalvereniging, het die spelers sterkte toegewens. “Ons bid vir julle 'n veilige reis toe. Ons weet julle sal ons trots maak,” het hy gesê.

Cabous en Diana gaan speel Doer Onder

Kommentaar

Republikein 2026-02-02

Meld asseblief aan om kommentaar te lewer

Cabous en Diana gaan speel Doer Onder

Kommentaar

Republikein 2026-02-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.