Bylmoordenaars gaan vir 39 jaar sit

Jacqueline Louw - Riaan Khaxab (38) en Hans Kamberipa (36) is Vrydag in die hoërhof in Windhoek deur regter Dinnah Usiku elk 24 jaar gevangenisstraf vir moord, 12 jaar vir roof, drie jaar vir dwarsboming van die gereg, drie jaar vir die onwettige besit van ’n vuurwapen en drie jaar vir die onwettige besit van ammunisie gevonnis.Die vonnis vir die twee mans wat skuldig bevind is aan die moord op die 73-jarige mnr. Ernst Cloete, sou altesaam 45 jaar agter tralies vir elkeen beteken het. Die regter het egter beveel dat die vonnis vir dwarsboming van die gereg saam met die vonnis vir roof uitgedien sal word en die vonnis vir die onwettige besit van ammunisie saam met die vonnis vir die onwettige besit van ’n vuurwapen, wat beteken dat hulle elk 39 jaar gevangenisstraf sal uitdien.Hoewel Kamberipa gedurende die verhoor aangevoer het dat hy nie aan die misdaad aandadig was nie en dat sy enigste sonde was dat hy homself met die misdaad verbind het, het regter Usiku bevind dat Khaxab nie alleen vir Cloete kon oorrompel en sy liggaam in die bosse kon versteek het nie.“Alles dui daarop dat die beskuldigdes saam opgetree het in die aanval en moord op die oorledene,” het sy in haar uitspraak gesê.Die regter het ook genoem dat die vorige vonnisse wat Khaxab en Kamberipa uitgedien het geensins tot hul rehabilitasie gelei het nie, want hulle het voortgegaan om selfs ernstiger misdade te pleeg.“Die hof is verplig om ’n duidelike en ondubbelsinnige boodskap aan die samelewing te stuur dat sulke gedrag nie geduld of verskoon sal word nie,” het sy verder gesê.Die twee mans het Cloete op 28 November 2011 met ’n byl doodgekap en sy lyk onder bosse versteek. Hulle het hom daarna van sy beursie, ’n .270 SAKO-geweer, 30 skape, drie boerbokke, ’n tou en ’n Samsung-selfoon beroof.Kamberipa het in sy getuienis gedurende die verhoor erken dat die twee ’n plaas betree het en skape en bokke gevind het, wat hulle toe in die rigting van Rehoboth aangejaag het. Terwyl hulle besig was, het hulle Cloete se voertuig ’n ent verder gesien. Dit was die staat se saak dat hulle agter bosse weggekruip het voordat hulle Cloete met ’n byl aangeval het, sy hande en voete vasgebind het en met struike bedek het.Adv. Cliff Lutibezi het namens die staat opgetree terwyl Khaxab en Kamberipa deur mnre. Brownell Uirab en Mese Tjituri onderskeidelik verteenwoordig is.

Bylmoordenaars gaan vir 39 jaar sit

Kommentaar

Republikein 2026-08-03

Meld asseblief aan om kommentaar te lewer

Bylmoordenaars gaan vir 39 jaar sit

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.