Bulle wen met bonuspunt in Laeveld
Rugby
Marnus Kok – Ná 'n effense stadige begin het die Bulle gister laat vlamgevat om 'n begeesterde Pumas in 'n rugbywedstryd in die Curriebeker-reeks in Mbombela te klop.
Die Pretorianers het vier drieë gedruk om met 33-26 te wen en het boonop 'n bonuspunt ingesamel.
Die tuisspan het met 'n knal begin toe Niel Otto (flank) vir 'n drie oorgeduik het. Niel Marais (losskakel) het verdoel en kort daarna drie punte met 'n strafdoel bygevoeg. Dit het die telling 10-0 in die Laevelders se guns gemaak.
Dit was egter nie lank nie, toe gaan druk eers Schalk Erasmus (haker) en kort daarna Stravino Jacobs (vleuel) vir die Bulle.
Oomblikke voordat die fluitjie vir rustyd geblaas het, het Eddie Fouché, plaasvervangerlosskakel van die Pumas, 'n strafdoel deur die pale gejaag. Dit het die telling teen rustyd 16-14 in die tuisspan se guns gemaak.
Die eerste helfte het gewis aan die tuisspan behoort. Hulle het die bal sterk gedra met spelers soos Phumzile Maqondwana (agtsteman), Otto en Morgan Naudé (stut) wat die Pretorianers moes laat verdedig vir die vale.
Met balbesit op die voorvoet, het die Pumas se agterspelers 'n paar goeie lopies ingekry. Dat die tuisspan 'n paar keer hanteerfoute gemaak het in die Bulle se helfte van die veld, was wel 'n kopseer.
Die Laevelders se grootste uitblinker in die eerste 40 minute was Otto. Noem maar op: bal in die hand, afbreekpunte en ook op die verdediging – hy het hom laat geld.
Straks die Bulle se grootste probleem in die eerste helfte was hul lynstane wat nie goed gefunksioneer het nie. Boonop het die Pumas balbesit oorheers.
Skaars was die spelers egter terug op die veld na rustyd, toe tref die teenspoed die Laevelders, met Alwayno Visagie (senter) wat koelkas toe gestuur word vir 'n ongeoorloofde duikslag.
Nie dat dit hulle gekeer het nie, want kort daarna het Sebastian de Klerk (vleuel) gaan druk nadat hy omtrent die lengte van die veld genael het. Fouché het twee punte met 'n doelskop bygesit om die telling 23-14 te maak.
In die 54ste minuut het die Bulle ook 'n speler verloor toe Stedman Gans (senter) met 'n geel kaart afgestuur is vir 'n duikslag op Tapiwa Mafura (heelagter).
Skaars was hy af, toe voeg Fouché nog drie punte by vir die Pumas met 'n strafdoel om die telling 26-14 te maak.
Die Pretorianers was egter nie bereid om boedel oor te gee nie. In die 60ste minuut het Jan-Hendrik Wessels (plaasvervanger-haker) van 'n rolmaalbeweging afgerond, wat die telling 26-19 gemaak het.
Toe begin dinge 'n bietjie vir die Pumas uitrafel. Hulle is by skrums gestraf en het die bal skeef by 'n lynstaan ingegooi. Kort daarna is 'n strafdrie aan die Bulle toegeken, wat die telling 26-26 gemaak het.
In die 72ste minuut het Mornay Smith (stut) oorgeduik en Chris Smith (plaasvervangerlosskakel) het twee punte met 'n doelskop bygevoeg om die telling 33-26 te maak.
Daarna het die Laevelders alles probeer om weer te druk, maar helaas was dit hulle nie beskore nie.
Vir die Ligbloues het Wessels met 'n paar sterk lopies beïndruk.
• Puntemakers
Bulle 33 (14): Drieë: Schalk Erasmus, Stravino Jacobs en Jan-Hendrik Wessels. Strafdrie: Mornay Smith. Doelskoppe: Johan Goosen (2) en Chris Smith.
Pumas 26 (16): Drieë: Niel Otto en Sebastian de Klerk.
Doelskoppe: Niel Marais en Eddie Fouché. Strafdoele: Marais, Fouché (3).
– Netwerk24
Die Pretorianers het vier drieë gedruk om met 33-26 te wen en het boonop 'n bonuspunt ingesamel.
Die tuisspan het met 'n knal begin toe Niel Otto (flank) vir 'n drie oorgeduik het. Niel Marais (losskakel) het verdoel en kort daarna drie punte met 'n strafdoel bygevoeg. Dit het die telling 10-0 in die Laevelders se guns gemaak.
Dit was egter nie lank nie, toe gaan druk eers Schalk Erasmus (haker) en kort daarna Stravino Jacobs (vleuel) vir die Bulle.
Oomblikke voordat die fluitjie vir rustyd geblaas het, het Eddie Fouché, plaasvervangerlosskakel van die Pumas, 'n strafdoel deur die pale gejaag. Dit het die telling teen rustyd 16-14 in die tuisspan se guns gemaak.
Die eerste helfte het gewis aan die tuisspan behoort. Hulle het die bal sterk gedra met spelers soos Phumzile Maqondwana (agtsteman), Otto en Morgan Naudé (stut) wat die Pretorianers moes laat verdedig vir die vale.
Met balbesit op die voorvoet, het die Pumas se agterspelers 'n paar goeie lopies ingekry. Dat die tuisspan 'n paar keer hanteerfoute gemaak het in die Bulle se helfte van die veld, was wel 'n kopseer.
Die Laevelders se grootste uitblinker in die eerste 40 minute was Otto. Noem maar op: bal in die hand, afbreekpunte en ook op die verdediging – hy het hom laat geld.
Straks die Bulle se grootste probleem in die eerste helfte was hul lynstane wat nie goed gefunksioneer het nie. Boonop het die Pumas balbesit oorheers.
Skaars was die spelers egter terug op die veld na rustyd, toe tref die teenspoed die Laevelders, met Alwayno Visagie (senter) wat koelkas toe gestuur word vir 'n ongeoorloofde duikslag.
Nie dat dit hulle gekeer het nie, want kort daarna het Sebastian de Klerk (vleuel) gaan druk nadat hy omtrent die lengte van die veld genael het. Fouché het twee punte met 'n doelskop bygesit om die telling 23-14 te maak.
In die 54ste minuut het die Bulle ook 'n speler verloor toe Stedman Gans (senter) met 'n geel kaart afgestuur is vir 'n duikslag op Tapiwa Mafura (heelagter).
Skaars was hy af, toe voeg Fouché nog drie punte by vir die Pumas met 'n strafdoel om die telling 26-14 te maak.
Die Pretorianers was egter nie bereid om boedel oor te gee nie. In die 60ste minuut het Jan-Hendrik Wessels (plaasvervanger-haker) van 'n rolmaalbeweging afgerond, wat die telling 26-19 gemaak het.
Toe begin dinge 'n bietjie vir die Pumas uitrafel. Hulle is by skrums gestraf en het die bal skeef by 'n lynstaan ingegooi. Kort daarna is 'n strafdrie aan die Bulle toegeken, wat die telling 26-26 gemaak het.
In die 72ste minuut het Mornay Smith (stut) oorgeduik en Chris Smith (plaasvervangerlosskakel) het twee punte met 'n doelskop bygevoeg om die telling 33-26 te maak.
Daarna het die Laevelders alles probeer om weer te druk, maar helaas was dit hulle nie beskore nie.
Vir die Ligbloues het Wessels met 'n paar sterk lopies beïndruk.
• Puntemakers
Bulle 33 (14): Drieë: Schalk Erasmus, Stravino Jacobs en Jan-Hendrik Wessels. Strafdrie: Mornay Smith. Doelskoppe: Johan Goosen (2) en Chris Smith.
Pumas 26 (16): Drieë: Niel Otto en Sebastian de Klerk.
Doelskoppe: Niel Marais en Eddie Fouché. Strafdoele: Marais, Fouché (3).
– Netwerk24
Kommentaar
Republikein
Geen kommentaar is op hierdie artikel gelaat nie