Buitelandse mediese studente: Eksamen nietig verklaar

Henriette Lamprecht – Die jongste pre-internskapevaluering van 297 studente wat medies in die buiteland studeer het, is nietig verklaar. Die evaluering is op 27 September afgelê. Volgens die Mediese en Tandheelkundige Raad is daar bewyse die studente het vooraf toegang tot die vraestel gehad. Volgens me. Johanna Nghishekwa, senior bestuurder vir regsdienste by die Raad vir Gesondheidsberoepe in Namibië (HPCNA), vind die volgende evaluering op 9 Januarie aanstaande jaar plaas. Die Teenkorrupsiekommissie (ACC) is tans besig met ’n ondersoek na die beweerde knoeiery met September se internskapevaluering wat verpligtend is vir alle mediese gegradueerdes met buitelandse kwalifikasies en ’n voorvereiste vir dokters voordat hulle by die raad kan registreer. Volgens die ACC se woordvoerder, me. Josefina Nghituwamata, duur die ondersoek voort. Sy het gesê die ACC kan nie verdere inligting bekend maak nie omdat dit ’n negatiewe impak op die ondersoek kan hê. “Dit sal ook die ondersoek en die uitslag daarvan in die gedrang bring.” Intussen het een van die betrokke studente by navraag gesê almal word deur die besluit geraak, en niemand weet wie die sondaar was nie. Volgens die student is daar van hulle wat reeds vanaf 2017 probeer om vir internskappe te kwalifiseer. Die student, wat buite Windhoek woon, sê hulle moet ook elke keer ’n fooi betaal om die evaluering af te lê, terwyl hy ook vir vervoer na Windhoek moet betaal.In 2018 het 238 buitelandse opgeleide dokters nie die eksamen geslaag nie, terwyl net 45 uit die 99 van die vorige jaar toegelaat is om vir internskappe by die ministerie van gesondheid en maatskaplike dienste (MoHSS) te registreer. Vier buitelandse studente het vroeër vanjaar onder meer die HPCNA voor die hof gedaag omdat hulle na bewering in November verlede jaar se pre-internskapevaluering met tyd benadeel is. Volgens dié studente het verlede jaar se vraestel 300 meervoudige keusevrae bevat (teenoor die vorige vraestel se 100), en het die vraestel uit ses in plaas van vier afdelings bestaan. Wat inhoud en struktuur betref, is die vraestelle glo soortgelyk aan dié wat finalejaarstudente aan die Universiteit van Namibië (Unam) se mediese skool skryf. Drie dokters wat onafhanklik deur die buitelandse studente en die mediese en tandheelkundige raad aangestel is om die vraestelle te evalueer, was dit ook eens die buitelandse studente het veel minder tyd as die Unam-studente gehad om die vraestelle af te lê.Die opdrag aan die drie dokters was om te bepaal of die meervoudige keusevrae in die vraestelle van 20 en 30 November soortgelyk (en in watter mate) was aan die vlak van ’n vraestel wat deur die Unam-studente afgelê is.Van die groep beswaarde mediese en tandheelkundige buitelandse studente het vroeër vanjaar ook ’n klagskrif met griewe aan die eerste minister, me. Saara Kuugongelwa-Amadhila, oorhandig waarin hulle beweer hulle word aan ’n “onwettige eksamen deur ’n onwettige entiteit (HPCNA) uitgelewer.” Van hul klagtes was dat hulle nie weet “wie die eksamen opstel, die vraestelle merk of modereer nie”.Republikein het vroeër berig meer as N$120 miljoen van belastingbetalersgeld is gebruik om 240 Namibiese studente na Rusland vir opleiding in medies en tandheelkunde te stuur wat volgens die HPCNA van ‘n laer standaard is. Per jaar kos dit sowat N$87 000 per student en N$522 000 in totaal vir hul studies van ses jaar. Dit bring die totale uitgawe op N$125,28 miljoen te staan.

Buitelandse mediese studente: Eksamen nietig verklaar

Kommentaar

Republikein 2025-07-04

Meld asseblief aan om kommentaar te lewer

Buitelandse mediese studente: Eksamen nietig verklaar

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie