Buitelandse dokter dagvaar mediese raad

Henriette Lamprecht’n Mediese student wat aan die Universiteit van Namibië se mediese skool gestudeer het en nie by die mediese en tandheelkundige raad kon registreer nie omdat sy ’n buitelandse student was, dagvaar die raad en die ministerie van gesondheid en maatskaplike dienste vir honderde duisende dollar vir onder meer pyn en lyding asook regskoste.Dr. Catherine Wangeci Muthoga is ’n Keniaanse burger wat in Botswana woon, waar sy uiteindelik as leerlingdokter kon registreer en sonder vergoeding haar internskap kon voltooi. Beide die mediese raad en die ministerie se verweer is dat ’n besluit reeds in 2016 geneem is dat nie-Namibiërs nie vir internskappe in Namibië geregistreer word nie, omdat daar nie plek in staatsgeriewe vir dié leerlingdokters is nie.Volgens Muthogo het die Universiteit van Namibië se mediese skool (SOM) in November 2017 in ’n brief bevestig nie-Namibiese studente sal nie meer langer vir mediese internskapprogramme in Namibië oorweeg word nie en hulle moet ander alternatiewe ondersoek. Ten spyte hiervan het die ministerie van gesondheid en maatskaplike dienste op 2 Januarie 2018 die mediese raad ingelig dat Muthoga as leerlingdokter (graad 6) by die staatshospitaal op Oshakati moet inval. Sy het haar aansoek vir registrasie as leerlingdokter op 15 Januarie by die raad ingedien. Volgens haar was die raad bewus van die feit dat sy na die Oshakati-staatshospitaal uitgeplaas is en dat die ministerie hulle versoek het om haar te help. “Ek het aan al die regsvereistes verwant tot registrasie as leerlingdokter voldoen,” sê Muthoga in haar verklaring. Haar aansoek vir registrasie is egter later dieselfde maand deur die raad afgekeur, gebaseer op die ministerie se beleid dat buitelandse student nie as leerlingdokters in Namibië geregistreer mag word nie en eerder hul heil iewers anders moet gaan soek. Muthogo het gevolglik haar plasing by die Oshakati-staatshospitaal verloor en moes na Botswana terugkeer. Pogings om as leerlingdokter in Kenia en Zambië te registreer, het ook misluk.In Augustus 2018 het die ministerie van gesondheid in Botswana haar laat weet sy kan as leerlingdokter in dié land sonder enige vergoeding inval. Sy het by dié land se raad geregistreer en is na die Prinses Marina-hospitaal uitgeplaas. Volgens hofdokumente het die mediese raad Muthogo in Junie 2019 ingelig dat weens die ministerie se onttrekking van haar plasing, sy nie kwalifiseer vir registrasie as leerlingdokter nie. Op hierdie grondslag sou die appél wat sy teen haar weiering van haar registrasie ingedien het, nie slaag nie. Die saak is in Julie van die rol geskrap.Volgens Muthoga het sy N$30 000 aan regsuitgawes bestee in ’n poging om die raad se besluit onregmatig te verklaar. Sy is uiteindelik op 23 Julie as leerlingdokter deur die Namibiese raad geregistreer – “verrassend genoeg sonder dat ek ’n plasingsbrief moes toon”.“Om my registrasie van my te weerhou, is diskriminerend, onregverdig, vernederend, selektief, onmenslik en ongrondwetlik,” lui haar verklaring. Muthoga eis N$523 348 vir verlies aan inkomste, N$100 000 vir emosionele trauma en angs en N$30 000 vir regskoste.Die uitvoerende direkteur in die ministerie van gesondheid en maatskaplike dienste, mnr. Ben Nangombe, sê in die ministerie se verweer internskap is afhanklik van die beskikbaarheid van poste in staatsgeriewe. Nangombe sê ’n besluit om nie-Namibiërs nie vir internskappe te registreer nie, was vanweë die gebrek aan plek in staatsgeriewe. Dié besluit is op 15 Augustus 2016 en 21 September 2017 na die mediese skool gestuur en Muthogo het dus gevolglik genoeg tyd gehad om alternatiewe reëlings te tref. Die registrateur van die mediese raad, mnr. Cornelius Weyulu, het op sy beurt Nangombe se verweer ondersteun. – henriette@republikein.com.na

Buitelandse dokter dagvaar mediese raad

Kommentaar

Republikein 2025-11-10

Meld asseblief aan om kommentaar te lewer

Buitelandse dokter dagvaar mediese raad

Kommentaar

Republikein 2025-11-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.