Brulperde geniet stewige ondersteuning

Tielman van LillAnders as wat vele mense dink, word motorfietssport asook motorsport deur die Namibiese Motorsportfederasie (NSMF) geadministreer.Die NMSF is by die Fédération Internationale de l’Automobile (FIA) geaffilieer wat alle motorsportkodes insluit. Vir motorfietskompetisies is die NMSF by Fédération Internationale Motorcycliste (FIM) geregistreer om die brulperdrenne plaaslik te reguleer.As ’n erkende lid van die FIM, ontvang die NMSF jaarliks verskeie voordele en finansiële steun van sy internasionale moederliggaam. Die Namibiese bestuur ontvang gesubsideerde internasionale kompetisielisensies en geniet die voorkeur om seminare by te woon waar sy beamptes opleiding in die nuutste internasionale standaarde ontvang. Behalwe dié voordele, ontvang Namibië jaarliks drie inskrywings vir internasionale Moto X-kompetisies sonder dat jaers daarvoor hoef te kwalifiseer.Die mees algemene twee- en vierwielmotorfietskompetisies wat in Namibië aangebied word, is motocross (by Gallina noord van Windhoek, Gobabis en Swakopmund), enduro (veld), veldrenne en versnelrenne (Windhoek). Ongelukkig kan superfietsrenne weens die gebrek aan veiligheidstandaarde nie by die Tony Rust-renbaan buite Windhoek gehou word nie. Die Tony Rust-renbaan is die enigste venue in die land waar wel versnelrenne op teer aangebied word, maar die venue kwalifiseer nie vir die veiligheidsgradering vir die skrikwekkende hoë snelhede van supermotorfietse nie. Daarom neem ’n groot aantal superfietsentoesiaste gereeld by dié baan aan die nasionale kampioenskap vir versnelrenne deel.Enige vorm van motorfietssport is nie vir elke Jan Rap en sy maat bedoel nie. Ten spyte van die adrenaliengedrewe sport se risiko’s, is motorfietsrenne weens die bekostigbaarheid daarvan (in vergelyking met motorsport wat ontsaglik duur is) geweldig gewild onder Namibiërs. Dus is dit glad nie vreemd om 100 inskrywings by ’n enduro-kompetisie te sien, waar verskeie klasse en ouderdomme die bergagtige dele buite Windhoek asook Uis en Karibib aandurf nie.Ná ’n te lang afwesigheid op die Namibiese toneel, is nasionale kampioenskapstatus verlede jaar aan motocross toegestaan. Motocross het die afgelope paar jaar topjaers gelewer wat internasionaal kon meeding en is gewis ’n getuigskrif vir die kode se bestuur en vasberade ontwikkeling onder bekwame mentorskap.Met renstelle (go carts) kan deelnemers so jonk as vyf jaar oud aan kompetisies begin deelneem en dit is ongelooflik hoe kompeterend die seuns en meisies ten spyte van hul jeugdigheid is. Motocross het die grootste aanhang onder die skoner geslag van enige gemotoriseerde sport in Namibië. En moenie dink die dames hou terug wanneer die versnellers oopgedraai word nie!Andreas Brendel, die NMSF se visepresident vir motorfietssport, is ’n gesoute hand in dié sportkode en is die afgelope drie jaar in dié besige stoel. Behalwe dat hy die NMSF by die FIM verteenwoordig, het die FIM hom as sy verteenwoordiger (kommissiepresident) vir Afrika by enduro en veldrenne aangewys. Brendell is ook die organiseerder van die X-Race, Namibië se enigste internasionale motorfietskompetisie, wat hy reeds vir etlike jare bestuur.Die X-Race, wat tradisioneel buite Windhoek by Elisenheim gehou word, het oor die afgelope jaar in gewildheid en statuur gegroei. Laasjaar het die FIM kontinentale status aan dié byeenkoms verleen en vyf lande het aan die elite kompetisie deelgeneem. Weens die gewraakte Covid-19-status moes die byeenkoms vanjaar gekanselleer word, maar verlede jaar het ryers uit die gasheerland, Botswana, Kenia, Suid-Afrika en Zambië die krane net noord van die hoofstad oopgedraai.Hopelik hoef motor- en motorsportentoesiaste nie meer lank te wag om hul geliefde ysterperde veld toe te neem nie.- tielman@republikein.com.na

Brulperde geniet stewige ondersteuning

Kommentaar

Republikein 2025-06-20

Meld asseblief aan om kommentaar te lewer

Brulperde geniet stewige ondersteuning

Kommentaar

Republikein 2025-06-20

Meld asseblief aan om kommentaar te lewer

MELD AAN

Advertensie