Brittanje stuur noodspan na Namibië

Ronelle Rademeyer – 'n Span medici van die Verenigde Koninkryk se Mediese Noodspan is na Namibië ontplooi om ondersteuning aan gesondheidswerkers en spesialis-kundigheid aan hospitale te bied wat deur die Covid-krisis oorweldig is.Die span staan onder leiding van dr. Elias Pavlopoulos, 'n kundige in openbare gesondheidsorg.Die span bestaan uit tien dokters, verpleegsters en 'n humantêre gesondheidsorgspesialis, sê die Britse hoëkommissariaat in 'n verklaring.Die lede van die span is van Brittanje, Griekeland, Uganda, Kenia, Burundi en Nigerië afkomstig.Hulle spesialiseer in noodbehandeling, kritieke sorg, infeksiebeheer en -voorkoming, risikokommunikasie, gemeenskapskakeling, openbare gesondheidsorg en logistiek. Die Britse minister vir Afrika, James Duddridge, wys in die verklaring daarop dat Namibië in Junie alleen meer mense aan Covid-19 verloor het as in al die voorafgaande maande tydens die pandemie.“Die Covid-19-pandemie bied duidelik 'n uitdaging vir die land se ekonomie, gemeenskappe en gesondheidsorgstelsel. Hierdie ontplooiing van lede van die Mediese Noodspan om kundige hulp aan gesondheidswerkers te bied, is 'n belangrike stap om Namibië se reaksie op Covid-19 te verbeter,” sê hy.Die adjunkminister van gesondheid en maatskaplike dienste, dr. Esther Muinjangue, sê die koms van die span sal Namibië se kliniese kapasiteit verbeter. “Dit sal broodnodige ondersteuning in die voorkoming en behandeling van Covid-19 verleen.”Dr. Charles Sagoe-Moses, die Wêreldgesondheidsorganisasie (WHO) se verteenwoordiger in Namibië, sê hulle koms volg op 'n versoek in Junie deur die ministerie vir sodanige hulp.Volgens hom het die WHO onverpoos gewerk om 'n geskikte span te identifiseer om die land in dié kritieke tyd by te staan.Volgens Pavlopoulos is die span trots daarop om die mense van Namibië in hul reaksie op die Covid-19-pandemie te kom ondersteun.“Ons span sal spesialisopleiding en -ondersteuning bied en gesondheidsorgspanne leer om pasiënte wat kritiek is, te behandel, asook om hulself te beskerm. Ons sal gemeenskappe bemagtig om die verdere verspreiding van die virus te voorkom. In hierdie pandemie is nie een van ons veilig totdat almal in Namibië nie veilig is nie,” het hy gesê.Die Mediese Noodspan het sedert die begin van die pandemie al verskeie ander lande op soortgelyke wyse bygestaan. – ronelle@republikein.com.naFOTOLede van Brittanje se mediese noodspan is hier afgeneem op Heathrow-lughawe by Londen toe hulle vroeër na Eswatini gestuur is om daar met die Covid-19-stryd te help. Foto uk-med.org

Brittanje stuur noodspan na Namibië

Kommentaar

Republikein 2025-12-16

Meld asseblief aan om kommentaar te lewer

Brittanje stuur noodspan na Namibië

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.