Brait al amper 28% laer ná Brexit

Nellie Brand-JonkerDie beleggingsbeheerfirma Brait se aandeelprys het Woensdag skerp geval nadat hy ’n handelsverslag oor sy netto batewaarde uitgereik het wat die impak toon van sy blootstelling aan Brittanje.Sy aandeelprys het in die oggend met amper 6% gedaal, maar later 4,5% laer vir die dag op R111,98 gesluit.Sedert die Britte op 23 Junie in ’n referendum gestem het dat Brittanje die Europese Unie (EU) moet verlaat, het Brait se aandeelprys al met 28% gedaal.Die maatskappy waarin die sakeman Christo Wiese die grootste aandeelhouer is, besit groot belange in Britse maatskappye soos die kleinhandelaar New Look.Sy netto batewaarde per aandeel het met 3,2% gedaal in die kwartaal tot einde Junie.Die impak van die referendum het tot gevolg gehad dat die Britse pond met 7,5% verswak het teen die rand vanaf R21,21 einde Maart tot R19,62 einde Junie (die kwartaal waaroor die handelsverklaring is).As die impak van die verswakking in die pond uitgesluit is, sou die waarde van sy bates effens gestyg het.In sy aankondiging is gesê Brexit het ’n negatiewe impak op die aandeelpryse gehad van maatskappye wat blootstelling aan Brittanje het.Brait se belegging in New Look is sy grootste. Die waarde van die belang het in die kwartaal met 10% tot R31,2 miljard gedaal.Die waarde van sy belegging in Virgin Active het gestyg tot R17,7 miljard.Sy belegging in Suid-Afrika se verbruikersgoederegroep Premier is einde Junie op R12,8 miljard gewaardeer.“Die Britse klerekleinhandelsektor het ’n moeilike kwartaal gehad as gevolg van ongunstige marktoestande, laer verbruikersvertroue en die gevolge van promosies,” volgens die verklaring.Sy inkomste het in die kwartaal tot einde Junie gedaal nadat verkope in vergelykende winkels amper 7% laer is.Brait sê hoewel Brexit wisselvalligheid in markte tot gevolg gehad het, het sy maatskappye hul blootstelling aan die wisselkoers vir die res van die jaar verskans. Hulle “is in ’n gunstige posisie om op medium- tot langer termyn die probleme die hoof te bied wat die land het” omdat hulle beperkte blootstelling aan kredietverkope het en sterk kontantskeppend is.Thebe Stockbroking het in ’n nuusbrief gesê die maatskappye wat op die JSE genoteer is met die grootste blootstelling aan Brittanje en Europa is die hardste getref deur Brexit.“Die bestuur het te kenne gegee die maatskappye is sterk genoeg om die gevolge van Brexit te hanteer,” het Thebe gesê. “Maar Brait se beleggings in verbruikersmaatskappye gaan waarskynlik negatief geraak word deur die Brexit-nasleep omdat kleinhandelaars baie goedere invoer wat in dollar geprys word. Die hoër invoerkoste as gevolg van ’n swakker pond gaan sleg wees vir winste.” - Netwerk24

Brait al amper 28% laer ná Brexit

Kommentaar

Republikein 2025-10-28

Meld asseblief aan om kommentaar te lewer

Brait al amper 28% laer ná Brexit

Kommentaar

Republikein 2025-10-28

Meld asseblief aan om kommentaar te lewer

MELD AAN

Advertensie