Boufoute aan loopbrug dalk rede vir tragedie

Susan Cilliers - Dis moontlik dat die loopbrug by die Hoërskool Driehoek in Vanderbijlpark Vrydag nie ineengestort het weens swak instandhouding nie, maar probleme wat reeds met die ontwerp of oprigting daarvan geskep is.Dit is die mening van prof. Hendrik Marx, ’n siviele ingenieur verbonde aan die Universiteit van die Vrystaat. Hy doen gereeld forensiese ondersoeke na strukture wat in duie gestort het en getuig soms in hofsake daaroor.Marx het Saterdagoggend beklemtoon dit sal onbillik wees om vingers te wys na enige partye op grond van foto’s wat Vrydag by die skool geneem is nadat ’n gedeelte van die loopbrug ineengestort het.“Die foto’s is nie voldoende vir die doel van ’n forensiese foto-ondersoek of wanneer ’n mens self op die toneel sou wees om die struktuur te bekyk nie. Op grond van die oorhoofse foto’s lyk dit egter wel vir my moontlik dat die probleem nie noodwendig gebrekkige instandhouding was nie.”Marx meen die loopbrug was dalk eerder óf swak ontwerp, óf dat die mense wat die brug opgerig het, moontlik afgewyk het van die ingenieur se spesifieke ontwerpbesonderhede. “Dit kon wees weens onbekwaamheid of swak toesig.”Die aanvanklike ontwerp kon moontlike gebreke insluit soos dat dele van die vashegtings tussen verskillende dele van die loopbrug nie maklik (of glad nie) bereik kan word indien dit roes en herstelwerk nodig is nie, meen Marx.Vier kinders is dood en 23 beseer toe die brug Vrydagoggend ineengestort het. Die betonblok van die loopbrug wat meegegee het, het op kinders geval wat op daardie oomblik net onder dit op die grondvloer geloop het. Kinders wat bo-op die betonblok was wat meegegee het, het saam met dit geval en is ook beseer.OndersoekBuang Jones, bestuurder van die Menseregtekommissie (MRK) in Gauteng, het Vrydag gesê die kommissie het reeds vasgestel daar was vertragings met die herstel van strukture by die skool.“Ons gaan nou met al die betrokke owerhede skakel om antwoorde hieroor te kry.”In 'n mediaverklaring wat Saterdag uitgereik is, het die Gautengse departement van onderwys bevestig die department van arbeid is nou in beheer van die skool en dat geen ongemagtigde persoon op die perseel toegelaat word nie."Die department van arbeid gaan 'n strukturele assessering doen sodat 'n vrystellingsverslag uitgereik kan word wat toelaat dat dele van die skool in gebruik geneem kan word. Dit sal na verwagting Maandag uitgereik word."Die departement van onderwys gaan ook strukturele ingenieurs aanstel om die struktuur te assesseer," lui die verklaring. – Netwerk24

Boufoute aan loopbrug dalk rede vir tragedie

Kommentaar

Republikein 2026-01-21

Meld asseblief aan om kommentaar te lewer

Boufoute aan loopbrug dalk rede vir tragedie

Kommentaar

Republikein 2026-01-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.