Botswana kan Eskom nog eendag met steenkool red

Francois Williams – Eskom kan teen 2030 ’n tekort van 470 miljoen ton steenkool hê weens die afname in steenkoolproduksie in Suid-Afrika en die algaande swakker gehalte steenkool wat gelewer word.Maar die Botswana-steenkoolmaatskappy Minergy meen hy kan dalk voordeel trek uit dié penarie.Hoewel Minergy hom nie op die lewering van steenkool vir kragopwekking toespits nie, begin dit vir hom sakesin maak om steenkool vir kragopwekking te lewer weens die tekort aan steenkool wat Eskom oorkant die grens ervaar. “Ons steenkool is van so ’n gehalte dat dit perfek is vir kragprodusente en die geleentheid kan in die toekoms maklik benut word,” het Morné du Plessis, uitvoerende hoof van Minergy, Woensdag op ’n markopdatering in Gaborone, Botswana, gesê.Minergy spits hom toe op die nywerheidsmark vir steenkool, en die meeste van sy steenkoolproduksie gaan na nywerheidsklante in Suid-Afrika en Namibië.Sy Masama-myn in die Mmamabula-steenkoolveld het reserwes van sowat 390 miljoen ton, en hy het nog net sowat 39 000 ton ontgin, maar kan teen 2020 tot soveel as 100 000 ton bemarkbare steenkool per maand lewer, verwag Du Plessis. Die myn word ontwikkel om produksie te verhoog. Die uiteindelike mikpunt is 2,4 miljoen ton per jaar.Op ’n bedryfseminaar in Julie in Johannesburg het kenners gewys Suid-Afrika produseer 20 miljoen ton minder steenkool per jaar vergeleke met historiese syfers.Groot rolspelers soos Anglo American en South32 is boonop besig om hulle aan die steenkoolbedryf te onttrek en hul steenkoolbates te verkoop, wat beteken die tekort aan steenkool in Suid-Afrika gaan net erger word.Voordat Minergy se droom egter kan waar word om steenkool uit Botswana op groot skaal aan klante soos Eskom te verskaf, sal Transnet en sy eweknie in Botswana werk moet maak van die jarelange plan om ’n swaarvragspoorlyn tussen Botswana en Suid-Afrika te vestig.Botswana beskik oor twee derdes van Afrika se nog onontginde steenkoolreserwes.Eskom het in sy afgelope boekjaar byna 114 miljoen ton steenkool verbruik, en het R58,5 miljard daarvoor betaal. In die vorige jaar het Eskom 115 miljoen ton steenkool verbrand.In dié konteks sal Minergy se moontlike bydrae aan Eskom maar nog ’n druppel aan die emmer wees, want selfs as al sy verwagte steenkoolproduksie van 2,4 miljoen ton per jaar na Eskom gaan, sal dit maar nog net 2% van Eskom se totale jaarlikse verbruik dek. – Netwerk24

Botswana kan Eskom nog eendag met steenkool red

Kommentaar

Republikein 2025-07-01

Meld asseblief aan om kommentaar te lewer

Botswana kan Eskom nog eendag met steenkool red

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie