Borgtog toegestaan ná beweerde padwoedemoord

Borgtog van N$15 000 is gistermiddag in die Windhoek-landdroshof in Katutura aan die hoë amptenaar in die ministerie van binnelandse sake en immigrasie toegestaan wat 'n jong Windhoeker na bewering tydens 'n padwoedevoorval twee keer in die kop geskiet het.Mnr. Likius Valombola (53), kommissaris van vlugtelinge in dié ministerie, staan tereg op moord nadat hy mnr. Helao Ndjaba (25) na bewering op 19 Mei in die Ombili-woonbuurt geskiet het.Valombola is op 20 Mei op Opuwo in hegtenis geneem waar hy vir werksverpligtinge was. Hy is daarna vrygelaat, maar is later weer in hegtenis geneem.Hy het Maandag 'n formele aansoek om borgtog ingedien. Ndjaba is dieselfde dag in die Katutura-staatshospitaal dood waar hy sedert die skietvoorval in die intensiewesorgeenheid op lewensondersteunende masjiene was. Die klag van poging tot moord is toe na een van moord verander.Die hofsaal was vandeesweek gepak en 'n vreedsame optog is ook deur lede van die publiek gehou om teen sy vrylating op borgtog beswaar te maak.Njaba se familie en vriende het gistermiddag buite die hofsaal hul teleurstelling uitgespreek met die hof se besluit om borgtog toe te staan. Volgens die broer van die oorledene, mnr. Leopoldt Nghiluamo, is dit nie reg dat Valombola op borgtog vrygelaat is nie. “Die staat het ons gefaal en die aanklaer het ook nie sy werk gedoen nie,” het hy gesê. Nghiluamo het voorts gesê hulle het iemand nodig om hulle te verteenwoordig, geld is nie alles nie en die mense wat nie welaf is nie, kry baie swaar.“Kon die hof nie gewag het tot ons ten minste ons broer begrawe het voor hulle vir Valombola op borgtog vrygelaat het nie?” het hy gesê.Me. Veronica Frans, ook ’n vriendin van die Ndjabas, sê die uitspraak was nie regverdig nie.“Ons huil steeds en hulle (Valombola se familie) is bly dat hy borgtog gekry het.”Mnr. Jason Shivute was ook ontevrede oor hoe die saak hanteer is. "Die mense wat ons moet verteenwoordig, het min insette in die saak gehad," meen hy.“Ek hoop die regering neem die besit van vuurwapens baie ernstig op, want dit ruk handuit en dit is nie meer veilig in Namibië nie,” het hy gesê.Die staatsaanklaer, mnr. Arie Husselmann, het beswaar gemaak teen Valombola se aansoek om borgtog en aangevoer hy kan vlug na sy familie in die buiteland. Hy het die erns van die misdaad beklemtoon en gesê die staat het 'n sterk saak teen Valombola en dat dit daarom nie in die openbare belang is om hom vry te laat nie.Landdros Antonius Shapumba het in sy uitspraak gesê volgens getuienis het Valombola nie kontak met sy familie wat in die buiteland woon nie en dat hy ook nooit weer na Kuba teruggekeer het waar hy tydens die vryheidstryd skoolgegaan het nie.Verder het hy ses kinders, hy het aangedui dat hy berou het oor die voorval en hy het sy samewerking aan die polisie verleen, het Shapumba gesê.Hy het ook daarop gewys Valombola is voornemens om skuldig te pleit wanneer hy verhoor word.Die getuienis voor die hof was dat Valombola die betrokke aand saam met sy vrou en seun, wat bestuur het, na 'n familie op pad was toe 'n voertuig met vier insittendes die pad versper het. Dié voertuig het glo stilgestaan en die deure was oop. Hy het getuig hy het uitgeklim en hulle gevra waarom hulle die pad versper. Hy ontken dat hy sy vuurwapen in sy hand gehad het toe hy uitgeklim het en voer aan hulle het sy motor genader en aan die deur gepluk ná hy reeds teruggeklim het.Hy het getuig hy het toe besluit om twee waarskuwingskote te skiet. Een skoot is afgevuur toe sy seun reeds besig was om vinnig weg te trek.Op 'n vraag waarom hy nie die voorval by die polisie aangemeld het nie, het Valombola gesê hy was van plan om dit die volgende dag te doen. Dit was ook sy getuienis dat hy nie geweet het een van die jong mans is op die toneel raakgeskiet nie.Valombola het die hof ook meegedeel dat hy vanweë sy "sensitiwiteit en menslikheid vir die oorledene gebid het".Die staat het aangevoer sy seun het hom probeer kalmeer en dit was hy wat hom teruggedwing het na hul motor toe toe Valombola uitgeklim het om die mans, vuurwapen in die hand, in die stilstaande voertuig te konfronteer.Die staat voer ook aan hy het geen rede gehad om waarskuwingskote af te vuur nie, aangesien hy en sy familie se lewe nie in gevaar was nie. Shapumba het egter gesê die hof aanvaar Valombola se weergawe van die gebeure en dat dit redelik moontlik waar is.Hy moet weer op 31 Julie in die hof verskyn.Mnr. Sisa Namandje het Valombola verteenwoordig.

Borgtog toegestaan ná beweerde padwoedemoord

Kommentaar

Republikein 2025-12-17

Meld asseblief aan om kommentaar te lewer

Borgtog toegestaan ná beweerde padwoedemoord

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.