Boorgate in privaatbesit moet geregistreer word
Die hoofstad wil 'n databasis saamstel wat kan help met toekomstige stadsbeplanning, asook die volhoubare gebruik van die akwifer.
Elvira Hattingh – Die Windhoekse munisipaliteit het met 'n projek begin om alle boorgate in privaatbesit binne die stadsgrense teen 31 Julie te registreer.
Dit sluit in boorgate wat buite werking is, asook tans in gebruik is binne die stad self, op omliggende plase, op Groot Aub, asook enige plek binne die munisipale grense.
Mnr. Harold Akwenye, bestuurder van korporatiewe kommunikasie, bemarking en openbare deelname by die Windhoekse munisipaliteit, het aan Republikein verduidelik die doel van die projek is om die munisipaliteit 'n beter begrip van waterverskaffingbehoeftes te gee.
Dit sal ook help om te evalueer hoeveel water 'veilig' uit akwifers onttrek kan word. Die munisipaliteit sê die data sal gebruik word om 'n databasis van alle boorgate binne die uitgebreide grense van die stad saam te stel.
“Die munisipaliteit wil egter beklemtoon hierdie is nie 'n strafproses nie – ons wil slegs volledige data insamel sodat ons dit in ons beplanning vir toekomstige ontwikkeling kan gebruik. Ons het dit ook nodig om aan wetgewing gehoor te gee.
“Daarom moedig ons alle Windhoekers aan om hul boorgate te registreer,” het hy gesê. Hy sê die registrasievorms is op die munisipaliteit se webwerf beskikbaar.
AANSOEKE NEEM TOE
Akwenye sê sedert 2016 het die munisipaliteit al hoe meer aansoeke vir die boor van private boorgate ontvang. Hy skryf dit toe aan die langdurige droogtes wat bestaande waterbronne bedreig.
“Die redes waarom mense boorgate wil sink, is vir huishoudelike en nywerheidsgebruike, asook besproeiing,” het hy gesê.
Akwenye verduidelik die munisipaliteit moet alle aansoeke vir private boorgate binne die stadsgrense bestuur.
Hy sê volgens wetgewing moet die stadsraad eers skriftelike goedkeuring verskaf voor nuwe, private boorgate binne die stadsgrense geboor word.
“Die volumes wat ons toelaat om te onttrek, sal beperk word volgens die volhoubaarheid van die akwifer sonder om dié reserwe uit te put,” het hy gesê.
Die administrasieproses behels die munisipaliteit moet vir boorgatpermitte by die ministerie van landbou, water en grondhervorming aansoek doen – of dan van dié aansoekproses kwytgeskeld word.
“Buiten daarvoor dat munisipale boorgate noodsaaklik vir die verskaffing van water tydens droogtes is, is daar 'n tekort aan volledige inligting oor hoeveel private boorgate binne die munisipale gebied is, asook hul gebruike en die rol wat dit in tye van waterskaarste speel.
“Die registrasie van alle boorgate sal aan die munisipaliteit 'n oorsig bied van tot watter mate ondergrondse water reeds binne die stadsgrense gebruik word, asook die potensiaal van die ondergrondse water (gehalte en kwantiteite) in die akwifer.
“Dit moet help met toekomstige beplanning van infrastruktuur vir waterverskaffingsprojekte.
“Ondergrondse water is 'n noodsaaklike bron – veral in Windhoek – gegewe die onlangse, uitgerekte droogtes.
“Die bestuur van die bron is noodsaaklik om volgehoue verskaffing in die toekoms te verseker,” het Akwenye gesê.
AKWIFER
Akwenye sê daar is reeds sowat 200 boorgate in die Windhoek-akwifer gesink, waarvan tans 'n derde produktief tydens droogte gebruik word. Die res word gebruik om die akwifer te monitor.
Hy sê ten spyte van rehabilitasiewerk op van die ouer boorgate wat in die 1950's gesink is, sal sommige hiervan vervang moet word. Dit is omdat 'n boorgat se produktiwiteit oor die jare afneem.
Hy sê egter al word meer boorgate in die akwifer gesink, beteken dit nie dat dit 'n “nuwe” bron van water is nie. “Ons is beperk deur die akwifer se vermoë om op natuurlike wyse deur reënwater aangevul te word,” het hy verduidelik.
- [email protected]
Dit sluit in boorgate wat buite werking is, asook tans in gebruik is binne die stad self, op omliggende plase, op Groot Aub, asook enige plek binne die munisipale grense.
Mnr. Harold Akwenye, bestuurder van korporatiewe kommunikasie, bemarking en openbare deelname by die Windhoekse munisipaliteit, het aan Republikein verduidelik die doel van die projek is om die munisipaliteit 'n beter begrip van waterverskaffingbehoeftes te gee.
Dit sal ook help om te evalueer hoeveel water 'veilig' uit akwifers onttrek kan word. Die munisipaliteit sê die data sal gebruik word om 'n databasis van alle boorgate binne die uitgebreide grense van die stad saam te stel.
“Die munisipaliteit wil egter beklemtoon hierdie is nie 'n strafproses nie – ons wil slegs volledige data insamel sodat ons dit in ons beplanning vir toekomstige ontwikkeling kan gebruik. Ons het dit ook nodig om aan wetgewing gehoor te gee.
“Daarom moedig ons alle Windhoekers aan om hul boorgate te registreer,” het hy gesê. Hy sê die registrasievorms is op die munisipaliteit se webwerf beskikbaar.
AANSOEKE NEEM TOE
Akwenye sê sedert 2016 het die munisipaliteit al hoe meer aansoeke vir die boor van private boorgate ontvang. Hy skryf dit toe aan die langdurige droogtes wat bestaande waterbronne bedreig.
“Die redes waarom mense boorgate wil sink, is vir huishoudelike en nywerheidsgebruike, asook besproeiing,” het hy gesê.
Akwenye verduidelik die munisipaliteit moet alle aansoeke vir private boorgate binne die stadsgrense bestuur.
Hy sê volgens wetgewing moet die stadsraad eers skriftelike goedkeuring verskaf voor nuwe, private boorgate binne die stadsgrense geboor word.
“Die volumes wat ons toelaat om te onttrek, sal beperk word volgens die volhoubaarheid van die akwifer sonder om dié reserwe uit te put,” het hy gesê.
Die administrasieproses behels die munisipaliteit moet vir boorgatpermitte by die ministerie van landbou, water en grondhervorming aansoek doen – of dan van dié aansoekproses kwytgeskeld word.
“Buiten daarvoor dat munisipale boorgate noodsaaklik vir die verskaffing van water tydens droogtes is, is daar 'n tekort aan volledige inligting oor hoeveel private boorgate binne die munisipale gebied is, asook hul gebruike en die rol wat dit in tye van waterskaarste speel.
“Die registrasie van alle boorgate sal aan die munisipaliteit 'n oorsig bied van tot watter mate ondergrondse water reeds binne die stadsgrense gebruik word, asook die potensiaal van die ondergrondse water (gehalte en kwantiteite) in die akwifer.
“Dit moet help met toekomstige beplanning van infrastruktuur vir waterverskaffingsprojekte.
“Ondergrondse water is 'n noodsaaklike bron – veral in Windhoek – gegewe die onlangse, uitgerekte droogtes.
“Die bestuur van die bron is noodsaaklik om volgehoue verskaffing in die toekoms te verseker,” het Akwenye gesê.
AKWIFER
Akwenye sê daar is reeds sowat 200 boorgate in die Windhoek-akwifer gesink, waarvan tans 'n derde produktief tydens droogte gebruik word. Die res word gebruik om die akwifer te monitor.
Hy sê ten spyte van rehabilitasiewerk op van die ouer boorgate wat in die 1950's gesink is, sal sommige hiervan vervang moet word. Dit is omdat 'n boorgat se produktiwiteit oor die jare afneem.
Hy sê egter al word meer boorgate in die akwifer gesink, beteken dit nie dat dit 'n “nuwe” bron van water is nie. “Ons is beperk deur die akwifer se vermoë om op natuurlike wyse deur reënwater aangevul te word,” het hy verduidelik.
- [email protected]
Kommentaar
Republikein
Geen kommentaar is op hierdie artikel gelaat nie