Boorgate by Linyanti red wild

Francoise Steynberg - Drie boorgate is verlede week by die Linyanti-rivierkanaal in die Bamunu kommunale bewaringsgebied in die Zambezistreek gesink om seekoeie van die uitmergelende droogte te red. Mnr. Frank Bockmuhl van Booysen Drilling het teenoor Republikein bevestig dat drie boorgate wat gesink is, goeie water lewer. “Ons het die eerste boorgat op Saterdag 13 Augustus gesink en die laaste een ’n week daarna. Dit het baie goed verloop,” het hy gesê. Volgens hom het verteenwoordigers van die ministerie asook van die betrokke tradisionele owerhede die boorbedrywighede besoek.“Die eerste twee boorgate is by die poele waarin sowat 50 seekoeie en drie krokodille voorkom. Die laaste boorgat is naby die kanaal waar sowat 1 000 sebras, 700 buffels en olifante by die kleiner poele water drink.”Bockmuhl sê by die laaste boorgat gaan nog pompe geïnstalleer word om die water na die poele te pomp. “Daar is baie wild wat in die gebied rondloop. Dit is egter ’n korttermynoplossing en ons hoop dit gaan reën, want dit is nie ’n oplossing vir volgende jaar nie,” het Bockmuhl gesê.Die minister van die omgewing en toerisme, mnr. Pohamba Shifeta, en ’n span van die direktoraat van wildlewe en nasionale parke, het vroeg vandeesmaand die gebied besoek om hulle van die situasie van die seekoeie en krokodille in die poele te vergewis. Toe was daar 100 seekoeie en drie krokodille in twee poele van die kanaal wat steeds water gehad en nog diep genoeg vir dié diere was. Die minister het gesê vyf seekoeie het toe reeds gevrek weens bakleiery onder die bulle wat baie gebiedsgebonde is. Volgens hom was die seekoeie nie in onmiddellike lewensgevaar nie, maar moes spoedig opgetree word.Die watervlakke in die poele is laag omdat geen gebruiklike vloedwater van die Liambezimeer na die Linyantirivier gevloei het nie en die Kwandorivier het ook nie soos gewoonlik in die Linyanti-vloedvlakte gevloei nie. Die ministerie het toe besluit dat boorgate gesink moet word om water in die poele en rivierkanaal te pomp, drie tot vyf bulle van kant gemaak moet word om bakleiery tussen hulle te verminder en die seekoeie deurentyd gemonitor sal word.Die ministerie se nuwe H125-helikopter is tydens die besoek ingespan. “Ons het sowat 200 olifante, 300 buffels en 500 sebras in die gebied gesien. Die gebied is ryk aan wildlewe en is ’n belangrike deel van die Namibiese komponent van die Kavango-Zambezi-oorgrensbewaringsgebied (Kaza),” het Shifeta gesê.

Boorgate by Linyanti red wild

Kommentaar

Republikein 2025-05-06

Meld asseblief aan om kommentaar te lewer

Boorgate by Linyanti red wild

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie