BoN sien swarigheid vir 2018

Jo-Maré Duddy – ‘n Maer jaar lê voor vir Namibiese boere, veral akkerbouers, verwag die sentrale bank.Volgens die Bank of Namibia (BoN) se jongste ekonomiese vooruitskatting gaan akkerbou vanjaar in ‘n resessie gedompel word, terwyl veeboere veel swaarder gaan trek as wat aanvanklik is.Die BoN verwag nou dat landhou in sy geheel in 2018 met net 1,2% gaan groei: Veeboerdery met 3,3% en akker- en bosbou met -1,5%. ‘n Jaar gelede was die prentjie heelwat meer rooskleurig. In Februarie 2017 het die BoN algehele landbougroei van 4,7% vir vanjaar in die vooruitsig gestel – 4,9% vir akkerbou en 4,6% vir veeboerdery. Selfs verlede Julie was die sentrale bank nog hoopvol met groei van 4,6% wat in 2018 vir veeboerdery en akkerbou elk verwag is.Die BoN meen 2017 was ‘n veel vetter jaar as wat aanvanklik verwag is. Volgens die sentrale bank het landbou in sy geheel verlede jaar waarskynlik met 8,1% gebult – ‘n baie beter vertoning as die 2,6% en 5,1% wat verlede Februarie en Julie onderskeidelik voorspel is. Die BoN se sompompie vir 2017 spoeg groeiprojeksies van 8,6% vir veeboerdery en 7,4% vir akkerboubou uit. Verlede Februarie was dié verwagtinge 3,4% en 1,7% onderskeidelik. In Julie was dit 4% en 6,6% onderskeidelik.Amptelike statistiekSyfers wat in Desember deur die Namibië Statistiekagentskap (NSA) vrygestel is, toon boere het in die derde kwartaal verlede jaar begin kleitrap. Landbou het toe met 5,3% jaar-op-jaar gegroei – beduidend minder as die 20,3% van die vorige drie maande en 15% van die eerste kwartaal van 2017.Geldgewys het landbou in die derde kwartaal N$999 miljoen in die Namibiese ekonomie ingepomp en bykans 3,7% tot die land se bruto binnelandse produk (BBP) van sowat N$27,1 miljard bygedra. Dié syfers is op konstante pryse van 2010 geskoei wat vir inflasie aangepas is.In die eerste nege maande van 2017 landbou net meer as N$3,1 miljard in die ekonomie laat vloei. In die eerste kwartaal was dié sektor se BBP-bydrae N$958 miljoen, gevolg deur N$1,187 miljard in die volgende een. Landbou se totale bydrae tot Namibië se BBP van sowat N$80,2 miljard in die eerste drie kwartale van 2017 was nagenoeg 3,9%.UitvoereUitvoere op die hoef het in die eerste nege maande van 2017 vir sowat N$1,79 miljard se buitelandse verdienste gesorg, toon die NSA se handelstatistiek. As sulks het dit sowat 3,8% tot Namibië se totale uitvoere van bykans N$47,6 miljard vir dié tydperk bygedra.Uitvoere op die hoef se verdienste in buitelandse valuta verlede jaar was: N$222 miljoen (1ste kwartaal), N$692 miljoen (2de kwartaal) en N$876 miljoen (3de kwartaal).Volgens die NSA het die uitvoer van lewendehawe in die derde kwartaal vir die grootste styging van al Namibië se uitvoere gesorg. Dit was N$800 miljoen of meer as ‘n 1 000% méér as uitvoere op die hoef in die derde kwartaal van 2016.Die NSA skryf dié uitvoersprong toe aan die Suid-Afrikaanse vraag na lewendehawe uit Namibië wat steeds groei.

BoN sien swarigheid vir 2018

Kommentaar

Republikein 2026-02-03

Meld asseblief aan om kommentaar te lewer

BoN sien swarigheid vir 2018

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.