BoN hou repokoers onveranderd

Estelle de Bruyn - Die president van die Bank van Namibië, mnr. Ipumbu Shiimi, het gister aangekondig dat die monetêre beleidskomitee van die bank besluit het om die repokoers onveran­derd op 7% te hou.
Die besluit is geneem ter ondersteuning van plaaslike ekonomiese groei, veral in die lig van die stadige herstel in die ekonomieë van Namibië se handelsvennote.
Die plaaslike rentekoers is volgens Shiimi nou in pas met die rentekoers in Suid-Afrika. Indien dit nie gedoen is nie, sou dit moontlik tot ’n kapitale uitvloei kon gelei het.
Namibiese skuld is nou ook op ’n meer volhoubare vlak. Gevolglik is besluit om verbruikers ’n blaaskans te gee.
Shiimi het daarop gewys dat globale ekonomiese groei in die eerste kwartaal van 2016 “broos” was en die monetêre beleid in sowel ontluikende as gevorderde ekonomieë redelik onveranderd was.
Ekonomiese groei in gevorderde ekonomieë het, met die uitsondering van Japan wat verbeter het, byna onveranderd gebly.
Japan se groei is deur Shiimi verwelkom, wat beteken dit is goeie nuus vir Namibië wat vis uitvoer na Japan en dié land wat belangstelling in uraaninvoere toon.
In sowel Amerika as die euro-gebied was die groei in die bruto binnelandse produk gelykmatig teen 2,0% en 1,7% onderskeidelik.
“Die meeste ontluikende sleutelmarkte het steeds swak gepresteer. Ekonomiese aktiwiteite in Brasilië, Rusland en Suid-Afrika het in die eerste kwartaal van 2016 saamgetrek, met ekonomiese groei in China wat verstadig het,” het Shiimi gesê.
Die negatiewe groeikoers in Suid-Afrika is volgens hom ’n bron van kommer vir Namibië omdat dit negatief op die land kan impakteer.
Indië daarenteen het voortgegaan om ’n hoë groeikoers van 7,9% gedurende dié