Bokswêreld gons oor Rocky-tipe geveg

Michael Green – Dit gons steeds oor Saterdag se opwindende boksgeveg tussen José Zepeda van Amerika en Ivan Baranchyk van Belo-Rusland in Las Vegas.Zepeda het Baranchyk in die vyfde ronde van hulle junior-weltergewiggeveg uitgeslaan.Verskeie kenners het dadelik na die rowwe geveg – wat soms meer na iets uit ’n Rocky-fliek gelyk het – as die “Geveg van die Jaar” verwys.Die veteraan-promotor Bob Arum het gesê dit was een van die beste gevegte wat hy sedert die woeste kragmeting tussen George Foreman en Ron Lyle in 1976 gesien het.Die plaaslike boksafrigter Gert Strydom het gesê hy het die hele tyd “op die punt van sy stoel” gesit en die bokser Ryno Liebenberg het die geveg as “mal” beskryf.Terence Crawford, die Wêreldboksorganisasie (WBO) se weltergewigkampioen het só na woorde gesoek om sy emosies te beskryf dat hy sommer begin vloek het.Lamont Roach, ’n voormalige WBO-veergewigkampioen, het dit doodeenvoudig die “Geveg van die Jaar” bestempel.En Mauricio Sulaimán, die president van die Wêreldboksraad (WBC), het die geveg as “sensasioneel en dramaties” beskryf.Vooraf is ’n goeie geveg tussen Zepeda en Baranchyk verwag, maar niemand kon voorspel wat uiteindelik gebeur het nie.Albei boksers was vier keer plat teen die tyd dat Zepeda die geveg met ’n verskriklike linkerhaakhou beëindig het.Baranchyk se regterbeen het ongemaklik onder sy lyf ingevou en sy kop het teen die krytvloer geklap ná daardie linker.Hy was ’n rukkie bewusteloos, maar het later self uit die kryt geloop.Baranchyk is oornag vir observasie in ’n hospitaal in Las Vegas gehou en sy promotor Lou DiBella het later laat weet hy is oukei.Wat nou vir Zepeda? Vooraf is gesê die wenner van Saterdag se geveg kan vorentoe ’n kans teen José Ramirez, die WBO en WBC se kampioen, kry.“Ek gaan nou vir die titels. Dis waarom ek boks,” het Zepeda aan Ring News 24 gesê.Kyk hier die hele geveg tussen Zepeda en Baranchyk: https://www.youtube.com/watch?v=TxrQbHYmOhg– Netwerk24FOTOJosé Zepeda (regs) op die aanval teen Ivan Baranchyk. Foto Top Rank

Bokswêreld gons oor Rocky-tipe geveg

Kommentaar

Republikein 2025-05-15

Meld asseblief aan om kommentaar te lewer

Bokswêreld gons oor Rocky-tipe geveg

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie