Boks-drama: Wilder glo Fury het gekroek

Mense skud maar net kop oor Deontay Wilder se beskuldigings dat Tyson Fury in albei hul kragmetings met gedokterde handskoene teen hom geboks het.
Wilder het aanvanklik beweer sy bene was moeg omdat hy ’n swaar kostuum gedra het kryt toe voor sy geveg in Februarie toe Fury hom met ’n tegniese uitklophou oorskadu het.
“Luister, dit raak nou belaglik. Skuif hom (Wilder) eenkant toe sodat die grootmanne nou kan baklei,” het die Britse bokspromotor Eddie Hearn aan die Daily Mail gesê.
Bob Bennett, direkteur van Nevada se sportraad, verwerp ook Wilder se aantygings.
Wilder het die afgelope naweek beweer dat Fury ’n onwettige voorwerp “so groot soos ’n eier” in sy bokshandskoene gehad het toe hulle mekaar in Desember van 2018 en in Februarie vanjaar gepak het.
Fury het al maande gelede, toe sulke gerugte die eerste keer onder Wilder se ondersteuners kop uitgesteek het, daarop gewys dat Wilder se afrigter, Jay Deas, dan by was toe sy hande verbind is en toe hy sy handskoene aangetrek het.
Wilder is ook nou skielik kwaad omdat Fury besluit het om eerder volgende teen Anthony Joshua as teen hom te boks.
Volgens Bob Arum, Fury se promotor, was dit egter Wilder en sy kamp wat nie ’n ooreenkoms met Fury vir ’n datum en plek vir ’n geveg kon bereik nie.
Arum is ook ontsteld omdat Wilder nou skielik die skeidsregter Kenny Bayless sleggesê het, wat die geveg in Februarie gestop het toe dit lyk asof Wilder in ernstige moeilikheid was.
– Netwerk24