Bokke, Poemas saam op 'borrelvlug' iewers

Michael Green – Met nog 'n fisieke kragmeting met die Argentynse Poemas wat Saterdag in die Nelson Mandelabaai-stadion in Gqeberha voorlê, is Jacques Nienaber, die Springbok-afrigter, 'n redelike senuweeagtige man.Die rede hiervoor is omdat die Bokke Sondag na Australië vir die res van hul wedstryde in die Rugbykampioenskap moet vlieg.“Ja en nou hou ek duimvas dat ons nie hierdie naweek enige ernstige beserings optel nie,” sê Nienaber.Nienaber sê met al die Covid-19-regulasies is dit baie moeilik om spelers sommer net te vervang. Veral as hulle ingevlieg moet word na 'n ander land.Dis waarom hy Sondag met 'n groot groep van 42 spelers na Australië sal vlieg.“Wat party mense dalk nie verstaan nie, is dat ons ons in 'n beproewende tydperk bevind. Dis nie maklik om iemand net in ons borrel in te bring nie,” sê Nienaber.“Selfs die spelers wat op bystand is, is onderworpe aan streng toetse en regulasies.”Nienaber sê verbeel jou hy het nie genoeg spelers in Australië nie en iemand kry seer, wat dan?“Jy kan seker iemand inkry, maar dan moet hy reeds in Suid-Afrika in die toetsprogram (vir Covid-19) wees. So, hy klim dan op die vliegtuig en as hy in Australië aankom, moet hy vir 14 dae in kwarantyn gaan. Hy gaan dus nie sommer gou vir die span kan speel nie.”Nienaber sê hy sou verkies het om met 37 spelers te vlieg.“Elke speler wat by die groep gevoeg word, is dalk een wat nie 'n kans gaan kry om te speel nie. En dis moeilik om vir ses weke net te oefen,” sê Nienaber.Daarom druk hy nou maar deur met 42 spelers en speel eerder veilig.“Ons vlieg Sondag byna soos in 'n borrel-vliegtuig saam met die Argentyne van Gqeberha na Kaapstad. En dan vlieg ons weer saam met hulle van daar na Australië. “Dis amper asof ons van hier tot daar binne ons borrel bly,” sê Nienaber.Waar die Bokke, Poemas, Wallabies en All Blacks egter hul toetse in Australië gaan speel, is nog onseker.Verlede week is bespiegel dat al die wedstryde in Perth kan plaasvind, maar die jongste Covid-verwikkelinge in Australasië kan ook 'n stokkie voor dié plan steek.Perth is veronderstel om gasheer te wees vir die Wallabies en All Blacks se kragmeting op 28 Augustus, maar daar is nou groot twyfel of dit sal moontlik wees nadat die Wes-Australiese regering aangekondig het dat alle Nieu-Seelandse besoekers aan die staat vir 14 dae in kwarantyn moet gaan.Dít volg nadat Nieu-Seeland Dinsdag met 'n nasionale inperking van drie dae begin het nadat 'n Covid-geval in Auckland aangemeld is.As hierdie vereiste ook op die All Blacks afgedwing word, beteken dit hulle sal nie in Perth kan speel nie.Toe Mark McGowan, die premier van Wes-Australië, gevra is of Perth nie meer dié wedstryd sal kan aanbied nie, het hy gesê “hulle is nie seker nie,” berig Reuters.“Ons kan dalk 'n spesiale reëling tref, waar die All Blacks in 'n bioborrel bly, of hulle gaan soos almal anders by ons regulasies moet inval.“Dis 'n situasie wat heeltyd verander en ons probeer nog uitwerk wat ons daaraan kan doen. Dit sal natuurlik 'n groot teleurstelling vir die ondersteuners wees as die wedstryd nie hier kan plaasvind nie, maar dis die aard van die wêreld waarin ons tans leef.”Die Wallabies het verlede naweek, ná die All Blacks hulle met 57-22 in Auckland afgeransel het, reeds na Perth gevlieg.Wes-Australië is een van die state wat die meeste sukses teen Covid-19 behaal het danksy sy beleid om sy grense te sluit sodra daar 'n uitbreking van die virus elders in die land is.Dié staat het wel sedert die begin van die pandemie Aussie Rules-spanne toegelaat om in bioveilige borrels in Perth te oefen en wedstryde te speel. Rugby Australië sal hoop dat 'n soortgelyke reëling vir die Rugbykampioenskap getref kan word.Nog meer so omdat streng inperkings in Nieu-Suid-Wallis en die hoofstad, Canberra, vanweë 'n derde vlaag in dié streke van krag is en dit dus moeilik maak om daar wedstryde aan te bied.Perth, die Australiese stad wat geografies die naaste aan Suid-Afrika is, het potensieel na 'n goeie opsie gelyk om ná die naweek se stryd in Gqeberha al die oorblywende Rugbykampioenskapwedstryde aan te bied.McGowan glo egter so 'n scenario is nou onwaarskynlik.“Ek dink nie dit sal sommer gebeur nie, want dit (rugby) is nie ons belangrikste prioriteit nie,” sê McGowan.Die Bokke is geskeduleer om op 12 September in Sydney teen die Wallabies te speel en 'n week later teen dieselfde span in Brisbane. Daarna is hulle veronderstel om op 25 September in Dunedin teen die All Blacks te speel en 'n week later weer in Auckland.Waar dié kragmetings almal egter nou gaan plaasvind, bly vir eers 'n raaisel. – Netwerk24

Bokke, Poemas saam op 'borrelvlug' iewers

Kommentaar

Republikein 2025-09-19

Meld asseblief aan om kommentaar te lewer

Bokke, Poemas saam op 'borrelvlug' iewers

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie