Boete van R1,5 mjd. ‘sou Steinhoff se deure sluit’
’n Ondersoekhoof sê hy was verras toe Steinhoff se aandeelprys aanvanklik ná die aankondiging oor die boete met 9% geval het.
Nellie Brand-Jonker – As Steinhoff ’n boete van R1,5 miljard moes betaal, sou hy sy deure moes sluit.
Dit is waarom die boete tot R53 miljoen verlaag is, het Brandon Topham, hoof van ondersoeke van die Gedragsowerheid vir die Finansiële Sektor (FSCA), Donderdag gesê.
Die FSCA het Donderdag aangekondig Steinhoff is ’n boete van R1,5 miljard opgelê, maar nadat versagtende omstandighede in ag geneem is, is dit na R53 miljoen verminder.
Die R53 miljoen is die grootste boete nóg wat ’n maatskappy vir die oortreding van die publikasie van vals en misleidende inligting opgelê is.
Topham het gesê hy was verras toe Steinhoff se aandeelprys aanvanklik ná die aankondiging oor die boete met 9% geval het.
“Ek het gedink die mark sou dit positief vind dat Steinhoff en die owerheid ’n ooreenkoms oor die kwessie bereik het omdat dit die onsekerheid van ons kant af verwyder. Daar is natuurlik ander reguleerders wat hulle nog moet hanteer.”
Die aandeelprys het later byna 4% hoër gesluit vir die dag.
Hy het gesê die afhandeling van die saak teen Steinhoff stel die maatskappy in staat om na sy krediteure te gaan. Mense wat siviele eise gebring het teen die groep, kan ook nou met ’n plan vorendag kom wat sal verseker dat die maatskappy oorleef.
Volgens hom is dit ’n voorstel wat Steinhoff op die tafel gesit het toe begin is om die omvang van die boete te bespreek.
“Ons was bereid om die vermindering van die boete te oorweeg. Een van die redes is dat hulle saamwerk met ons ondersoek ten opsigte van die werklike oortreders. As hulle ophou saamwerk, kan ons effektief die kwytskelding terugtrek. Dit is in hul belang om met ons saam te werk.”
Hoe is die boete van R1,5 miljard bepaal?
Volgens hom word geen riglyne in die wetgewing verskaf oor die bepaling van ’n boete vir die oortreding om vals en misleidende inligting aan die mark te gee nie.
“Die wet sê die straf moet so wees dat dit soortgelyke oortredings in die toekoms voorkom.” Die FSCA is “gelei deur die feit dat die finansiële state met meer as R150 miljard heraangegee is”.
Volgens hom beloop die boete omtrent 1% daarvan.
Hy maan egter dat maatskappye en oortreders dit nie moet gebruik as riglyn in die toekoms nie. Harmony is onlangs met R30 miljoen beboet vir ’n soortgelyke oortreding op ’n heraangewing van R250 miljoen.
“Elke saak sal op eie meriete oorweeg word.”
Hy het gesê dit was nie maklik om met die boete vorendag te kom nie en inaggenome die omvang van die heraangewing van die syfers moes dit dalk nader aan R50 miljard gewees het.
“Maar in belang van die voortbestaan van die maatskappy is dit gedoen.
“In ander omstandighede sou ons gevoel het ’n billike boete is R1,5 miljard. Maar as ons dit gedoen het, sou ons effektief die maatskappy toegemaak het.”
Hy het gesê “Steinhoff se illikiede posisie” is oorweeg. “Selfs om die R53 miljoen aan ons te betaal, gaan hulle seermaak.”
Dit is ook bo die drempel van die straf van R50 miljoen wat oortreders ingevolge die Wet op die Regulering van die Finansiële Sektor opgelê kan word as hulle strafregtelik vir die oortreding vervolg word.
“Ons wou seker maak dit is nie net in lyn met die strafregtelike maksimum nie, maar dat dit meer is, sodat die boodskap uiters duidelik is dat ons nie beperk word deur die R50 miljoen-drempel nie.”
Die Wet op die Regulering van die Finansiële Sektor stel die maksimum straf vir dié oortreding op R50 miljoen of tien jaar tronkstraf of albei.
Tog glo hy die R53 miljoen is baie meer as wat enige genoteerde maatskappy graag sal wil betaal.
“Die belangrikste beginsel wat ons toepas wanneer ons ’n boete bepaal, is om seker te maak dit oortuig ander spelers in die mark om aandag te gee aan die reëls.
“As dit lyk of dit baie onbillik teenoor aandeelhouers is dat hulle twee keer gestraf word, is dit terselfdertyd ’n boodskap aan aandeelhouers om te verstaan dat hulle verantwoordelik is vir die gedrag van die direkteure in wie hulle hul vertroue plaas.
“As ons geen boetes hef nie, is daar geen rede vir enige genoteerde maatskappy om seker te maak sy resultate is akkuraat en dat mense daarop kan staatmaak nie.” – Netwerk24
Dit is waarom die boete tot R53 miljoen verlaag is, het Brandon Topham, hoof van ondersoeke van die Gedragsowerheid vir die Finansiële Sektor (FSCA), Donderdag gesê.
Die FSCA het Donderdag aangekondig Steinhoff is ’n boete van R1,5 miljard opgelê, maar nadat versagtende omstandighede in ag geneem is, is dit na R53 miljoen verminder.
Die R53 miljoen is die grootste boete nóg wat ’n maatskappy vir die oortreding van die publikasie van vals en misleidende inligting opgelê is.
Topham het gesê hy was verras toe Steinhoff se aandeelprys aanvanklik ná die aankondiging oor die boete met 9% geval het.
“Ek het gedink die mark sou dit positief vind dat Steinhoff en die owerheid ’n ooreenkoms oor die kwessie bereik het omdat dit die onsekerheid van ons kant af verwyder. Daar is natuurlik ander reguleerders wat hulle nog moet hanteer.”
Die aandeelprys het later byna 4% hoër gesluit vir die dag.
Hy het gesê die afhandeling van die saak teen Steinhoff stel die maatskappy in staat om na sy krediteure te gaan. Mense wat siviele eise gebring het teen die groep, kan ook nou met ’n plan vorendag kom wat sal verseker dat die maatskappy oorleef.
Volgens hom is dit ’n voorstel wat Steinhoff op die tafel gesit het toe begin is om die omvang van die boete te bespreek.
“Ons was bereid om die vermindering van die boete te oorweeg. Een van die redes is dat hulle saamwerk met ons ondersoek ten opsigte van die werklike oortreders. As hulle ophou saamwerk, kan ons effektief die kwytskelding terugtrek. Dit is in hul belang om met ons saam te werk.”
Hoe is die boete van R1,5 miljard bepaal?
Volgens hom word geen riglyne in die wetgewing verskaf oor die bepaling van ’n boete vir die oortreding om vals en misleidende inligting aan die mark te gee nie.
“Die wet sê die straf moet so wees dat dit soortgelyke oortredings in die toekoms voorkom.” Die FSCA is “gelei deur die feit dat die finansiële state met meer as R150 miljard heraangegee is”.
Volgens hom beloop die boete omtrent 1% daarvan.
Hy maan egter dat maatskappye en oortreders dit nie moet gebruik as riglyn in die toekoms nie. Harmony is onlangs met R30 miljoen beboet vir ’n soortgelyke oortreding op ’n heraangewing van R250 miljoen.
“Elke saak sal op eie meriete oorweeg word.”
Hy het gesê dit was nie maklik om met die boete vorendag te kom nie en inaggenome die omvang van die heraangewing van die syfers moes dit dalk nader aan R50 miljard gewees het.
“Maar in belang van die voortbestaan van die maatskappy is dit gedoen.
“In ander omstandighede sou ons gevoel het ’n billike boete is R1,5 miljard. Maar as ons dit gedoen het, sou ons effektief die maatskappy toegemaak het.”
Hy het gesê “Steinhoff se illikiede posisie” is oorweeg. “Selfs om die R53 miljoen aan ons te betaal, gaan hulle seermaak.”
Dit is ook bo die drempel van die straf van R50 miljoen wat oortreders ingevolge die Wet op die Regulering van die Finansiële Sektor opgelê kan word as hulle strafregtelik vir die oortreding vervolg word.
“Ons wou seker maak dit is nie net in lyn met die strafregtelike maksimum nie, maar dat dit meer is, sodat die boodskap uiters duidelik is dat ons nie beperk word deur die R50 miljoen-drempel nie.”
Die Wet op die Regulering van die Finansiële Sektor stel die maksimum straf vir dié oortreding op R50 miljoen of tien jaar tronkstraf of albei.
Tog glo hy die R53 miljoen is baie meer as wat enige genoteerde maatskappy graag sal wil betaal.
“Die belangrikste beginsel wat ons toepas wanneer ons ’n boete bepaal, is om seker te maak dit oortuig ander spelers in die mark om aandag te gee aan die reëls.
“As dit lyk of dit baie onbillik teenoor aandeelhouers is dat hulle twee keer gestraf word, is dit terselfdertyd ’n boodskap aan aandeelhouers om te verstaan dat hulle verantwoordelik is vir die gedrag van die direkteure in wie hulle hul vertroue plaas.
“As ons geen boetes hef nie, is daar geen rede vir enige genoteerde maatskappy om seker te maak sy resultate is akkuraat en dat mense daarop kan staatmaak nie.” – Netwerk24
Kommentaar
Republikein
Geen kommentaar is op hierdie artikel gelaat nie