Boeta lê swak punt bloot in nuwe inskop-reël, sê Erasmus

Wim Pretorius – Toe die Haaie-losskakel Boeta Chamberlain Vrydagaand in Swansea met sy derde skepdoel teen die Ospreys in hul stryd in die Verenigde Rugbykampioenskap (VRK) slaag, was die vraag wat afrigters sekerlik gevra het: “Waarom het ons nie daaraan gedink nie?”Sean Erasmus, wat Chamberlain as skoolseun by die Hoër Jongenskool Paarl (Boishaai) gebrei het, glo dié losskakel het ’n potensiële swak punt in Wêreldrugby se nuwe proefreëls gevind.“Ek was gek oor die wyse waarop hy die bal oor die voordeellyn gedra het. Van daar af is die verdediging besig gehou en dan natuurlik die geleenthede wat hy aangegryp het met sy skepdoele,” het Erasmus Maandag gesê.“Daar is baie min spanne wat daardie kans al benut het met die nuwe inskop-reël – om ’n skepdoel deur die pale te jaag – en dit was ’n briljante benadering deur die Haaie en Boeta.”Chamberlain, wat in 2016 en 2017 deel was van die Paarliete se oorwinningstog, het Vrydagaand, toe die Haaie ná 19 minute met 0-6 agter was, sy eerste skepdoel reg voor die pale oorgeklits met die besoekers op die aanval.Ses minute later het die tuisspan van agter hul doellyn ingeskop, soos wat die nuwe proefreël bepaal, maar Chamberlain het dit gevang en koelkop sy tweede skepdoel tussendeur die pale gejaag om sake met 6-6 gelykop te maak.Die telling het so gebly tot rustyd, waarna Chamberlain kort ná die begin van die tweede helfte met ’n perfek geplaaste rolskop vorendag gekom het. Die slot Hyron Andrews het dit opgepik en op skitterende wyse aan die senter Jeremy Ward besorg om onaangeraak oor te seil vir die eerste drie van die wedstryd.In die 61ste minuut het die Ospreys se losskakel, Gareth Anscombe, weer ’n inskop van sy doellyn af waargeneem, net vir Chamberlain om sy derde skepdoel deur die pale te jaag om die telling 21-6 in die KwaZulu-Natallers se guns te maak.“Die Haaie het sekerlik ’n swak punt blootgelê met die nuwe reël. As ’n span die bal in die middel van die veld gaan afskop, gaan dit vir hulle ’n tydjie neem voordat hul verdedigers by jou kan uitkom. Die meeste hedendaagse losskakels kan ’n skepdoel vanaf die 10 m-stippellyn oorsit,” sê Erasmus.“Dit was tot dusver baie verbasend dat meer spanne nie daaraan gewerk het om die bal middel toe te neem en ’n paar shots te vat nie.“As jy die bal oor die doodlyn skop, word spel in elk geval hervat met jou teenstander wat die bal van sy eie doellyn af moet inskop. Dis eintlik ’n bonus-geleentheid om drie punte aan te teken.”Oor Chamberlain, wat vir Boishaai as rugby- en krieketster uitgeblink het, is Erasmus liries.“Boeta is ’n spesiale speler. Hy val die voordeellyn aan, het baie afwisseling in sy spel en het ’n uitmuntende rugby-kop.“Daardie skopvoet van hom . . . baie mense praat oor hoe ver ander spelers die bal kan sool en Boeta is deel van daardie geselskap.”Oor gerugte dat Erasmus binnekort ’n terugkeer na Boishaai kan maak, het hy bevestig dat hy tans met die skool onderhandel.“Daar is nog niks finaal vasgemaak nie. Daar word nog gesels,” sê hy.“Ek is baie lief vir skolerugby en ek het dit al hoe meer begin besef. As die geleentheid hom voordoen, sal dit wonderlik wees om terug te gaan.”FOTO’sBoeta Chamberlain stuur een van sy skepdoele teen die Ospreys pale toe. Foto Gallo ImagesSean Erasmus glo die Leeus is op die regte pad met hul verdediging, al staan die span tot dusver te veel drieë af. Foto Gallo Images

Boeta lê swak punt bloot in nuwe inskop-reël, sê Erasmus

Kommentaar

Republikein 2025-12-16

Meld asseblief aan om kommentaar te lewer

Boeta lê swak punt bloot in nuwe inskop-reël, sê Erasmus

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.