Boekwurm se liefde werp vrugte af

'n Eerste vir Namibië

04 June 2021 | Kuns en vermaak
Tanja Bause – “My kortverhaal Granddaughter of the Octopus het geskiedenis gemaak as die eerste Namibiese inskrywing wat die kortlys van die Statebond-kortverhaalprys haal.

“Dit is saam met 25 ander stories van Afrika en die res van die wêreld op die lys en die algehele wenner sal op 30 Junie aangekondig word. Die kortverhaal het ook die plaaslike prys vir Afrika gewen – nóg 'n eerste vir Namibië,” vertel die skrywer Rémy Ngamije.

Die 33-jarige Rémy is in Kigali, Rwanda, gebore, maar het toe hy een jaar oud was saam met sy familie na Namibië verhuis.

“Windhoek-Wes is wat ek my tuiste noem. Dit is daar waar ek die meeste van my kinderavonture en -pret gehad het,” het hy vertel.

Op laerskool was hy by die Holy Cross Convent voordat hy sy hoër­skoolloopbaan by St. Paul's College voltooi hety.

“Ek was 'n baie stout kind in graad 8. Die meeste van die tyd moes ek detensie sit, totdat ek my ingesteldheid later verbeter en begin het om my skoolwerk ernstig op te neem.

“Op laerskool én hoërskool was Engels en veral literatuur en komponente vir kreatiewe skryfwerk my gunstelingvakke.”

Ná skool het hy boubestuur by die Universiteit van Kaapstad gaan studeer, met die voorneme om in sy tweede jaar na siviele ingenieurs­wese oor te skuif.

“Maar ek het besluit om liewers 'n BA-graad in Engels en 'n regsgraad eerste te gaan doen. Ek het my LLB voltooi. Die res van my loopbaan is 'n kaleidoskoop van verwarring en gedeeltelike helderheid. Ek het gewerk in advertensies, bemarking, Engelse onderwys . . . ek het ook 'n paar vreemde besighede gehad voordat ek my huidige droom aangepak het: die skepping en die ontwikkeling van literatuur.”

Volgens hom was hy nog altyd in literatuur geïnteresseerd. Hy en sy broers en susters was baie tuis in die openbare biblioteek van Windhoek.

“Almal in my familie lees graag. My ouers het nooit vir my of my broers en susters iets ontneem nie, mits dit in 'n boek was.

“Die biblioteek was vir ons soos 'n dag­sorgsentrum. Ons het vele middae en Saterdagoggende daar deurgebring. Ons het letterlik tussen die boekrakke grootgeword.

“Al my broers en susters is goeie skrywers. Maar ek dink ek is die enigste wat daarin belang gestel het om 'n storie te vertel en dus het ek 'n loopbaan as skrywer begin volg.”

Rémy wou nog altyd stories vertel, veral vandat sy onderwysers in graad 2 en 3 boeke voorgelees het.

“Ek het nie geweet ek wil skryf nie, maar ek wou fantastiese stories op die een of ander manier vertel. Ek kan nie sing of musiek maak nie, Tik Tok het nog nie bestaan nie en skryf was tot my beskikking.

“Op skool het ek altyd uitgesien na die lees- en skryfklasse. Ek het 'n baie lang lys van toegewyde onderwysers wat my vanaf graad 2 tot my laaste hoërskooldae geleer en aangemoedig het om te skryf. Dan was daar ook die vriendelike bibliotekaresses wat my altyd gehelp het om nuwe boeke te ontdek. Sonder al dié ondersteunende mense sou my skryfwerk nie gewees het waar dit tans is nie.”

Volgens Rémy kom sy idees vir sy boeke van dinge wat hy gesien, gehoor, ondervind, gelees of oor nagedink het.

“Die lewe het geen tekort aan absurde situasies wat 'n storie of twee werd is. Dit is moeilik om te weet waar realiteit begin en waar dit ophou. So, ek hoop dit maak bietjie sin as ek sê ek weet nie waar my stories vandaan kom nie, maar ek weet hoe dit vertel sal word: deur my skryfwerk en deur my.”



LITERÊRE TYDSKRIF

Sy ander skepping waarvoor Rémy bekend is, is Doek.

“Doek is 'n onafhanklike kunsorganisasie wat gestig is om literêre kunste in Namibië te ondersteun. Doek is die somtotaal van my ver­skillende professionele loopbane en kreatiewe ambisie.

“Doek wil, gelei deur 'n kunssinnige gees, 'n plaaslik aangepaste, sosiaal verantwoordelike en deursigtige model vir kunsfinansiering in Namibië wees.

“Die huidige projekte is om Doek! Literary Magazine (Namibië se eerste en enigste literêre tydskrif –www.doeklitmag.com) te publiseer en werksessies oor kreatiewe skryfwerk aan te bied.”

Doek het sy oorsprong in Doek!, 'n literêre tydskrif wat Rémy en Mutaleni Nadimi in 2019 gestig het om die werke van die Windhoek Writers Club te publiseer.

“Ons het aan baie name gedink en Doek! was vir ons die coolste. Doek is die fonetiese klank aan die einde van Windhoek. Doek is nou veel groter as die tydskrif.”

Rémy het sover een boek en 26 kortverhale gepubliseer. Van sy kortverhale is in Spaans, Portugees en Italiaans vertaal.- [email protected]

Soortgelyk

 

Rowers buit byna ‘n miljoen in Walvisbaai

5 ure gelede | Misdaad

Die Namibiese polisie het bevestig gewapende rowers het vanoggend by Pupkewitz MegaBuild in Walvisbaai N$943 616,84 gesteel.Vyf mans – twee van hulle was gewapen –...

J&J nou Namibiërs se eerste keuse

6 ure gelede | Gesondheid

Sedert die Janssen-entstof teen Covid-19, ontwikkel vir die farma-reus Johnson & Johnson, in Namibië aangeland het, het dit die eerste keuse vir immunisering in die...

Karweier se werkers voor staakdeur

8 ure gelede | Vervoer

‘n Hernude weiering van ‘n salarisverhoging vir werkers van die nasionale karweier, TransNamib, het daartoe gelei dat die kantoor van die arbeidskommissaris onderhandelinge by die...

Jongste data: Covid-19

19 ure gelede | Gesondheid

Vyf-en-veertig nuwe gevalle van Covid-19 is vanmiddag deur gesondheidsowerhede bevestig.Van die nuwe positiewe toetsuitslae vir Donderdag was 12 skoliere, een ‘n onderwyser en twee gesondheidswerkers.Die...

Pfizer vandag in Namibië verwag

1 dag gelede | Gesondheid

Die Covid-entstof Pfizer word vandag in Namibië verwag. Volgens die hoof van die Namibiese taakspan vir die land se immuniseringsveldtog, me. Petronella Masabane, kom 100...

Forklifting failure

1 dag gelede |

Natasja ByleveldAre you OK thinking about unconventional ideas that could uplift society and norms to a higher standard? Do you like a challenge, or do...

Big thinker who is not afraid of taking risks

1 dag gelede | Mense

Contrasting with his considered, analytical, and steady approach to life, Rolf Mendelsohn is an undisputed adventurer. Together with the other founders of Paratus, Rolf...

'Polisiebeampte' pers dokter glo af

1 dag gelede | Howe

Henriette Lamprecht – ’n Windhoekse dokter is glo afgedreig totdat hy N$30 000 opgedok het nadat hy na bewering deur ’n klaarblyklike polisiebeampte van die...

Miss Aston dra die kroon

1 dag gelede | In beeld

Cobus van der Merwe van St. Blaize Brahman & Sussex Studs gister by die Gobabis Skou saam met sy “Kampioen van kampioene”, Miss Aston 134-12....