Bluesmusikant veg verbete vir sy kitaar

Augetto Graig - Die bluesmusikant Riaan Smit, voorsanger van die Crimson House Blues, moes gistermiddag inderhaas Kaap toe vlieg vir ’n gesigoperasie. Hy en kollegas in die musiekbedryf is Vrydagmiddag laat naby die weegbrug by Elisenheim buite Windhoek in die berge by ’n stroompie aangeval en beroof. Sy medemusikant, die vioolspeler me. Luca Hart, asook die filmmakers me. Liberty Lister Verbaan, mnr. Renier de Bruyn en mnr. Laurent Hesemans, was teenwoordig. Volgens Lister Verbaan was die groep van halfvier die middag af besig om musiekvideo’s in die verlate gebied te skiet as deel van Endemic Productions se reeks produksies wat aan plaaslike musikante die gratis geleentheid bied om op die klein skerm met die beste in die wêreld te kompeteer. Hulle was kort voor vyf besig om op te pak toe vyf mans, met messe gewapen, uit die bosse verskyn en hulle oorrompel het.Smit het probeer terugbaklei - veral om sy kosbare kitaar te red. Gelukkig kom hy sy arm lig en is toe in die elmboog gesteek in plaas van in sy bors, vertel Lister Verbaan. Smit is ook met ’n klip in die gesig geslaan, wat sy skedel gekraak het en sy kakebeen gebreek het. “Ons is almal gedwing om tussen die kameeldorings op die grond te lê, maar Riaan het met die rowers aanhou praat. Daai kitaar is sy lewe. Dit het hulle net aggressiewer gemaak, maar hy het daarop aangedring dat hy sy kitaar moet behou, omdat hy daarmee vir die Here musiek maak,” sê sy. Lister Verbaan is self in die voorval in die gesig geslaan, en Hesemans is geskop. Die skurke het toe wel Smit se kitaar agtergelaat. Hulle het ook nie kredietkaarte of karsleutels gebuit nie.Videotoerusting ter waarde van byna ’n half miljoen dollar is egter wel gesteel, asook juwele en selfone. Ná die voorval het die groep met ’n bebloede Smit Windhoek toe gejaag.’n Barmhartige samaritaan het die polisie van die voorval in kennis gestel.Smit is in die Windhoek Medi-Clinic private hospitaal opgeneem en is laat Vrydagaand ontslaan. Die Namibiese polisie se spesiale magte het die slagoffers by die hospitaal besoek en is tans op die rowers se spoor. Smit en Hart was vir ’n vertoning Vrydagaand by die Warehouse-teater bespreek, maar moes dit kanselleer. Die Warehouse-teater se bestuur het gesê hulle staan die kunstenaars by en het onderneem om aanhangers wat reeds kaartjies bespreek het, te vergoed.Intussen word ’n beroep op die publiek gedoen om op die uitkyk te wees vir die gesteelde videotoerusting.Weens die verlies is die toekoms van die produksiehuis onseker wat verskeie Namibiese kunstenaars soos Elemotho, Slickarty, Shishani en Tonetic internasionaal bevorder het.

Bluesmusikant veg verbete vir sy kitaar

Kommentaar

Republikein 2025-05-01

Meld asseblief aan om kommentaar te lewer

Bluesmusikant veg verbete vir sy kitaar

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie