‘Blougoud’ perk ekonomie in
Elvira Hattingh
Die Namibiese Handelsforum (NTF) is bekommerd oor handelsvooruitsigte in die volgende agt jaar waartydens Windhoek meer gereelde watertekorte kan ervaar terwyl aan alternatiewe waterbronne gewerk word.
Die forum het ook die hoop uitgespreek dat die regering binnekort ’n waternoodtoestand sal aankondig en geld beskikbaar sal stel sodat beplande projekte van stapel gestuur kan word. Verder wou hulle weet hoe hulle kan help om die proses te versnel omdat die watertekort reeds vereis het dat hul onmiddellike planne vir groei en ontwikkeling uitgestel moes word.
Hulle is bekommerd oor ’n stilstand in besigheid, ontwikkeling en uitbreiding van agt tot tien jaar. Dit is hoe lank dit kan neem om infrastruktuur te ontwikkel wat water van die Kavangorivier en ontsoute water van die kus na Windhoek te bring.
NTF-lede, wat verteenwoordigers van onder meer Meatco, Namibia Poultry Indistries (NPI), Ohlthaver & List, die Kamer van Myne, SABMiller, Namibië Brouerye (NBL) en Namibia Dairies insluit, het gister met die ministerie van landbou, water en bosbou, die munisipaliteit en NamWater oor die impak van die waterkwessie op nywerhede vergader.
“Ons het nodig om sakebesluite te neem en wil betrokke raak om die proses te kan versnel,” het lede gesê. Ander wou weet of hulle elders in die land na uitbreidingsmoontlikhede moet kyk en nog lede het gesê opsies moet ondersoek word om Windhoek se uitbreiding te beheer.
‘Blougoud’
Mnr. Willem Venter, NamWater se hoof van beplanning en waterbronbestuur, het gesê water is die “blougoud” wat ekonomiese groei moontlik maak, maar dat ’n gebrek daaraan dit sal inperk.
“Uiterste maatreëls om water te bespaar, is nodig om die volgende reënseisoen te haal.”
Volgens hom sluit dringende oplossings in dat die regering ’n waternoodtoestand moet verklaar en dat geld so gou as moontlik beskikbaar gestel word sodat begin kan word met werk om meer water na Sentraal Namibië te vring.
“’n Belegging van sowat N$10 miljard sal nodig wees om meer water vir Sentraal Namibië beskikbaar te stel – dit sluit net die koste van nuwe infrastruktuur in. ’n Verdere N$14 miljard word benodig om noodsaaklike, afgeleefde infrastruktuur te herstel en te vervang. ’n Totaal van N$24 miljard word dus dringend benodig.
“Verder sal N$50 miljoen bestee moet word om die gehalte van Swakoppoortdam se water te verbeter. Von Bachdam se watergehalte moet ook verbeter en beskerm word. Die nuwe Goreangab-herwinningsaanleg vir afvalwater moet uitgebrei word, terwyl die Gammans-aanleg vir afvalwater ook teen N$1 025 miljoen opgegradeer moet word.”
Op vrae van hoe lank dit gaan neem voor die planne uitgevoer kan word, het Venter gesê dit hang af van hoe vinnig geld beskikbaar gestel word.
“Sodra geld beskikbaar is, hoop ons dat die Kavango-projek binne ses tot agt jaar voltooi kan word. Ons wil ook meer gespesialiseerde pompe in die Noordemyne aanbring, maar ons versoek vir geld van ’n jaar gelede is steeds nog onbeantwoord,” het Venter gesê. NTF-lede wou onder meer weet hoe die waterscenario sal lyk sodra die damme opdroog wat Windhoek van water voorsien. Daarop het NamWater gesê dit sal sover moontlik ononderbroke watertoevoer na Windhoek wil verseker, al beteken dit dat slegs 60% daarvan nog gelewer kan word.
Ontwikkel akwifer eerste
Windhoek-munisipaliteit se strategiese uitvoerende hoof van infrastruktuur, water en tegniese dienste, mnr. Pierre van Rensburg, sê Windhoek het oor die afgelope drie maande 26% water bespaar. Tans word 18% van alle drinkwater hergebruik, terwyl 5% gryswater ook hergebruik word.
“Die akwifer lewer tans sowat 19% van die water wat in Windhoek gebruik word en indien ons planne met die akwifer suksesvol uitgevoer word, sal ’n verdere 20% daaruit verhaal kan word.
“Gebaseer op die waterscenario van die afgelope maande, gaan Windhoek steeds 32% van sy watertoever van NamWater of elders moet kry. Die hoop bestaan dat NamWater nog sowat 10% water uit die Noorde sal kan lewer.
Volgens Van Rensburg ontvang die munisipaliteit onder normale omstandighede maandeliks 76% van sy water van NamWater. Sodra die damme opdroog wat Windhoek van water voorsien, sal dié persentasie water elders gevind moet word.
Van Rensburg het gesê die munisipaliteit is van mening dat plaaslike waterbronne soos die akwifer eers ten volle ontwikkel moet word voor verdere projekte aangepak word.
“Ons moet eers plaaslike hulpbronne optimaal gebruik. Ons het nie die nodige infrastruktuur om toegang te kry tot die akwifer wat na raming tans 80% vol is nie.
“Die munisipaliteit het reeds geld hieraan bestee, geld wat dit nie het nie. Sowat N$215,5 miljoen is reeds daarin gesteek, wat insluit om onder meer boorgate te boor en te ontwikkel. Die projek sal in totaal N$710 miljoen kos.
“Tans lewer Windhoek se boorgate sowat 4,1 Mm³ per jaar, terwyl die munisipaliteit hoop om met die bou van infrastruktuur teen volgende jaar 8,2 Mm³ water daaruit te onttrek. Hierdie is egter bó die aanbevole volhoubare vlak van 1 Mm³ per jaar omdat die akwifer in ’n gemiddelde reënjaar op natuurlike wyse net 1,7 Mm³ water ontvang,” het Van Rensburg gesê.
Die Namibiese Handelsforum (NTF) is bekommerd oor handelsvooruitsigte in die volgende agt jaar waartydens Windhoek meer gereelde watertekorte kan ervaar terwyl aan alternatiewe waterbronne gewerk word.
Die forum het ook die hoop uitgespreek dat die regering binnekort ’n waternoodtoestand sal aankondig en geld beskikbaar sal stel sodat beplande projekte van stapel gestuur kan word. Verder wou hulle weet hoe hulle kan help om die proses te versnel omdat die watertekort reeds vereis het dat hul onmiddellike planne vir groei en ontwikkeling uitgestel moes word.
Hulle is bekommerd oor ’n stilstand in besigheid, ontwikkeling en uitbreiding van agt tot tien jaar. Dit is hoe lank dit kan neem om infrastruktuur te ontwikkel wat water van die Kavangorivier en ontsoute water van die kus na Windhoek te bring.
NTF-lede, wat verteenwoordigers van onder meer Meatco, Namibia Poultry Indistries (NPI), Ohlthaver & List, die Kamer van Myne, SABMiller, Namibië Brouerye (NBL) en Namibia Dairies insluit, het gister met die ministerie van landbou, water en bosbou, die munisipaliteit en NamWater oor die impak van die waterkwessie op nywerhede vergader.
“Ons het nodig om sakebesluite te neem en wil betrokke raak om die proses te kan versnel,” het lede gesê. Ander wou weet of hulle elders in die land na uitbreidingsmoontlikhede moet kyk en nog lede het gesê opsies moet ondersoek word om Windhoek se uitbreiding te beheer.
‘Blougoud’
Mnr. Willem Venter, NamWater se hoof van beplanning en waterbronbestuur, het gesê water is die “blougoud” wat ekonomiese groei moontlik maak, maar dat ’n gebrek daaraan dit sal inperk.
“Uiterste maatreëls om water te bespaar, is nodig om die volgende reënseisoen te haal.”
Volgens hom sluit dringende oplossings in dat die regering ’n waternoodtoestand moet verklaar en dat geld so gou as moontlik beskikbaar gestel word sodat begin kan word met werk om meer water na Sentraal Namibië te vring.
“’n Belegging van sowat N$10 miljard sal nodig wees om meer water vir Sentraal Namibië beskikbaar te stel – dit sluit net die koste van nuwe infrastruktuur in. ’n Verdere N$14 miljard word benodig om noodsaaklike, afgeleefde infrastruktuur te herstel en te vervang. ’n Totaal van N$24 miljard word dus dringend benodig.
“Verder sal N$50 miljoen bestee moet word om die gehalte van Swakoppoortdam se water te verbeter. Von Bachdam se watergehalte moet ook verbeter en beskerm word. Die nuwe Goreangab-herwinningsaanleg vir afvalwater moet uitgebrei word, terwyl die Gammans-aanleg vir afvalwater ook teen N$1 025 miljoen opgegradeer moet word.”
Op vrae van hoe lank dit gaan neem voor die planne uitgevoer kan word, het Venter gesê dit hang af van hoe vinnig geld beskikbaar gestel word.
“Sodra geld beskikbaar is, hoop ons dat die Kavango-projek binne ses tot agt jaar voltooi kan word. Ons wil ook meer gespesialiseerde pompe in die Noordemyne aanbring, maar ons versoek vir geld van ’n jaar gelede is steeds nog onbeantwoord,” het Venter gesê. NTF-lede wou onder meer weet hoe die waterscenario sal lyk sodra die damme opdroog wat Windhoek van water voorsien. Daarop het NamWater gesê dit sal sover moontlik ononderbroke watertoevoer na Windhoek wil verseker, al beteken dit dat slegs 60% daarvan nog gelewer kan word.
Ontwikkel akwifer eerste
Windhoek-munisipaliteit se strategiese uitvoerende hoof van infrastruktuur, water en tegniese dienste, mnr. Pierre van Rensburg, sê Windhoek het oor die afgelope drie maande 26% water bespaar. Tans word 18% van alle drinkwater hergebruik, terwyl 5% gryswater ook hergebruik word.
“Die akwifer lewer tans sowat 19% van die water wat in Windhoek gebruik word en indien ons planne met die akwifer suksesvol uitgevoer word, sal ’n verdere 20% daaruit verhaal kan word.
“Gebaseer op die waterscenario van die afgelope maande, gaan Windhoek steeds 32% van sy watertoever van NamWater of elders moet kry. Die hoop bestaan dat NamWater nog sowat 10% water uit die Noorde sal kan lewer.
Volgens Van Rensburg ontvang die munisipaliteit onder normale omstandighede maandeliks 76% van sy water van NamWater. Sodra die damme opdroog wat Windhoek van water voorsien, sal dié persentasie water elders gevind moet word.
Van Rensburg het gesê die munisipaliteit is van mening dat plaaslike waterbronne soos die akwifer eers ten volle ontwikkel moet word voor verdere projekte aangepak word.
“Ons moet eers plaaslike hulpbronne optimaal gebruik. Ons het nie die nodige infrastruktuur om toegang te kry tot die akwifer wat na raming tans 80% vol is nie.
“Die munisipaliteit het reeds geld hieraan bestee, geld wat dit nie het nie. Sowat N$215,5 miljoen is reeds daarin gesteek, wat insluit om onder meer boorgate te boor en te ontwikkel. Die projek sal in totaal N$710 miljoen kos.
“Tans lewer Windhoek se boorgate sowat 4,1 Mm³ per jaar, terwyl die munisipaliteit hoop om met die bou van infrastruktuur teen volgende jaar 8,2 Mm³ water daaruit te onttrek. Hierdie is egter bó die aanbevole volhoubare vlak van 1 Mm³ per jaar omdat die akwifer in ’n gemiddelde reënjaar op natuurlike wyse net 1,7 Mm³ water ontvang,” het Van Rensburg gesê.
Kommentaar
Republikein
Geen kommentaar is op hierdie artikel gelaat nie