Blou Bulle gaps die Prince van flanke

Andrew Poolman - Die Blou Bulle Maatskappy het nog ’n goeie aankoop uit Namibië gedoen deur die jong flank Prince !Gaoseb vir die volgende twee jaar te kontrakteer.Die matriekseun het vir die laaste twee jaar die Namibiese o.18-span by die Cravenweektoernooie op Stellenbosch en in Durban verteenwoordig.Sy inklimspel met sy gespierde 98 kilogram en 1.89 meter was ook ’n kenmerk van Samsung Windhoek Hoërskool se triomf om die Momentum onder 19 Superliga-trofee te herower.Op die harde, stowwerige rugbyvelde van die droogtegeteisterde Namibië het die vuil gesmeerde blou 6-trui breed in die pad van enige opponent gestaan – ongeag of die aanslag voorlangs of in die wyer kanale was.Henry Kemp, sy afrigter by WHS en die Cravenweekspan, het nog nooit sy bewondering vir die jong speler se talent en ingesteldheid weggesteek nie.“Prince is ’n ‘legend’. Almal hier by WHS is baie erg oor hom. Hy is ’n ideale voorbeeld vir enige jong rugbyspeler deur die manier waarop hy speel en oefen, asook hoe hy voor en ná die tyd optree. ’n Meer nederige persoon kry jy nie maklik nie. Altyd vriendelik en hy gee net sy beste as hy die blou trui oor sy kop trek. “Prince was ’n integrale deel van die suksesse wat WHS en die Cravenweekspan vanjaar behaal het. Sy fisieke invloed was enorm. Hy steek nie lyf weg nie en as hy jou raak duik, dan weet jy dit. “Ek sien met afwagting uit om sy vordering volgende jaar en die jare daarna dop te hou.”!Gaoseb het aan die koerant gesê hy was in graad sewe toe hy in die Laerskool Emma Hoogenhout begin rugby speel het.’n Mens kan seker sê rugby is in sy bloed – met naby familielede soos Denver Murorua (vleuel) en Joe Murorua (flank) wat reeds op die nasionale keurders se radar was. Denver het die Namibiese o.19-span verteenwoordig, terwyl Joe drie jaar gelede sy kans in ’n vriendskaplike wedstryd teen die SA Universiteitespan gekry het. Prince se ouer broer Glenn //Khoeseb speel ook by United-rugbyklub. Prince, wat op Omaruru gebore is, het in die Hoër Tegniese Skool se o.14- en o.15-spanne gespeel voordat hy in graad 10 dié skool se eerste span gehaal het.Dit was voordat Windhoek Hoërskool hom vir sy laaste twee skooljare ’n beurs aangebied het. Sy skuif na die Koedoebulle was ’n groot sukses vir beide partye.Reeds verlede jaar het sy spel by die Cravenweek navrae van die talentjagters uitgelok, maar as graad 11-seun was hy nog te jonk.Vanjaar het hy weer uitstaande spel by die Cravenweek gelewer en dit is waar sy eerste beroepskontrak aangebied is. Die Bulle het uiteindelik sy dienste beklink nadat daar ook belangstelling van die Goue Leeus en die Sharks was.“Om deel van die Cravenweek te wees, is ’n ongelooflike ervaring. Die entoesiasme van al die spelers is uit ’n ander wêreld. Die uitdaging om jou teen die bestes te meet en te wys wat jy kan doen, is ’n baie goeie geleentheid. As jy ’n visie het en genoeg selfvertroue het om jou drome na te jaag, kan jy enigiets bereik,” sê hy.LIGATRIOMFIn vanjaar se Momentum-liga het WHS ’n oorheersende seisoen beleef, afgesien van ’n enkele naelskraapse nederlaag (18-17) in ’n wegwedstryd teen die Walvisbaai Privaat Hoërskool en ’n gelykopwedstryd op Stampriet teen Elnatan.“Vroeg in die jaar kon ons reeds sien dat ons ’n baie goeie span het. Feitlik die helfte van die eerste span het van die vorige jaar oorgebly. Die feit dat ons mekaar reeds goed geken het, was die eerste faktor wat in ons guns getel het.“Die spangees is verder gebou by ’n oefenkamp voor die seisoen. Toe wen ons die ATKV rugbyfees van HTS en toe gaan toer ons in die Kaap en wen twee van ons vier wedstryde.“Drie keer hierdie jaar het ons teen Windhoek Gimnasium, die vorige jaar se kampioene, gewen. Die eerste keer in die vriendskaplike wedstryd op Gimmies se veld het ek en ons kaptein (die slot Rainer Augustyn) nie gespeel nie, maar die reserwes het hul kant gebring. Van daardie oomblik af het ons geweet dat as ons net aanhou hard werk en die intensiteit hoog hou, kan ons dié liga deur vat.”!Gaoseb sê WHS het geweet dat hy nooit Gimnasium se terugvegpoging kan onderskat nie. “Ons moes net aanhou glo en aanhou hard werk.”Harde werk sal ook sy resep bly om ’n sukses van sy tyd in Pretoria te maak.“My doelwit is om seker te maak dat my kontrak ná twee jaar verleng moet word om nog lank by die Bulle te speel, of dat ek raakgesien word met ander goeie aanbiedinge vir my rugbyloopbaan te verseker.”!Gaoseb sê hy wil sy waardering uitspreek teenoor elkeen wat hom deur sy loopbaan in skolerugby ondersteun het – spesifiek die afrigterspanne by Windhoek Hoërskool en HTS; mnre. Albert Arries en Eduard Mouton, sy ouers en familie.

Blou Bulle gaps die Prince van flanke

Kommentaar

Republikein 2026-10-15

Meld asseblief aan om kommentaar te lewer

Blou Bulle gaps die Prince van flanke

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.