Blokketting goed én sleg vir banke – só sê Moody's

Luidens 'n verslag wat Moody's Dinsdag uitgereik het, kan blokkettingtegnologie, wat die dryfveer agter digitale geld soos bitcoin is, banktransaksies wat oor grense heen plaasvind baie goedkoper en vinniger maak. Dit kan banke dus baie meer doeltreffend maak.

Terselfdertyd kan die tegnologie egter druk op bankgeld en -kommissie plaas.

Moody's kyk in dié verslag net na die geld en kommissie op oorgrenstransaksies, maar hy sê blokketting­tegnologie gaan 'n veel wyer invloed hê.

“Blokketting het die potensiaal om die manier hoe 'n wye verskeidenheid finansiële dienste gelewer word, wesenlik te verander,” sê Colin Ellis, Moody's se besturende direkteur verantwoordelik vir kredietstrategie.

Moody's reken banke wat in Switserland gesetel is, gaan waarskynlik die invloed van laer heffings en kommissie die meeste aan hul sak voel. Hulle verdien sowat 50% van hul inkomste uit heffings en kommissie op oorgrenstransaksies.

Italiaanse, Kanadese en Israeliese banke wat sowat 35% van hul geld en kommissie só verdien, sal ook swaar getref word, aldus Moody's. – Netwerk24