Blink plan vir plaaswerkers

Elvira Hattingh - Talle kommersiële boere het hulle verbind tot planne om plaaswerkers se woon- en ablusiegeriewe te verbeter, asook om sonkrag vir hulle te verskaf en hulle te help met aftreeplanne. Mnr. Danie van Vuuren, bestuurder van administrasie by die Namibië Landbou-unie (NLU) het tydends die NLU-kongres terugvoering gegee oor die Landbouwerkgewersvereniging (LWV) se plaaswerkerprojek. Die plan, wat intussen opgeneem is in die regering se implementeringsplan vir die 169 resolusies van die 2018 Nasionale Grondkonferensie, sal tot 2021 deur die LWV toegepas word. Die doel is om plaaswerkers se lewensomstandighede hiermee te verbeter asook om na aftreebehoeftes om te sien. Van Vuuren sê afgevaardigdes het vroeg vanjaar kommersiële landbouers regoor die land besoek en die projek is goed aanvaar. “Mense van oor die land kon die noodsaaklikheid van die projek insien en ondersteun die plan,” het Van Vuuren gesê.Elke boerevereniging in die land het nou ‘n streeksverteenwoordiger vir die projek.Intussen het talle boere hulle in ‘n opname verbind om oor die volgende drie jaar plaaswerkers se huise en ablusiegeriewe op te gradeer of in stand te hou, met sommiges wat aangedui het hulle gaan ook nuwe plaaswerkershuise bou. Talle het planne bekendgemaak om nuwe sonkragaanlegte by plaaswerkers se huise aan te bring.Van Vuuren sê die meerderheid het hulle verbind om met werkers te praat oor spaar- en aftreeplanne. Verskeie het aangedui hulle sal plaaswerkers help met aftreehuise. “Ek is verbaas om te sien hoeveel plaaswerkers het reeds erwe of huise in die naaste dorpe of nedersettings,” het Van Vuuren gesê. Hy het ook gesê die opname wys die meeste plaaswerkers het toegang tot televisie, sokkervelde en hulle het die reg om tuin te maak. “Talle het aangedui hul plaaswerkers het die reg om groentetuine aan te lê, hoenderboerderye te hê of vee op plase aan te hou,” het hy bygevoeg.Van Vuuren sê ‘n opname is uitgestuur om plaaseienaars sover te kry om hulle te verbind tot sekere doelwitte wat ‘n verskil in werknemers se lewens sal maak.Hy sê 71% van die NLU se boereverenigings het die opnamevorms ingevul en altesaam 348 vorms is terug ontvang. Van Vuuren sê dit volg nadat die LWV sy kongres in Junie aan dié spesifieke onderwerp gewy het. Daar is toe ook gedragskodes vir werkgewers ontwerp en goedgekeur. “Ons is ook besig om minimum behuisingsvereistes vir plaaswerkers op te stel,” het hy gesê. In die opname het talle kommersiële produsente aangedui die uitvoering van die planne om plaaswerkers se omstandighede te verbeter, hang van die reën af.

Blink plan vir plaaswerkers

Kommentaar

Republikein 2026-01-23

Meld asseblief aan om kommentaar te lewer

Blink plan vir plaaswerkers

Kommentaar

Republikein 2026-01-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.