Binne Namdia blink dit

Augetto Graig – Die media is onlangs ’n seldsame kans gegun om binne Namdia se spoggerige gebou te kuier. Namib Desert Diamonds (Namdia) is die nuutste staatsonderneming gemik op groter opbrengs vir Namibië en die regering uit die land se diamanthulpbron.Die gebou is besonders – nie net danksy die pragtige staal-standbeelde op die sypaadjie van dansende vroue wat van tyd tot tyd in tradisionele Namibiese drag versier word nie, maar ook weens die oënskynlike afwesigheid van ’n voordeur. Eerder as ’n voordeur, dien ’n groot, hoë swart hek met geëlektrifieseerde heining bo, as die hoofingangspunt. Sekuriteit word op hierdie perseel baie ernstig opgeneem.Mnr. Clarky McKay, hoofbestuur vir sekuriteit en veiligheid, en sy kollega mnr. Francis Eiseb het uitgebrei oor die verskeie sekuriteitsmaatreëls wat daar toegepas word; vanaf die gedurige video-toesig waarmee elke persoon dopgehou word, tot die koeëlvaste glas waaruit die vensters gemaak is, “sterk genoeg om ’n kortafstand skoot van ’n AK47 te weerstaan,” sê McKay. Eiseb het die noukeurige naspeuring van diamante op die perseel beklemtoon.Namdia koop direk vanaf NDTC, 15% van diamante wat jaarliks in Namibië gemyn word, teen die waarde bepaal deur De Beers, met wie die regering deur Namdeb, Debmarine Namibia en die Namibia Diamond Trading Company (NDTC) in vennootskap met diamantmynbou is.Volgens me. Lelly Usiku, hoof van verkope en bemarking, verkoop Namdia weer daardie diamante aan spesifieke kliënte, gekies op grond van die waarde wat hulle aan Namibiese diamante heg en die geleentheid wat hulle bied om Namibiese diamante verder te bemark. Gewoonlik, in tye sonder reisbeperkings, kom kliënte elke vyf weke om Namibiese diamante daar te koop. Die ophoop van diamante is ’n risiko wat vermy word deur kliënte te kies wat die voorraad kan opkoop, sê sy.Op die wêreldmark word diamante in pakkies verkoop. “Namibiese diamante was nooit (voor Namdia) uitsluitlik verkoop nie,” sê Usiku. Sy het uitgebrei oor die onbenutte waarde wat die glansende klippies steeds vir Namibië uithou. Namibiese diamante in 95% van edelsteen gehalte, sê sy. “Gegewe die feit dat Namibiese diamante van die beste gehalte is, word hulle gebruik as wat bekendstaan as ’n ‘soetmaakmiddel’. As jy ’n pakkie het en jy sit ’n Namibiese diamant by, verhoog jy die waarde van daai pakkie,” sê sy.“Daar is die Kimberley-proses vir sertifikasie, waardeur inligting vanaf diamantproduserende lande versamel word. As mens kyk na die wêreld se grootste produsente in 2019, kry jy Rusland boaan die lys, wat sowat 45,7 miljoen karaat vir die jaar geproduseer het. Hul prys per karaat is US$90. “Nader aan die huis het Botswana in 2019 sowat 22,7 miljoen karaat gelewer teen US$145 per karaat. “Vergelyk dit met Namibië waar minder as 2 miljoen karaat geproduseer is, maar die gemiddelde prys per karaat is tussen US$500 en US$550,” sê sy.Usiku voeg trots by dat Namdia sedert sy bestaan in 2016 elke jaar ’n finansiële jaarverslag saamgestel het, en in 2018 en 2019 dividende aan die regering betaal het.“Laas jaar het die winsbedrag skerp geval, weens spesifieke uitdagings in die bedryf,” sê sy.Nogtans het verkope ná die nasionale Covid-19 inperking verbeter, sê sy oor 2020. Tans bestaan Namdia uit net 24 werknemers, wat die maatskappy “lean and mean” maak, sê Usiku. Tog, met die onlangse aankoop van die huis langs die bestaande hoofkantoor, vorder planne vir uitbreiding, sê sy.– augetto@republikein.com.na

Binne Namdia blink dit

Kommentaar

Republikein 2025-12-16

Meld asseblief aan om kommentaar te lewer

Binne Namdia blink dit

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.