Bidvest spartel in verliesstroom
Met Namibië se ekonomie wat toenemend stroom-op swem, sukkel Bidvest Namibia om kop bo water te hou.
Jo-Maré Duddy - Weens die voortslepende storm oor viskwotas is beleggers in Bidvest Namibia Ltd teen die tyd gewoond aan rooi groeisyfers in dié plaaslik genoteerde maatskappy se finansiële resultate.
Die blóédrooisyfers in Bidvest Namibia se jongste halfjaarresultate is egter skokkend: Nie net die maatskappy se visbedrywighede nie, maar sy voertuigafdeling asook sy voedsel- en verspreidingbelange is deur Namibië se sukkelende ekonomie geslag.
In die vrystelling van die jongste resultate Vrydag op die Namibiese aandelebeurs (NSX) sê Bidvest Namibia ondanks sy “beste pogings” om omset te verhoog, het die handelswins in die meeste van sy afdelings gedaal. Uit die ses segmente waaruit Bidvest se sakebedrywighede bestaan, het net een groei in handelswins aangeteken.
Vir die ses maande tot einde Desember 2016 was Bidvest Namibia se handelswins 'n skrale N$21,8 miljoen, sowat N$97 miljoen minder as dieselfde halfjaar in 2015. Die maatskappy se netto wins het met sowat N$87,7 miljoen getuimel.
“Kontant gegenereer uit bedrywighede is negatief vir die eerste keer sedert Bidvest (in 2009) genoteer het,” sê Eloise du Plessis, analis en ekwiteitstrateeg van PSG Namibia, in haar kitsontleding van die jongste syfers. Kontant gegenereer in die ses maande onder oorsig is minus N$30,2 miljoen. Vir dieselfde halfjaar in 2015 was dié bedrag 'n positief van bykans N$102,5 miljoen.
Segmente
Bidvest sê sy visbedrywighede is steeds aan uitdagings van die “natuur en beleid” onderhewig, faktore wat buite sy beheer is. Omset vir die halfjaar tot einde 2016 is sowat 10,8% hoër as die ooreenstemmende tydperk in 2015. Vir die jongste halfjaar het Bidvest hier egter 'n bedryfsverlies van sowat N$9,2 miljoen gely vergeleke met 'n handelswins van bykans N$66,9 miljoen vir dieselfde ses maande in 2015.
Die voertuigsegment se handelswins was sowat N$3,8 miljoen laer. Bidvest sê dié resultate het “teleurgestel”. Dié syfers is geknou deur die vuisvoos verbruiker wat veel minder nuwe voertuie kan koop, die regering wat kwaai briek met sy aankope aangedraai het, asook stygende rentekoerse en inflasie.
“Die mark vir gebruikte voertuie het gevolglik herstel en het 'n goeie vertoning gelewer. Dit was egter nie genoeg om vir die algehele vertoning te vergoed nie,” sê Bidvest.
Die groep se voedsel- en verspreidingsegmente het “gefaal” om aan sy verwagtinge te voldoen. Hoewel omset hier met sowat 4% toegeneem het, is voorraadverwante koste 'n probleem, sê Bidvest. Vir die halfjaar onder oorsig het Bidvest 'n handelsverlies van sowat N$2,1 miljoen gely teenoor 'n handelswins van bykans N$16,3 miljoen in 2015.
“'n Spesifieke aksieplan is nou vir probleemareas beraam wat streng gemonitor sal word,” sê Bidvest.
Du Plessis sê die resultate vir vis en voertuie was te wagte. Die handelsverlies wat Bidvest se voedsel- en verspreidingafdeling gely het, laat egter “bedryfsvrae” ontstaan, sê sy. “Histories genereer Bidvest kontant en die negatiewe kontantvloei deur bedrywighede is kommerwekkend.”
Vooruitsig
Bidvest het nie veel om beleggers mee te paai nie.
“Daar is geen aanduiding dat die mark of die ekonomiese klimaat vinnig gaan herstel nie,” lui die resultaatverklaring.
Bedryfsuitdagings in alle afdelings sal getakel word en, waar nodig, sal stappe gedoen word om sake reg te ruk, sê Bidvest. Geleenthede vir nuwe vennootskappe in die visbedryf bestaan en sal nagejaag word. Aangesien dié afdeling steeds té veel kapasiteit het, sal nóg 'n boot verkoop word.
Bidvest sê die groep oorweeg steeds verkrygings, maar sal nou daarop fokus om sy huidige besigheid te behou en om bedryfstrukture en –prosesse te optimaliseer.
Die groep verwag die volgende ses maande se resulate sal 'n verbetering toon, sê Bidvest.
Bidvest Namibia het Vrydag op N$9,00 per aandeel op die plaaslike indeks van die NSX gesluit. Tot dusver vanjaar het die groep se aandeelprys reeds met 11,2% geval.
Die blóédrooisyfers in Bidvest Namibia se jongste halfjaarresultate is egter skokkend: Nie net die maatskappy se visbedrywighede nie, maar sy voertuigafdeling asook sy voedsel- en verspreidingbelange is deur Namibië se sukkelende ekonomie geslag.
In die vrystelling van die jongste resultate Vrydag op die Namibiese aandelebeurs (NSX) sê Bidvest Namibia ondanks sy “beste pogings” om omset te verhoog, het die handelswins in die meeste van sy afdelings gedaal. Uit die ses segmente waaruit Bidvest se sakebedrywighede bestaan, het net een groei in handelswins aangeteken.
Vir die ses maande tot einde Desember 2016 was Bidvest Namibia se handelswins 'n skrale N$21,8 miljoen, sowat N$97 miljoen minder as dieselfde halfjaar in 2015. Die maatskappy se netto wins het met sowat N$87,7 miljoen getuimel.
“Kontant gegenereer uit bedrywighede is negatief vir die eerste keer sedert Bidvest (in 2009) genoteer het,” sê Eloise du Plessis, analis en ekwiteitstrateeg van PSG Namibia, in haar kitsontleding van die jongste syfers. Kontant gegenereer in die ses maande onder oorsig is minus N$30,2 miljoen. Vir dieselfde halfjaar in 2015 was dié bedrag 'n positief van bykans N$102,5 miljoen.
Segmente
Bidvest sê sy visbedrywighede is steeds aan uitdagings van die “natuur en beleid” onderhewig, faktore wat buite sy beheer is. Omset vir die halfjaar tot einde 2016 is sowat 10,8% hoër as die ooreenstemmende tydperk in 2015. Vir die jongste halfjaar het Bidvest hier egter 'n bedryfsverlies van sowat N$9,2 miljoen gely vergeleke met 'n handelswins van bykans N$66,9 miljoen vir dieselfde ses maande in 2015.
Die voertuigsegment se handelswins was sowat N$3,8 miljoen laer. Bidvest sê dié resultate het “teleurgestel”. Dié syfers is geknou deur die vuisvoos verbruiker wat veel minder nuwe voertuie kan koop, die regering wat kwaai briek met sy aankope aangedraai het, asook stygende rentekoerse en inflasie.
“Die mark vir gebruikte voertuie het gevolglik herstel en het 'n goeie vertoning gelewer. Dit was egter nie genoeg om vir die algehele vertoning te vergoed nie,” sê Bidvest.
Die groep se voedsel- en verspreidingsegmente het “gefaal” om aan sy verwagtinge te voldoen. Hoewel omset hier met sowat 4% toegeneem het, is voorraadverwante koste 'n probleem, sê Bidvest. Vir die halfjaar onder oorsig het Bidvest 'n handelsverlies van sowat N$2,1 miljoen gely teenoor 'n handelswins van bykans N$16,3 miljoen in 2015.
“'n Spesifieke aksieplan is nou vir probleemareas beraam wat streng gemonitor sal word,” sê Bidvest.
Du Plessis sê die resultate vir vis en voertuie was te wagte. Die handelsverlies wat Bidvest se voedsel- en verspreidingafdeling gely het, laat egter “bedryfsvrae” ontstaan, sê sy. “Histories genereer Bidvest kontant en die negatiewe kontantvloei deur bedrywighede is kommerwekkend.”
Vooruitsig
Bidvest het nie veel om beleggers mee te paai nie.
“Daar is geen aanduiding dat die mark of die ekonomiese klimaat vinnig gaan herstel nie,” lui die resultaatverklaring.
Bedryfsuitdagings in alle afdelings sal getakel word en, waar nodig, sal stappe gedoen word om sake reg te ruk, sê Bidvest. Geleenthede vir nuwe vennootskappe in die visbedryf bestaan en sal nagejaag word. Aangesien dié afdeling steeds té veel kapasiteit het, sal nóg 'n boot verkoop word.
Bidvest sê die groep oorweeg steeds verkrygings, maar sal nou daarop fokus om sy huidige besigheid te behou en om bedryfstrukture en –prosesse te optimaliseer.
Die groep verwag die volgende ses maande se resulate sal 'n verbetering toon, sê Bidvest.
Bidvest Namibia het Vrydag op N$9,00 per aandeel op die plaaslike indeks van die NSX gesluit. Tot dusver vanjaar het die groep se aandeelprys reeds met 11,2% geval.
Kommentaar
Republikein
Geen kommentaar is op hierdie artikel gelaat nie