Bidvest: Hoop en bid vir beter dae

Jo-Maré Duddy – Slegte winsnuus is sedert 2013 niks nuuts vir Bidvest Namibia se beleggers nie, maar dié plaaslike genoteerde groep se jongste finansiële resultate gaan hulle behoorlik in sak en as laat.Bidvest Namibia se resultate vir die boekjaar tot einde Junie vanjaar toon ‘n handelswins van sowat N$92,5 miljoen, bykans N$202,4 miljoen minder as in 2016. Dit is die vyfde opeenvolgende boekjaar dat handelswins val. Dié afwaartse kurwe het in 2013 begin toe Bidvest Namibia se handelswins 7% minder as dié van 2014 was. Gemiddeld het die groep se handelswins van 2013 tot 2016 jaarliks met bykans 17,5% gedaal. Die 2017-boekjaar se handelswins wat met 68,6% getuimel het, is ‘n nuwe laagtepunt vir dié sukkelende groep.Bidvest Namibia se visbedrywighede is lankal nie meer sy enigste kopseer nie – die groep se ander afdelings veroorsaak veral sedert 2015 ook migraines.Die drie swaargewigte in Bidvest Namibia se stal – voedsel en verspreiding, vis en motors – se gesamentlike omset in 2017 was N$3,04 miljard, net bykans N$26,6 miljoen of 0,9% meer as in 2016.Dié drie segmente het vir ‘n gesamentlike handelswins van sowat N$54,7 miljoen gesorg, amper N$205 miljoen of 79% minder as in 2016.Sáám verteenwoordig die drie segmente bykans 81% van Bidvest Namibia se totale omset vir 2017 en sowat 59% van die groep se handelswins.In sy finansiële resultate wat Vrydag op die NSX bekend gemaak is, skryf Bidvest Namibia sy “teleurstellende jaar” aan die resessie toe.VoedselTaeuber & Corssen en Caterplus – die groep se voedsel- en verspreidingsegment – het die afgelope jaar ‘n handelsverlies van bykans N$8,1 miljoen gely. Dit is die eerste keer sedert Bidvest Namibia in 2009 op die plaaslike indeks van die Namibiese aandelebeurs (NSX) genoteer het dat dié segment ‘n handelsverlies toon. In 2016 het dit ‘n handelswins van bykans N$19,6 miljoen gemaak. Die hoogste handelswins sedert notering was bykans N$28,5 miljoen in 2013.Volgens Bidvest Namibia is die grootste probleem in dié segment voorraadverwante koste. ‘n Verbetering is egter sedert Junie bespeur, aldus bestuur. Die afdeling se omset vir 2017 was sowat N$1,2 miljard, ‘n skrale N$34,9 miljoen of 2,9% meer as in 2016. Dit is wel ‘n verbetering op groei van 0,3% in 2016 en -2,1% die vorige jaar.VisNaas die tuimeling van bykans 142% in voedsel en verspreiding se handelswins, het Bidfish die slegste gevaar. Dié afdeling se handelswins van amper N$39,9 miljoen in 2017 is bykans N$157,6 miljoen of 79,8% minder as in die 2016-boekjaar. Ook dit is persentasiegewys ‘n rekordval. Die gemiddelde jaarlikse daling in Bidfish se handelswins sedert 2013 is sowat 22%. Bidvest se omset uit vis in 2017 was sowat N$1,08 miljard, ongeveer N$7,3 miljoen of 0,7% minder as in 2016. Ook dit is heelwat beter as die reusedaling van bykans 28% in die 2016-syfers.Bidvest sê hy is in 2017 steeds deur “erge negatiewe eksterne markfaktore, omgewingstoestande en ‘n tekort aan eie kwotatoekennings” gery. Bykomende druk is deur ekstra heffings, die wisselkoers en markpryse meegebring.MotorsVerkope van nuwe motors wat skerp briek aangedraai het, het ook sy tol geëis. Vergeleke met 2016 het dié segment se handelswins met 46% tot net meer as N$23 miljoen geval. Dit is bykans N$19,6 miljoen minder as in 2016. Motors se omset was sowat N$54,1 miljoen of 7,2% minder op N$701,01 miljoen. Bidvest Namibia skryf die swak vertoning van dié relatiewe nuwe segment aan laer verbruikersbesteding toe. Die mark vir tweedehandse motors het betreklik goed gevaar, maar dit kon nie vir trae verkope van nuwe motors vergoed nie.Bidvest Namibia sê pogings word aangewend om die groep se afhanklikheid van die segment vir nuwe motors te verlaag.VooruitsigBidvest Namibia sê daar is tans geen aanduiding dat die groep se marksegmente of die ekonomiese klimaat binnekort gaan herstel nie. Bedryfsuitdagings in alle afdelings word getakel, insluitend die implementering van verskeie kostebesparingsinisiatiewe.Bidvest Namibia het Vrydagmiddag op N$7,87 per aandeel op die plaaslike indeks gesluit. Die groep het verlede Augustus nog op N$10,48 per aandeel gestaan. Bidvest Namibia het in Februarie vanjaar skerp gedaal en dié maand op N$9 per aandeel geëindig. In Maart het dit verder tot N$7,79 geval.Bidvest Namibia het op 26 Oktober 2009 teen N$7,20 per aandeel op die plaaslike indeks genoteer.

Bidvest: Hoop en bid vir beter dae

Kommentaar

Republikein 2025-05-20

Meld asseblief aan om kommentaar te lewer

Bidvest: Hoop en bid vir beter dae

Kommentaar

Republikein 2025-05-20

Meld asseblief aan om kommentaar te lewer

MELD AAN

Advertensie