Bibbernaweek, reën voorspel

Elvira Hattingh – Die Namibiese weerkantoor het ‘n weerwaak uitgereik vir koue weer wat reeds van vandag af in die Weste verwag word.

Terselfdertyd sal koue, reënerige weer môre en Saterdag in die Suide en Weste voorkom, terwyl baie koue toestande Saterdag vir die suidelike, sentrale en oostelike streke van die land voorspel word.

Die weerkantoor het reeds Woensdag teen ryp op plekke in die suidelike, sentrale en oostelike streke van die land gewaarsku.

Die Suid-Afrikaanse weerdiens het gister in ‘n mediaverklaring gesê bitter koue en nat toestande, swaar reën en sneeu met tot stormsterk winde word oor die volgende paar dae oor dele van Suid-Afrika verwag. Die weerdiens het Dinsdag gesê sou die weerstelsel op koers bly, kan sneeu selfs in Namibië voorkom.

Dit sal volg ná twee koue fronte vanaf môre die suidelike punt van die vasteland sal tref en meer as 50 mm reën na die Wes-Kaap kan bring.

LandWater, ‘n nieregeringsorganisasie wat satellietfoto’s wetenskaplik analiseer en interpreteer, sê die laagdrukstelsel wat tans na Suid-Afrika op pad is, is een van die gevaarlikstes sedert 2017.

LandWater sê die gevaarlikste deel daarvan sal die suidelike punt van die vasteland teen Maandag tref. LandWater het die stelsel informeel “Jörmungandr” gedoop, wat "groot monster" beteken.

“Ons verwag 'n stelsel wat die Kaapse storm van 7 Junie 2017 mag ewenaar én selfs oortref, veral in terme van windsterkte en die see se deinings,” is gesê. - [email protected]