Beyoncé se ontwerper skep werk vir Afrika
Nellie Peyton – ‘n Ontwerper van Senegal wil klerevervaardiging in dié land uitbrei en plaaslike kleremakers oplei om deur middel van haar suksesvolle handelsmerk werksgeleenthede te skep – dít danksy die Amerikaanse superster Beyoncé.
Sarah Diouf het internasionale aanhang verwerf nadat Beyoncé laas jaar tydens ’n vakansie in Italië van Diouf se rokke en wyepyplangbroeke gedra het – wat verkope bykans laat verdrievoudig het.
Die 31-jarige Diouf is toe gevra om ’n uitrusting spesiaal vir Beyoncé te ontwerp – wat sy dra in die musiekvideo Spirit vir die nuwe weergawe van die fliek The Lion King. Beyoncé se dansers in die video is met Tongoro-juwele getooi.
Die R&B-sanger Alicia Keys en die Britse model Naomi Campbell is ook al gesien in ontwerpe van Tongoro, wie se stukke aanlyn vir sowat 200 euros (ongeveer N$3 268) verkoop word.
Tog het die toenemende vraag na “Vervaardig in Afrika”-mode nog nie veel mense in haar tuisland bevoordeel nie, sê Diouf wat tot dusver net sewe kleremakers in diens geneem het.
Volgens haar kan Senegal se ontluikende klerebedryf uitbrei met behulp van meer plaaslike opleiding en aanlyn verkope.
"Ons het só baie talent, maar ek dink ons kort net ‘n bietjie meer struktuur om dit tot die volgende vlak te neem,” het sy tydens ‘n onderhoud in die Senegalese hoofstad, Dakar, gesê.
"Wat my betref, het Beyoncé se betrokkenheid dié gesprek begin en dit maak deure oop."
Diouf het Tongoro in 2016 begin ná heen en weer reise tussen Dakar en Parys. Haar vriende was toenemend gretig om die klere te koop wat sy in Senegal gemaak het.
Dakar is bekend vir sy helder, kleurvolle modes, maar die meeste kleremakers is selfopgelei en werk op straathoeke, beperk in die bereiking van ‘n groter kliëntebasis.
Nadat in die tydskrifte Elle en Vogue oor Tongoro berig is, het Diouf die potensiaal van wêreldwye verkope besef.
Sy wil volgende jaar uitbrei en mettertyd ‘n produksieaanleg met 100 tot 150 kleremakers open. "Na my mening was alles wat uit Afrika kom, vir lank met swak gehalte geassosieer,” het sy gesê. “Dit was vir my belangrik om daardie relaas verder te voer en te sê jy kán wel iets van Afrika koop wat nie ‘n cliché is nie . . . maar iets modern en jeugdig.”
Die uitdagings is groot. Senegalese kleremakers is nie gewoond aan massaproduksie nie. Aanlyn verkope is ook ‘n relatiewe nuwe begrip vir plaaslike inwoners, het Diouf gesê.
As meer Afrika-gebaseerde ondernemings e-handel aanvaar, sal dit ’n omwenteling veroorsaak wat hul reikwydte betref, het sy gesê
"In Dakar verrys al hoe meer handelsmerke. Ek dink met die nuwe generasie is dinge stadigaan aan die verander, veral omdat ons entoesiasties is oor digitale tegnologie.”
Haar grootste markte is Nigerië, Suid-Afrika en Ghana, maar sy wil pryse verlaag soos die maatskappy uitbrei en ‘n Afrika-weergawe word van Zara, die reuse- Spaanse kettingwinkel.
"Ek moet in opleiding belê. Dit is die volgende uitdaging vir ‘Vervaardig in Afrika’,” het sy gesê.
“Ons het ‘n klomp vakmanne met wonderlike vaardighede en talente, maar wat skaal betref, kan ons nie bekostig dat die een item nie soos die ander lyk nie.”
Ander Wes-Afrika-ontwerpers het dieselfde behoefte geëien. Sophie Sy, wat onlangs die Senegalese handelsmerk BAAX bekend gestel het, wil volgende jaar ’n skool vir kleremakers in Dakar open.
Diouf het gesê sy hoop die aandag op haar eie handelsmerk lei tot meer respek vir en beleggings in ander Afrika-ondernemings.
"Dit is vir my baie belangrik om ’n ekosisteem te skep waar almal voordeel kan trek uit dit wat ek doen.” - Thomson Reuters Foundation
Sarah Diouf het internasionale aanhang verwerf nadat Beyoncé laas jaar tydens ’n vakansie in Italië van Diouf se rokke en wyepyplangbroeke gedra het – wat verkope bykans laat verdrievoudig het.
Die 31-jarige Diouf is toe gevra om ’n uitrusting spesiaal vir Beyoncé te ontwerp – wat sy dra in die musiekvideo Spirit vir die nuwe weergawe van die fliek The Lion King. Beyoncé se dansers in die video is met Tongoro-juwele getooi.
Die R&B-sanger Alicia Keys en die Britse model Naomi Campbell is ook al gesien in ontwerpe van Tongoro, wie se stukke aanlyn vir sowat 200 euros (ongeveer N$3 268) verkoop word.
Tog het die toenemende vraag na “Vervaardig in Afrika”-mode nog nie veel mense in haar tuisland bevoordeel nie, sê Diouf wat tot dusver net sewe kleremakers in diens geneem het.
Volgens haar kan Senegal se ontluikende klerebedryf uitbrei met behulp van meer plaaslike opleiding en aanlyn verkope.
"Ons het só baie talent, maar ek dink ons kort net ‘n bietjie meer struktuur om dit tot die volgende vlak te neem,” het sy tydens ‘n onderhoud in die Senegalese hoofstad, Dakar, gesê.
"Wat my betref, het Beyoncé se betrokkenheid dié gesprek begin en dit maak deure oop."
Diouf het Tongoro in 2016 begin ná heen en weer reise tussen Dakar en Parys. Haar vriende was toenemend gretig om die klere te koop wat sy in Senegal gemaak het.
Dakar is bekend vir sy helder, kleurvolle modes, maar die meeste kleremakers is selfopgelei en werk op straathoeke, beperk in die bereiking van ‘n groter kliëntebasis.
Nadat in die tydskrifte Elle en Vogue oor Tongoro berig is, het Diouf die potensiaal van wêreldwye verkope besef.
Sy wil volgende jaar uitbrei en mettertyd ‘n produksieaanleg met 100 tot 150 kleremakers open. "Na my mening was alles wat uit Afrika kom, vir lank met swak gehalte geassosieer,” het sy gesê. “Dit was vir my belangrik om daardie relaas verder te voer en te sê jy kán wel iets van Afrika koop wat nie ‘n cliché is nie . . . maar iets modern en jeugdig.”
Die uitdagings is groot. Senegalese kleremakers is nie gewoond aan massaproduksie nie. Aanlyn verkope is ook ‘n relatiewe nuwe begrip vir plaaslike inwoners, het Diouf gesê.
As meer Afrika-gebaseerde ondernemings e-handel aanvaar, sal dit ’n omwenteling veroorsaak wat hul reikwydte betref, het sy gesê
"In Dakar verrys al hoe meer handelsmerke. Ek dink met die nuwe generasie is dinge stadigaan aan die verander, veral omdat ons entoesiasties is oor digitale tegnologie.”
Haar grootste markte is Nigerië, Suid-Afrika en Ghana, maar sy wil pryse verlaag soos die maatskappy uitbrei en ‘n Afrika-weergawe word van Zara, die reuse- Spaanse kettingwinkel.
"Ek moet in opleiding belê. Dit is die volgende uitdaging vir ‘Vervaardig in Afrika’,” het sy gesê.
“Ons het ‘n klomp vakmanne met wonderlike vaardighede en talente, maar wat skaal betref, kan ons nie bekostig dat die een item nie soos die ander lyk nie.”
Ander Wes-Afrika-ontwerpers het dieselfde behoefte geëien. Sophie Sy, wat onlangs die Senegalese handelsmerk BAAX bekend gestel het, wil volgende jaar ’n skool vir kleremakers in Dakar open.
Diouf het gesê sy hoop die aandag op haar eie handelsmerk lei tot meer respek vir en beleggings in ander Afrika-ondernemings.
"Dit is vir my baie belangrik om ’n ekosisteem te skep waar almal voordeel kan trek uit dit wat ek doen.” - Thomson Reuters Foundation
Kommentaar
Republikein
Geen kommentaar is op hierdie artikel gelaat nie