Beurtkrag dreig vir wanbetalers

Augetto Graig – Die nasionale kragverskaffer is nou opgesukkel met dorpsrade, munisipaliteite, staatsondernemings en selfs ministeries wat nie hul kragrekeninge eerbiedig en betyds betaal nie. NamPower het dié week aangekondig dat die situasie die volhoubaarheid van sy besigheid bedreig weens die groeiende debiteurerekening. NamPower se kliënte skuld reeds meer as N$1 miljard.Vanaf 12 April sal NamPower dus ’n skuldinvorderingsplan toepas vir grootmaat kragkliënte wat op 31 Maart steeds vir hul kragverbruik skuld. Toevoer van elektrisiteit aan hierdie instansies sal vir periodes van vier ure afgesny word, met fase 1 op Maandae vanaf 11:00 tot 15:00. Fase 2 tot 7 voeg elk nog een dag se vier ure sonder krag periode by, totdat elke dag van die week ’n tydperk sonder elektrisiteit behels. Fase 8 verleng die periodes van vier tot ses ure per dag, en fase 9 is tot agt ure per dag.NamPower noem elf dorpe wat ingevolge hierdie plan geteiken sal word indien hulle nie betaal nie, insluitend Maltahöhe, Bethanie, Gibeon, Koës, Tses, Leonardville, Kalkrand, Berseba, Stampriet, Witvlei en Aroab. Aroab se uitvoerende hoof, me. Elsa Laubscher, sê hulle is nog glad nie amptelik van hierdie verwikkeling ingelig nie. “Dit is nuus vir ons. Ons is geen kennisgewing hieroor gegee nie en ek het niks daarvan gehoor nie,” was haar antwoord op Republikein se navrae. Sy dring daarop aan die skuld lê nie voor Aroab se deur nie, maar voor die ministerie van stedelike en landelike ontwikkeling. “Dit is nie ons verantwoordelikheid nie,” sê sy en brei uit dat ’n ooreenkoms bestaan dat die dorp slegs vir sy maandelikse verbruik betaal, terwyl die ministerie aangebied het om te help deur vir die maksimum verbruik te betaal. “Hulle het hulself verbind om die dorpsrade te ondersteun. Ons betaal stiptelik. Dit is hulle wat agterstallig is en wat nou ’n negatiewe indruk van ons dorp skets,” sê sy. Aroab se dorpsraad is onlangs geprys dat dit die enigste is wat ’n ongekwalifiseerde ouditmening van die ouditeur-generaal vir 2019 ontvang het.Groter munisipaliteite wat op NamPower se teikenlys verskyn, is Rehoboth, Karasburg, Gobabis, Aranos en die gesamentlike onderneming tussen Okahandja en Cenored. Cenored het onderneem om gister teen die einde van die werkdag oor die verwikkelinge te reageer. Verder is drie staatsondernemings ook in die kragverskaffer se visier: Agribusdev, spesifiek die Oranjerivier-besproeiingsprojek, die agentskap vir nywerheidsontwikkeling in Namibië (Nida), asook TransNamib. TransNamib se woordvoerder, me. Abigail Raubenheimer, sê die nasionale spoordiens sal voor NamPower se sperdatum, einde van die maand, sy rekening opbetaal.Die enigste streekraad wat geteiken word, is ||Kharas. Die streekgoewerneur, me. Aletta Fredericks, het alle navrae na die raadsvoorsitter, mnr. Joseph Isaacks, verwys, maar hy is tot volgende week nie beskikbaar nie. ’n Anonieme bron by die raad het wel gesê hulle sal dié week ’n betaling doen, “hoewel nie alles ons skuld is nie”, en binne die volgende twee weke weer, om hopelik die beurtkrag af te weer.Die ministeries wat deur NamPower geteiken is, sluit in landbou, water en grondhervorming; binnelandse sake, immigrasie, veiligheid en sekuriteit; sport, jeug en nasionale diens asook gesondheid en maatskaplike dienste. Die gesondheidsministerie se adjunk- uitvoerende direkteur, me. Petronella Masabane, sê: “Uiteraard kan ons nie toelaat dat hospitale sonder krag gelos word nie. Ons kragopwekkers is slegs vir noodgevalle. Ons sal nie toelaat dat hospitale sonder krag is nie. Ons sal die fakture betaal,” het sy onderneem.Die enigste private instansie op NamPower se teikenlys is Congo Namibia Trading, wat vir die noordedorpie Kombat verantwoordelik is. – augetto@republikein.com.na

Beurtkrag dreig vir wanbetalers

Kommentaar

Republikein 2025-05-01

Meld asseblief aan om kommentaar te lewer

Beurtkrag dreig vir wanbetalers

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie