Bets wíl mos 'basta met die lysies'

“Kyk,” sê Bets. “Dis regtig eenvoudig.”Ons stap deur haar heerlike huis wat ek oor die vakansie moet oppas. “Wag,” sê ek. “Laat ek notas neem,” en ruk pen en papier uit.“Nee, nee,” keer Bets. “Dis regtig nie nodig nie. “Al wat jy moet onthou, is die volgende: Elke oggend moet die hondebolle op die grasperk en in die oprit met hiérdie blikskoppie opgeskep word. Gooi die bolle oor die heining in die veld. “Maak die potplante voor 07:00 nat, nie te veel nie. Druk die sproeiers liggies in die grasperk, 10 minute op ‘n kol. Moenie dat die vetplante nat word nie. Voor in die oprit is nóg 16 potplante waarvan sewe ook water moet kry. Pas op, van hulle lyk soos vetplante, maar is nie. Petrus kom elke Saterdag in. Maak tog seker hy maak nie die vetplante nat nie. “Die groot, groen vullisdrom staan buite by die gasbottel. Sit dit Sondagaande uit, links van die ingang. Bring dit Maandagoggende weer in. Hierdie ligblou sak gebruik jy vir herwinning van plastiek, glas en papier. Sit dit langs die drom. Die verwyderaars sal ‘n nuwe blou sak aan die drom vasknoop. Die groot swart vullisdrom is vir tuinrommel. Dit sal ons wegry as ons terug is na die vakansie. Laat Petrus dit in swart sakke gooi, wat in die kas langs die skoonmaakmiddels is. Die wit sakke vir die klein vullisdrom in die kombuis is onder die wasbak.“Gebruik een lepel growwe sout, in hierdie houer, en vier lepels waspoeier, in hierdie houer wat net soos die houer met die sout lyk. Die sout maak die wasgoed lekker sag.“Die stoof werk met gas en die oond met elektrisiteit. Draai die gas toe elke keer nadat jy dit gebruik het. Die gasbottel se knop is baie stram en kan afskiet, wees versigtig. “Die hondepille is hier onder in die kas langs die kas met die wit sakke. Poplap kry ‘n halwe koppie en Lara en Griet kry een en ‘n halwe koppie. Of wag, dis Feestyd, maak dit twee koppies vir die grotes. Poplap moet gewig verloor. “Sit die bakke ver van mekaar en staan maar by terwyl hulle eet. Hulle kan mekaar soms lelik aanval. Maak die waterbakke elke dag vol skoon water.“Nou, die orgideë. Die drie grotes moet so elke derde, vierde dag water kry. Tap die wasbak een-derde vol water en laat staan die potte daarin vir so 15, 20 minute. Tap ‘n bietjie water uit en sit die twee klein potte ook so vir 10,15 minute in. Elke tweede dag moet die orgideë ge-‘spritz’ word met hierdie waterbottel wat hier in die kas met die swart sakke is. “Spuit die blare, blomme, stamme en knoppies liggies daarmee. Maar nooit op dieselfde dag as waarop jy water in die wasbak gegee het nie. En praat met hulle, dan groei hulle tog so mooi.“Die sleutels met die groen houer is vir die garage, voorhek en agterdeur. Dié met die rooi houer is vir die garage, agterhek en my kamer se stoepdeur. Dié met die swart houer is die voorhek, agterhek, garage, vrieskas en voordeur s’n. Dié met die blou houer hang al jare hier, weet nie wat dit oopsluit nie. En dis al! Sien, baie eenvoudig.”Lank nadat ons vir Bets koebaai gewaai het, is ek steeds bleek. Drie dae later kom die e-pos. “Bly julle lekker? Alles orraait?” “Als onder beheer,” tik ek. “Die groot honde moet nog so 10,15 minute in die wasbak staan, Petrus is pas ge-‘spritz’, die orgideë blaf pragtig en byt nie meer nie, die bolle is in die blou sak onder die wasbak, die gasbottel is gister oor die heining, die vetplante is fluweelsag van die growwe sout, die sleutels is in die oprit en Poplap skuif van kol tot kol in die blikskoppie. “Rus uit en voorspoed vir 2015.”

Bets wíl mos 'basta met die lysies'

Kommentaar

Republikein 2026-05-05

Meld asseblief aan om kommentaar te lewer

Bets wíl mos 'basta met die lysies'

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.